ཁྱོད་ཀྱིས་ནི་ཡང་དག་པའི་བསྟན་པ་དང་བསྟུན་པའི་སྐུལ་མ་ཐོངས་ཤིག ༢ རྒན་པ་རྣམས་བག་དང་ལྡན་པ་དང་། ཡ་རབས་དང་། བཙུན་པ་དང་། དད་པ་དང་། བྱམས་པ་དང་། བཟོད་པའི་ནང་བརྟན་པོ་ཡོད་དགོས། ༣ དེ་བཞིན་དུ་རྒན་མོ་རྣམས་དམ་པའི་ཚུལ་དང་ལྡན་ཞིང་། ཕྲ་མ་མི་བྱེད་མཁན་དང་། ཆང་བརྣབ་མེད་པ་དང་། བསླབ་བྱ་བཟང་པོ་བྱེད་མཁན་ཡིན་དགོས། ༤ དེ་ལྟར་དེ་ཚོས་གཞོན་ནུ་མ་རྣམས་ལ། ཁྱོ་དང་ཕྲུ་གུ་ལ་བྱམས་ཤིང་། ༥ དཀོན་མཆོག་གི་བཀའ་ལ་བསྐུར་བ་མི་འབྱུང་བའི་ཕྱིར། བཙུན་པ་དང་། གཙང་མ་དང་། ཁྱིམ་ལས་བྱེད་མཁན་དང་། བཟང་པོ་དང་། ཁྱོའི་ཁ་ལ་ཉན་པའི་བསླབ་བྱ་བྱེད་དོ། ༦ དེ་བཞིན་དུ་གཞོན་པ་རྣམས་བཙུན་པར་འགྱུར་བར་སྐུལ་ཞིག ༧ རྣམ་པ་ཐམས་ཅད་དུ་ཁྱོད་རང་བཟང་པོའི་དཔེ་རུ་སྟོན་ཅིག བསླབ་བྱ་སྟོན་ཞིང་ཁྱོད་རང་ལྷད་མེད་པ་དང་། ཡ་རབས་དང་། ༨ སྨད་པར་མི་ཐུབ་པའི་ཡང་དག་པའི་གཏམ་དང་ལྡན་པ་སྟོན་ཅིག དེ་ནས་རྒོལ་མཁན་ལ་ང་ཚོར་གཏམ་ངན་སྨྲ་རྒྱུ་མེད་པས་སྐྱེངས་པར་འགྱུར་རོ༎