༦
དཀོན་མཆོག་གི་མཚན་དང་བསྟན་པ་ལ་སྐུར་པ་མི་འབྱུང་བའི་ཕྱིར། ཚེ་གཡོག་གི་གཉའ་ཤིང་འོག་ཏུ་ཡོད་ཚད་ཀྱིས་རང་གི་དཔོན་པོ་ལ་ཀུན་ཏུ་བཀུར་སྟི་བྱེད་འོས་པར་རྩིས་ཤིག ༢ དཔོན་པོ་མཱ་ཤི་ཀ་པ་ཡིན་ན། སྤུན་ཡིན་པའི་རྐྱེན་གྱིས་རྩིས་མེད་མི་བྱེད་པར། གང་ལ་གཡོག་བྱེད་པ་དེ་དད་པ་གཅིག་པ་དང་གཅེས་པ་ཡིན་པས། ལྷག་པར་གཡོག་བྱེད་དགོས།བྱ་འོས་པའི་ལས་འདི་རྣམས་སློབ་ཅིང་སྐུལ་ཅིག ༣ ཆོས་དང་མཐུན་པའི་བསྟན་པ་ང་ཚོའི་གཙོ་བོ་ཡེ་ཤུ་མཱ་ཤི་ཀའི་དགག་པ་མེད་པའི་གསུང་ལ་མི་ཉན་པར་སུ་ཞིག་གིས་བསྟན་པ་གཞན་ཞིག་སྟོན་ན། ༤ དེ་ང་རྒྱལ་གྱིས་ཁེངས་པ་ཡིན་ཏེ་ཅིའང་མི་ཤེས་སོ། དེ་རྣམས་ཕྲག་དོག་དང་། འགྲན་སེམས་དང་། ཕྲ་མ་དང་། རྣམ་རྟོག་ངན་པ་སྐྱེད་པའི་ཆོས་རྩོད་གླེང་དང་ཚིག་གི་འཐབ་མོ་འདོད་པའི་ནད་ཀྱིས་བཏབ་པ་ཡིན་ཏེ། ༥ ཆོས་ནི་ནོར་ཐོབ་པའི་ཐབས་ཤིག་ཡིན་བསམ་པའི་དྲན་པ་འཁྱོར་ཞིང་བདེན་པ་དང་བྲལ་བའི་མིའི་དཀྱིལ་དུ་རྩོད་པ་ལྡང་ངོ་། ༦-༧ ང་ཚོས་འཇིག་རྟེན་དུ་ཅིའང་འཁྱེར་མ་འོངས། འཇིག་རྟེན་ནས་འཁྱེར་ཡང་མི་ཐུབ་པས། ཆོག་ཤེས་ལྡན་པའི་ཆོས་ནི་ནོར་གྱི་མཆོག་གོ། ༨-༩ ང་ཚོར་ཟ་རྒྱུ་དང་གོན་རྒྱུ་ཡོད་པས་ཆོག ཕྱུག་པོར་འགྱུར་བ་འདོད་པ་རྣམས་ནི། ཕུང་བ་དང་སྟོང་བའི་ནང་དུ་སྣུབ་པའི་དོན་མེད་པ་དང་གནོད་བྱེད་ཀྱི་འདོད་པའི་ཉམས་སད་དང་རྙིའི་ནང་དུ་ཚུད་དོ། ༡༠ དངུལ་ལ་ཆགས་པ་ངན་པ་ཀུན་གྱི་རྩ་བ་ཡིན། སྲེད་པ་འདིའི་རྐྱེན་གྱིས་ཁ་ཅིག་དད་པ་ལས་འཁྱར་ནས་རང་གི་སྙིང་ཟུག་རྔུས་སྣུན་པ་ཡིན་ནོ༎
༡༡ དཀོན་མཆོག་གི་སྐྱེས་བུ་ཁྱོད། དེ་དག་ལས་བྲོས་ཤིང་དྲང་བ་དང་། ཆོས་སེམས་དང་། དད་སེམས་དང་། བྱམས་སེམས་དང་། ཡིད་བརྟན་དང་། དུལ་བ་ལ་སྙེགས་ཤིག ༡༢ དད་པའི་འཐབ་མོ་བཟང་པོ་འཐབ་ཅིག ཚེ་མཐའ་མེད་པ་བཟུང་ཞིག དེའི་དོན་དུ་ཁྱོད་བོས་ཏེ། དཔང་པོ་མང་པོའི་མདུན་དུ་ཁྱོད་ཀྱིས་ཁས་ལེན་པ་བཟང་པོ་དེ་ལངས་པ་ཡིན། ༡༣ དངོས་པོ་ཐམས་ཅད་ཀྱི་འཚོ་མཛད་ལགས་པའི་དཀོན་མཆོག་དང་། པོན་ཏིའུ་པི་ལ་ཏུའི་མདུན་དུ་དཔང་པོ་བཟང་པོ་མཛད་པའི་མཱ་ཤི་ཀ་ཡེ་ཤུ་དཔང་དུ་བཙུགས་ཏེ་ཁྱོད་ལ། ༡༤ གཙོ་བོ་ཡེ་ཤུ་མཱ་ཤི་ཀ་མངོན་སུམ་དུ་འབྱོན་པའི་བར་དུ་བཀའ་དེ་དམེ་བ་མེད་ཅིང་སྐྱོན་མེད་པར་སྲུང་ཞིག་ཅེས་ངས་སྒོའོ། ༡༥ བདེ་ལྡན་མངའ་བདག་གཅིག་ལགས་པ། རྒྱལ་པོ་རྣམས་ཀྱི་རྒྱལ་པོ་དང་། གཙོ་བོ་རྣམས་ཀྱི་གཙོ་བོ་ཡིས། དུས་ལ་འབབས་ཚེ་དེ་རྣམས་བསྟན། ༡༦ ཁོང་ནི་འཆི་མེད་གཅིག་པུ་ལགས། སྙོབ་ཏུ་མེད་པའི་འོད་ནང་བཞུགས། སུས་ཀྱང་མ་མཐོང་མཐོང་དུ་མེད། ཁོང་ལ་རྒྱུན་དུ་བཀུར་སྟི་དང་། མངའ་ཐང་རྟག་ཏུ་ཡོད་པར་ཤོག ཨ་མེན༎
༡༧ ནོར་བདག་རྣམས་ཀྱིས། ང་རྒྱལ་མི་སྐྱེད་ཅིང་མི་རྟག་པའི་ནོར་ལ་བློ་གཏད་མི་བྱེད་པར། ང་ཚོར་ལོངས་སྤྱོད་པའི་ཕྱིར་དུ་སྤྱི་དང་བྱེ་བྲག་གི་ནོར་སྩལ་བའི་དཀོན་མཆོག་ལ་བློ་གཏད་བྱེད་ཕྱིར་དེ་རྣམས་ལ་སྐུལ་ཞིག ༡༨ དེ་རྣམས་དགེ་བ་བྱེད་པ་དང་། དགེ་བའི་ནོར་དང་ལྡན་པ་དང་། སྦྱིན་པ་ལ་དགའ་བ་དང་། གཏོང་ཕོད་ལྡན་པ་དང་། ༡༩ ཡང་དག་པའི་ཚེ་ཡིན་པ་དེ་ཐོབ་པའི་དོན་དུ། རང་གི་ཕྱི་མའི་ཕྱིར་གཞི་མ་བརྟན་པོ་ཞིག་འཛིན་མཁན་ཡིན་དགོས།