ལོ་བཅུ་བཞིའི་རྗེས་སུ་ཏི་ཏུའང་ཁྲིད་ནས། བར་ན་བཱ་དང་མཉམ་དུ་ཡེ་རུ་ཤ་ལེམ་དུ་སླར་སོང་ངོ་། ༢ མངོན་པར་གྱུར་པ་བཞིན་དུ་སོང་ནས། ངའི་བྱེས་ཐམས་ཅད་དོན་མེད་དུ་མི་འགྱུར་བའི་ཕྱིར། ངས་ཕྱི་པར་འཆད་པའི་ཕྲིན་བཟང་དཔོན་པོ་རྣམས་ལ་ཟུར་དུ་བཤད་དོ། ༣ དེ་མ་ཟད་ང་མཉམ་ཡོད་པའི་ཏི་ཏུ་ནི་ཧེལ་ལེན་པ་ཡིན་ཀྱང་། ཡ་ཧུ་དཱ་པའི་རྟགས་བླངས་མ་དགོས་སོ། ༤ གསང་སྟེ་ཞུགས་པའི་སྤུན་རྫུས་མ་རེས་ང་ཚོར་ཐོབ་པའི་མཱ་ཤི་ཀའི་རང་དབང་ལ་མཚང་འབྲུ་ཞིང་། ང་ཚོ་བྲན་དུ་འཁོལ་བའི་ཕྱིར་འརྫུལ་ཡང་། ༥ ཁྱེད་ཚོའི་ཕྱིར་ཕྲིན་བཟང་གི་བདེན་པ་གནས་པའི་དོན་དུ། ང་ཚོས་ཡུད་ཙམ་ཡང་དེ་ཚོའི་ཁར་མ་ཉན་ཏོ། ༦ དཀོན་མཆོག་ནི་ཕྱོགས་རིས་མེད་པས། དཔོན་པོ་དེ་ཚོ་ཇི་ཡིན་རུང་ང་ལ་ཁྱད་པར་མེད་ཀྱི། ངས་བཤད་པ་ལ་དེ་ཚོས་ཅིའང་མ་བསྣན་པ་མ་ཟད། ༧-༨ ཡ་ཧུ་དཱ་པ་རྣམས་ཀྱི་རྩར་པེ་ཏྲོ་མངགས་མཁན་ཁོང་ཉིད་ཀྱིས་ང་ལྷ་ཆོས་པ་རྣམས་ཀྱི་རྩར་མངགས་པས། ཇི་ལྟར་པེ་ཏྲོ་ལ་ཡ་ཧུ་དཱ་པར་ཕྲིན་བཟང་འཆད་པའི་འགན་གནང་བ། དེ་ལྟར་ང་ལ་ལྷ་ཆོས་པའི་འགན་གནང་ཡོད་པར་མཐོང་ཞིང་། ༩ ང་ལ་མཛད་པའི་ཐུགས་རྗེ་དེ་ཡ་ཀོབ་དང་ཀེ་ཕཱ་དང་ཡོ་ཧ་ནན་གྱིས་ཀྱང་གོའོ། དེ་ནས་ཀ་བ་ལྟར་ཡིན་པ་དེ་གསུམ་པོས་ང་དང་བར་ན་བཱ་ལ་མཉམ་གྲོགས་ཀྱི་རྟགས་ཡིན་པའི་ལག་གཡས་བཏང་ནས། ང་ཚོ་ཕྱི་པའི་རྩར་འགྲོ་བ་དང་། ཁོང་ཚོ་ཡ་ཧུ་དཱ་པའི་རྩར་འགྲོ་བར་ཐག་བཅད་དོ། ༡༠ ང་ཚོས་ཡེ་རུ་ཤ་ལེམ་གྱི་དབུལ་པོ་རྣམས་དྲན་པར་ཁོང་ཚོས་འདོད་པས། དེ་ནི་ང་རང་བྱེད་འདོད་པ་ཁོ་ནའོ༎