རང་ལས་རྒན་པ་ཞིག་ལ་རྩུབ་པར་མི་སྨྲ་བར། ཕ་ལྟར་བརྩིས་ཏེ་སྨྲོས་ཤིག གཞོན་པ་རྣམས་ལ་ནུ་བོ་དང་། ༢ རྒན་མོ་རྣམས་ལ་མ་དང་། གཞོན་ནུ་མ་རྣམས་ལ་སྲིང་མོ་ལྟར་སེམས་གཙང་བའི་སྒོ་ནས་སྨྲོས་ཤིག ༣ མོ་རེང་མ་བདེན་པ་ཡིན་པ་ལ་བཀུར་སྟི་བྱོས་ཤིག ༤ འོན་ཀྱང་མོ་རེང་མ་ཞིག་ལ་ཕྲུ་གུའམ་ཚ་བོ་ཚ་མོ་ཡོད་ན། སྔོན་ལ་བུ་ཕྲུག་དེ་ཚོས་རང་གི་ཁྱིམ་ཚང་ནང་ཆོས་བཞིན་སྤྱོད་པ་དང་། ཕ་མའི་དྲིན་ལན་འཇལ་བར་བསླབ་དགོས། དེ་ལ་དཀོན་མཆོག་ཐུགས་དགྱེས་སོ། ༥ བདེན་པའི་མོ་རེང་མ་གཅིག་པུར་ལུས་པ་དེ། དཀོན་མཆོག་ལ་རེ་བ་བྱེད་ཅིང་། ཉིན་མཚན་མེད་པར་སྨོན་ལམ་དང་གསོལ་བ་འདེབས་ཤིང་གནས་ཀྱང་། ༦ འདོད་ཡོན་ལ་ཆགས་པ་དེ་གསོན་ཡང་ཤི་བ་དང་འདྲའོ། ༧ མོ་རེང་མ་རྣམས་ཟེར་རྒྱུ་མེད་པར་གནས་པའི་ཕྱིར་དུ་འདི་ལྟར་སྒོ་ཞིག ༨ རང་གི་གཉེན་དང་ཁྱད་པར་དུ་རང་གི་ནང་ཚང་ལ་མི་ལྟ་མཁན་དེ། དད་པ་ལས་འགལ་བས། དད་མེད་ལས་ཐུ་བ་ཡིན། ༩ ལོ་དྲུག་ཅུ་ལས་ཆུང་བ་དང་། ལན་ཅིག་ལས་ལྷག་ཁྱིམ་ཐབ་བྱས་པ་མོ་རེང་མའི་ཐོའི་ནང་འཇུག་མི་ཆོག ༡༠ མོ་ནི་སྤྱོད་པ་བཟང་པོར་མངོན་པ་དང་། བུ་ཕྲུག་རྣམས་ལ་གསོ་སྐྱོང་བྱས་པ་དང་། མགྲོན་པོ་ལ་བྱམས་པ་བྱས་པ་དང་། དམ་པ་རྣམས་ཀྱི་ཞབས་བཀྲུས་པ་དང་། སྡུག་བསྔལ་ཅན་ལ་རོགས་བྱས་པ་དང་། ཅི་ས་ནས་ལས་བཟང་བྱེད་པར་བརྩོན་པ་ཡིན་པར་དགོས། ༡༡ དེ་ལས་ཆུང་བའི་མོ་རེང་མ་ཐོའི་ནང་དུ་མ་འཇུག་ཅིག དེ་རྣམས་མཱ་ཤི་ཀ་དང་རྒྱབ་འགལ་དུ་འདོད་ཆགས་ཀྱི་དབང་དུ་འགྲོ་ན། བག་མ་བྱེད་པར་འདོད་ཅིང་། ༡༢ སྔར་བྱས་པའི་དམ་བཅའ་དང་འགལ་བས་སྐྱོན་ཕོག་གོ། ༡༣ དེ་མ་ཟད་ལེ་ལོ་ཅན་དུ་འགྱུར་ཏེ། ཁྱིམ་ནས་ཁྱིམ་དུ་འགྲོ་ཞིང་། ལེ་ལོ་ཅན་མ་ཟད་ངག་ཀྱལ་སྨྲ་ཞིང་གཞན་གྱི་ལས་ནང་གཏོགས་ཤིང་ཟེར་མི་རུང་བ་རྣམས་ཟེར་རོ། ༡༤ དེའི་ཕྱིར་མོ་རེང་མ་གཞོན་ནུ་རྣམས་བག་མར་འགྲོ་ཞིང་། ཕྲུ་གུ་སྐྱེད་དེ། ནང་སྐྱོང་ཞིང་། དགྲ་བོར་ང་ཚོར་འཕྱ་བའི་སྐབས་མི་གཏོང་བ་ལ་ང་འདོད་དོ། ༡༥ ཁ་ཅིག་ཁྱར་ནས་བདུད་ཀྱི་རྒྱབ་ནས་སོང་ཟིན་ཏོ། ༡༦ ཆོས་ཚོགས་ལ་ཚེགས་མེད་པར་བདེན་པའི་མོ་རེང་མར་རོགས་བྱེད་ཐུབ་པའི་ཕྱིར་དད་ལྡན་ཞིག་ལ་གཉེན་མོ་རེང་ཞིག་ཡོད་ན། དེ་ལ་ཁོས་རོགས་བྱེད་དགོས་སོ༎