༧ ཐམས་ཅད་ཀྱི་མཐའ་མ་ཉེ་བར་བསླེབས་པས། དྲན་པ་བརྟན་པོ་དང་རན་པར་སྨོན་ལམ་གྱི་ངང་ན་གནས་པར་གྱུར་ཅིག ༨ བྱམས་པས་ནི་སྡིག་པ་མང་པོ་འགེབས་པས། ཐམས་ཅད་པས་ལྷག་པར་ཕན་ཚུན་འཛད་དུ་མེད་པའི་བྱམས་པ་བྱེད་དགོས། ༩ མི་སྐྱོ་བར་ཕན་ཚུན་མགྲོན་པོར་བསུས་ཤིག ༡༠ རེ་རེ་ལ་གནང་སྦྱིན་ཐོབ་པ་དང་བསྟུན་ཏེ། དཀོན་མཆོག་གི་གནང་སྦྱིན་སྣ་ཚོགས་ཀྱི་གཉེར་པ་བཟང་པོ་ལྟར། ཕན་ཚུན་བདག་རྐྱེན་བྱོས་ཤིག ༡༡ ཆོས་འཆད་ན། དཀོན་མཆོག་གི་བཀའ་གླེང་བ་ལྟར་དང་། ཞབས་ཏོག་བྱེད་ན། དཀོན་མཆོག་གིས་གནང་བའི་སྟོབས་བཞིན་དུ་བྱོས་ཤིག དེ་ནས་བྱ་བ་ཐམས་ཅད་ནང་ཡེ་ཤུ་མཱ་ཤི་ཀའི་སྒོ་ནས་དཀོན་མཆོག་ལ་བསྟོད་པ་འབྱུང་བར་འགྱུར་རོ། དུས་རྒྱུན་དུ་དཔལ་དང་དབང་ཁོང་གི་ཡིན་ནོ། ཨ་མེན༎

༡༢ གཅེས་པ་རྣམས། ཁྱེད་ཚོར་མེ་ལྟ་བུའི་ཉམས་སད་འབྱུང་བ་ཁྱད་མཚར་ཞིག་མི་ཚོར་བར་ཡ་མཚན་དུ་མ་གྱུར་ཅིག ༡༣ ཁོང་གི་གཟི་བརྗིད་མངོན་པའི་ཚེ། ཁྱེད་ཚོ་རབ་ཏུ་དགའ་མགུ་བའི་ཕྱིར། མཱ་ཤི་ཀའི་སྡུག་བསྔལ་ཁྱེད་ཚོས་ཀྱང་མཉམ་དུ་འཁུར་བས་དགའ་བར་གྱུར་ཅིག ༡༤ དཀོན་མཆོག་གི་གཟི་བརྗིད་ཀྱི་ཐུགས་ཉིད་ཁྱེད་ཐོག་ཡོད་པས། མཱ་ཤི་ཀའི་མཚན་གྱི་རྐྱེན་གྱིས་ཁྱེད་ལ་སྨད་ན། ཁྱེད་བདེའོ། ༡༥ ཁྱེད་སུའང་མི་བསད་དམ། རྐུན་མའམ། སྤྱོད་ངན་ནམ། བསྟན་བཤིག་འཛིན་ཅིང་སྡུག་བསྔལ་བ་ནི་མི་རིགས་སོ། ༡༦ འོན་ཀྱང་མཱ་ཤི་ཀ་པ་ཡིན་པའི་དོན་དུ་སྡུག་བསྔལ་འབྱུང་ན། མི་ཁྲེལ་བར་མིང་དེའི་ཕྱིར་དཀོན་མཆོག་ལ་བསྟོད་པ་ཕུལ་ཞིག ༡༧ དཀོན་མཆོག་གི་ཁྱིམ་ཚང་ནས་ཞལ་ཆེ་གཅོད་པ་འགོ་འཚུགས་པའི་དུས་ལ་བབས་སོ། ང་ཚོ་རང་ནས་འགོ་འཚུགས་ན། དཀོན་མཆོག་གི་ཕྲིན་བཟང་མི་ཉན་པ་རྣམས་ལ་མཐར་ཅི་མི་འབྱུང་། ༡༨ དྲང་པོ་དག་ཀྱང་ཐར་དཀའ་ན། ཆོས་མེད་སྡིག་ཅན་གང་དུ་འགྲོ། ༡༩ དཀོན་མཆོག་གི་ཐུགས་དགོངས་བཞིན་སྡུག་བསྔལ་མྱོང་བ་རྣམས་ཀྱིས་ཀྱང་བཟང་པོ་བྱེད་ཅིང་། རང་གི་སྲོག་ནི་འགྱུར་བ་མེད་པའི་མཛད་པ་པོ་ལ་བཅོལ་ཅིག།