དེའི་ཕྱིར་སེམས་ངན་དང་། གཡོ་སྒྱུ་དང་། ཟོལ་ཟོག་དང་། ཕྲག་དོག་དང་། ཕྲ་མ་ཐམས་ཅད་སྤོངས་ཤིག ༢-༣ ཁྱེད་ཚོས་གཙོ་བོའི་ཐུགས་རྗེའི་བྲོ་བ་མྱངས་པས། གསར་དུ་སྐྱེས་པའི་བྱིས་པ་འོ་འཐུང་དང་འདྲ་བར། ཐར་པའི་ཕྱོགས་སུ་སྐྱེད་ཕྱིར། སེམས་ཉིད་ཀྱི་འོ་མ་ལྷད་མེད་ལ་གདུང་བར་གྱིས་ཤིག ༤ མིས་སྤངས་ཀྱང་དཀོན་མཆོག་གི་གཟིགས་ངོར་འདམས་པ་དང་རིན་ཆེན་ཡིན་པའི་གསོན་པོའི་རྡོ་ལགས་པ་ཁོང་གི་དྲུང་དུ་ཤོག་ཅིག ༥-༦ མདོ་ན། ངས་ནི་ཙི་ཨོན་ནང་དུ་རྡོ་ཞིག་བཞག རིན་ཐང་ཆེ་ཞིང་འདམས་པའི་ཟུར་རྡོ་ཡིན། ཁོང་ལ་དད་རྣམས་སྐྱེངས་པར་མི་འགྱུར་རོ། ཞེས་བྲིས་པ་བཞིན། ཡེ་ཤུ་མཱ་ཤི་ཀ་རྒྱུད་དཀོན་མཆོག་གི་ཐུགས་སུ་འབྱོན་པའི་སེམས་ཉིད་ཀྱི་མཆོད་པ་འབུལ་བའི་དགེ་འདུན་དམ་པར་འགྱུར་བའི་ཕྱིར། གསོན་པོའི་རྡོ་ལྟར་སེམས་ཉིད་ཀྱི་ཁང་པ་རྩིགས་ཤིག ༧ དད་པ་བྱེད་པ་ཁྱེད་ཚོར་ཁོང་རིན་ཆེན་ཡིན། དད་པ་མི་བྱེད་པ་རྣམས་ལ་ནི། རྩིག་དཔོན་རྣམས་ཀྱིས་སྤངས་པའི་རྡོ། དེ་ཀ་ཟུར་རྡོ་ཆེན་པོར་གྱུར། ༨ ཡང་། ཐོགས་ནས་སྒྱེལ་བའི་རྡོ་རུ་གྱུར། ཞེས་པ་ལྟར། དེ་རྣམས་ཀྱི་བསྐོས་ཚད་བཞིན་བཀའ་ལ་མ་ཉན་པས་རྐང་པ་ཐོགས་ནས་སྒྱེལ་ལོ༎