དོན་གང་ལ་བོས་པར་མཛད་པ་དང་འོས་པར་སྤྱོད་ཅིག ཅེས་གཙོ་བོའི་བཙོན་པ་ཡིན་པ་ངས་ཞུ་བ་འབུལ་ལོ། ༢ སྙེམས་ཆུང་དང་། དུལ་བ་དང་། ཐེག་པ་དང་། བྱམས་པས་གཅིག་གིས་གཅིག་ལ་བཟོད་པ་བྱེད་ཅིང་། ༣ ཐུགས་ཉིད་ལས་བྱུང་བའི་མཐུན་པ་དེ་སྡུམ་པའི་འཆིང་བས་ཡུན་རིང་དུ་གནས་པ་ལ་བརྩོན་ཞིག ༤ ཁྱེད་བོས་པར་མཛད་པའི་དོན། རེ་བ་གཅིག་ཡིན་པ་ལྟར། སྐུ་ལུས་གཅིག ཐུགས་ཉིད་གཅིག ༥ གཙོ་བོ་གཅིག དད་པ་གཅིག ཁྲུས་གསོལ་གཅིག ༦ ཐམས་ཅད་ཀྱི་སྟེང་དང་། ཐམས་ཅད་ཀྱི་བར་དང་། ཐམས་ཅད་ཀྱི་ནང་ན་བཞུགས་པའི་ཐམས་ཅད་ཀྱི་དཀོན་མཆོག་དང་ཡབ་གཅིག་ལགས་སོ། ༧ ང་ཚོ་རེ་རེ་ལ་མཱ་ཤི་ཀའི་གནང་སྦྱིན་དང་དཔག་ནས་ཐུགས་རྗེ་སྩལ་བ་ཡིན། ༨ འདི་སྐད་དུ། སྟེང་དུ་འཕགས་དུས་བཙོན་པའི་ཚོགས་འཁྲིད་ནས། ཁོང་གིས་མི་ལ་གནང་སྦྱིན་སྣ་ཚོགས་སྩལ། ཞེས་ཏེ། ༩ ཁོང་འཕགས་སོ་ཞེས་ན། འོག་ཏུ་དམའ་མོའི་ས་ལའང་བབས་པའི་དོན་ཡང་ཡིན་ཏེ། ༡༠ འོག་ཏུ་བབས་པ་ཁོང་ནི། ཐམས་ཅད་བཀང་བའི་དོན་དུ། ནམ་མཁའ་ལས་ཀྱང་ཡར་འཕགས་པ་ཉིད་ལགས་སོ། ༡༡ སྩལ་ཞེས་ན། ཁོང་གིས་ལ་ལར་སྐུ་ཚབ། ལ་ལར་ལུང་སྟོན་པ། ལ་ལར་ཕྲིན་བཟང་འཆད་པ། ལ་ལར་རྫི་བོའམ་སློབ་དཔོན་གྱི་གནང་སྦྱིན་སྩལ་བ་ཡིན་ཏེ། ༡༢-༡༣ མཱ་ཤི་ཀའི་སྐུ་ཚད་དང་ལོངས་པར་ང་ཚོ་ནར་སོན་པའི་བར་དུ། ང་ཚོ་ཐམས་ཅད་ཀྱིས་དཀོན་མཆོག་གི་སྲས་ངོ་རྟོགས་ནས་དད་པའི་ནང་གཅིག་ཏུ་འགྱུར་ཞིང་། མཱ་ཤི་ཀ་པ་རྣམས་ཕུན་སུམ་ཚོགས་པར་ཞབས་ཏོག་བྱེད་ཅིང་། མཱ་ཤི་ཀའི་སྐུ་ལུས་ཡར་བཞེང་བར་འགྱུར་རོ། ༡༤ དེ་ལྟར་ཕྱིན་ཆད་ང་ཚོ་གཡོ་ཁྲམ་དང་ཟོལ་ཟོག་གིས་ལོག་ལྟ་སྐྱེད་པའི་ལྟ་བ་སྣ་ཚོགས་ཀྱི་རླུང་གིས་སྐྱོད་པའི་བྱིས་པར་མ་འགྱུར་བར། ༡༥ བྱམས་སེམས་ཀྱིས་བདེན་པ་སྨྲ་ཞིང་མཱ་ཤི་ཀའི་ནང་དུ་ཅིས་ནས་སྐྱེད་ལ་འོང་བར་དགོས། ༡༦ མཱ་ཤི་ཀ་ནི་དབུ་ལགས་ཏེ། ལུས་ཧྲིལ་པོ་ནི། དེའི་ཚིགས་རྣམས་ཀྱིས་བསྒྲིགས་ནས་འབྲེལ་ཏེ། ཡན་ལག་རེ་ལ་ཡོད་པའི་ནུས་ཚད་བཞིན་དུ་བྱམས་པའི་སྒོ་ནས་ལུས་བཞེང་ཞིང་ཡར་སྐྱེད་དོ༎