དུས་མཐའ་མར་དུས་དཀའ་བ་འོང་བར་འགྱུར་བ་ཤེས་ཤིག ༢ དེའི་ཚེ་མི་རྣམས་རང་ལ་ཆགས་མཁན་དང་། དངུལ་ལ་ཆགས་མཁན་དང་། ཁེངས་དྲེགས་ཅན་དང་། ང་རྒྱལ་ཅན་དང་། ཚིག་རྩུབ་སྨྲ་མཁན་དང་། ཕ་མ་ལ་མི་རྩི་མཁན་དང་། དྲིན་མི་དྲན་མཁན་དང་། གྲིབ་ཅན་དང་། ༣ བརྩེ་སེམས་མེད་པ། རྒྱུད་གྱོང་པོ། ཕྲ་མ་མཁན། སེམས་མ་ཆུན་པ། གཏུམ་པོ། དགེ་བར་མི་སྤྲོ་བ། ༤ ངོ་ལོག་མཁན་བསམ་མནོ་མེད་པ། ང་རྒྱལ་གྱིས་ཁེངས་པ། དཀོན་མཆོག་ལས་འདོད་ཡོན་ལ་ལྷག་པར་ཆགས་མཁན་དང་། ༥ ཆོས་ཀྱི་གཟུགས་ཙམ་ལས་སྙིང་པོ་དང་བྲལ་བ་རྣམས་འབྱུང་བར་འགྱུར་རོ། དེ་རྣམས་ལས་འབྱོལ་ཞིག ༦-༧ དེ་ལྟ་བུའི་མི་རྣམས་ཀྱིས་ཁང་པ་རྣམས་ཀྱི་ནང་དུ་ཞུགས་ཏེ། སྡིག་པས་མནོན་ཞིང་འདོད་པས་གཡོ་བའི། རྟག་ཏུ་སློབ་ཀྱང་བདེན་པ་རྟོགས་པའི་ཚད་དུ་ནམ་ཡང་མི་སླེབས་པའི་བུད་མེད་བསམ་མེད་རྣམས་དབང་དུ་སྡུའོ། ༨ ཇི་ལྟར་ཡན་ནེ་དང་ཡམ་བ་རེ་གཉིས་ཀྱིས་མོ་ཤེ་ལ་རྒོལ་བ་ལྟར། སེམས་བརླགས་ཤིང་དད་པ་ཟོག་པོའི་མི་འདི་རྣམས་ཀྱིས་བདེན་པ་ལ་རྒོལ་ཡང་། ༩ སྔར་མོ་ཤེའི་དུས་ལ་བྱུང་བ་ལྟར། དེ་རྣམས་ཀྱི་གཏི་མུག་པ་མི་ཐམས་ཅད་ཀྱིས་ཤེས་འོང་བས། དར་བར་མི་འགྱུར་རོ༎