ཉེས་སྐྱོན་དང་སྡིག་པའི་རྐྱེན་གྱིས་ཤི་བ་ཁྱེད་ཚོའང་ཁོང་གིས་གསོན་པོར་མཛད། ༢ སྔར་ཁྱེད་སྤྱོད་ལམ་དེ་ནང་འཇིག་རྟེན་གྱི་ལུགས་ལྟར་འགྲུལ་ནས། བཀའ་ལ་མི་ཉན་པའི་མི་བརྒྱུད་ནང་རྒྱུ་བའི་འབྱུང་པོའམ། བར་སྣང་གི་དབང་པོའི་རྗེས་སུ་འབྲངས་སོ། ༣ མི་བརྒྱུད་དེའི་ཁྲོད་དུ། སྔར་ང་ཚོ་ཐམས་ཅད་ཀྱང་། རང་གི་འདོད་ཆགས་ལ་ལོངས་སྤྱད་དེ། ལུས་དང་ཡིད་ཀྱི་འདོད་པའི་དབང་དུ་སོང་ནས། གཞན་རྣམས་དང་འདྲ་བར་ཆད་པ་རང་བཞིན་གྱིས་ཕོག་འོས་པ་ཡིན་ནོ། ༤ འོན་ཀྱང་སྙིང་རྗེ་དཔག་ཏུ་མེད་པའི་དཀོན་མཆོག་གིས། ༥-༦ ང་ཚོ་ཉེས་པའི་རྐྱེན་གྱིས་ཤི་བ་རྣམས་ལ་ཁོང་གི་བྱམས་པ་ཆེན་པོའི་སྒོ་ནས། མཱ་ཤི་ཀ་དང་མཉམ་དུ་གསོན་པོར་མཛད་དོ། དོན་དམ་ཐུགས་རྗེའི་ཐབས་ཀྱིས་ཁྱེད་ཚོ་ཐར་རོ། ༧ མ་འོངས་པ་ན་མཱ་ཤི་ཀ་ཡེ་ཤུའི་སྒོ་ནས་ང་ཚོ་ལ་བཀའ་དྲིན་མཛད་པའི་བསམ་གྱིས་མི་ཁྱབ་པའི་ཐུགས་རྗེ་སྟོན་པའི་ཕྱིར། ཁོང་མཉམ་ང་ཚོའང་གསོན་པོར་བསླངས་ནས། ནམ་མཁའི་ཞིང་ཁམས་ནང་ཁོང་མཉམ་སྡོད་པར་གནང་ངོ་། ༨ དད་པའི་སྒོ་ནས་ཁྱེད་ཚོ་ཐུགས་རྗེ་ཡིས་ཐར་ཏེ། ཁྱེད་ཚོ་རང་ལས་མ་ཡིན་གྱི། དཀོན་མཆོག་གི་གནང་སྦྱིན་ནོ། ༩ སུས་ཀྱང་ངོམ་པ་མི་བྱེད་ཕྱིར་ལས་ཀྱི་སྒོ་ནས་ཀྱང་མིན་ནོ། ༡༠ ང་ཚོ་ནི་དཀོན་མཆོག་གི་ཕྱག་བཟོ་ཡིན་ཏེ། མཱ་ཤི་ཀ་ཡེ་ཤུའི་ངང་ན་དཀོན་མཆོག་གིས་སྔར་བཤམས་པའི་ལས་བཟང་པོ་བྱེད་པའི་ཕྱིར་བཀོད་པ་ཡིན་ནོ༎