མདོར་ན་ངའི་སྤུན་རྣམས། གཙོ་བོ་ལ་ཡི་རང་བར་གྱུར་ཅིག དོན་གཅིག་རང་ཡང་ཡང་འབྲི་བ་ལ་ང་མི་བསུན་གྱི། ཁྱོད་ཚོའི་ཕྱིར་ཕན་ནོ། ༢ ཁྱི་ཡིན་པ་རྣམས་ལ་ཟོན་བྱོས་ཤིག ལས་ངན་བྱེད་པ་རྣམས་ལ་ཟོན་བྱོས་ཤིག ཡ་ཧུ་དཱ་པའི་རྟགས་དང་ལྡན་པ་རྣམས་ལ་ཟོན་བྱོས་ཤིག ༣ ལུས་ལ་བློ་གདེང་མི་བྱེད་པར། དཀོན་མཆོག་ལ་ཐུགས་ཉིད་ཀྱི་སྒོ་ནས་བསྙེན་བཀུར་བྱེད་ཅིང་མཱ་ཤི་ཀ་ཡེ་ཤུ་ངོམ་པ་ང་ཚོ། བདེན་པའི་རྟགས་དང་ལྡན་པའི་དཀོན་མཆོག་གི་མི་སྡེ་ཡིན། ༤ ང་རང་ལུས་ལ་བལྟས་ཀྱང་བློ་གདེང་གི་རྒྱུ་ཡོད། སུ་ཞིག་ལ་ལུས་ལ་བལྟས་ཏེ་བློ་གདེང་བྱེད་པའི་རྒྱུ་ཡོད་ན། ང་ལ་ལྷག་པར་དུ་ཡོད། ༥ ང་ནི་ཞག་བརྒྱད་པ་ལ་རྟགས་དང་ལྡན་ཏེ། མི་བརྒྱུད་ནི་ཨིས་ར་ཨེལ་པ། སྡེ་ནི་བེན་ཡ་མིན་པ། ཨིབ་རི་པ་ནས་ཆད་པའི་ཨིབ་རི་པ། ཚུལ་ཁྲིམས་ནི་ཕ་རུ་ཤི་པ། ༦ འདུན་པ་ནི་ཆོས་ཚོགས་ལ་འཚེ་བ་པོ། བཀའ་ཁྲིམས་ཀྱི་རྣམ་པར་དག་པ་ལ་བལྟས་ཏེ་སྐྱོན་མེད་ཡིན། ༧ འོན་ཀྱང་ངའི་ཁེ་དང་འདྲ་བ་རྣམས་མཱ་ཤི་ཀའི་དོན་དུ་གུན་དུ་བརྩིས་པ་ཡིན། ༨ ངའི་གཙོ་བོ་ལགས་པའི་ཡེ་ཤུ་མཱ་ཤི་ཀ་རྟོགས་པ་ཤིན་ཏུ་རིན་ཐང་ཆེ་བས། གཞན་ཐམས་ཅད་གུན་དུ་རྩིའོ། ༩ མཱ་ཤི་ཀ་རྙེད་པའི་ཕྱིར། བཀའ་ཁྲིམས་ལ་རག་ལས་པའི་དགེ་རྩ་ང་ལ་མེད་ཅིང་། མཱ་ཤི་ཀ་ལ་དད་པའི་སྒོ་ནས་བྱུང་བའི་དད་པ་ལ་རག་ལུས་པའི་དཀོན་མཆོག་གི་ཐུགས་རྗེའི་ཞལ་ཆེ་དང་ལྡན་པར་ཤེས་ཏེ། ཁོང་གི་དོན་དུ་ཐམས་ཅད་གུན་དུ་རྩི་ཞིང་། ཕྱག་དར་ལྟར་རྩིའོ། ༡༠ ཁོང་ཉིད་དང་གཤིན་པོ་ལས་སྐུ་གསོན་པོར་བཞེངས་པའི་མཐུ་ནུས་རྟོགས་པ་དང་། ཁོང་གྲོངས་པ་དང་འདྲ་བར་འཆི་ཞིང་། ཁོང་གི་སྡུག་བསྔལ་ངས་མྱོང་བ་དང་། ༡༡ ཐུབ་ན་གཤིན་པོའི་ཁྲོད་ལས་གསོན་པོར་ལང་བ་ནི་ངའི་འདོད་དོན་ནོ༎