༧ དཔག་ཏུ་མེད་པའི་སྟོབས་ང་ཚོའི་མ་ཡིན་པར་དཀོན་མཆོག་གི་ཡིན་པར་སྟོན་པའི་ཕྱིར་དུ། གཏེར་འདི་ང་ཚོའི་རྩར་རྫ་བུམ་གྱི་ནང་དུ་ཡོད། ༨ ཕྱོགས་ཀུན་ནས་ནོན་ཀྱང་ང་ཚོ་མི་ཆག མགོ་འཐོམས་ཀྱང་ཡིད་མི་མུག ༩ འཚེ་ཡང་དོར་བ་མིན། སྒྱེལ་ཡང་མི་འཆི། ༡༠ ང་ཚོའི་ལུས་ནང་ཡེ་ཤུའི་གསོན་པ་ཉིད་མངོན་པའི་ཕྱིར་དུ། ཡེ་ཤུའི་གྲོངས་པ་དེའང་རྟག་ཏུ་རང་གི་ལུས་ནང་འཁུར་རོ། ༡༡ ང་ཚོའི་མི་རྟག་པའི་ལུས་ཀྱི་ནང་ནའང་ཡེ་ཤུའི་གསོན་པ་ཉིད་མངོན་པའི་ཕྱིར་དུ། ང་ཚོ་གསོན་པོར་ཡོད་རིང་ཡེ་ཤུའི་དོན་དུ་འཆི་བའི་ལག་ཏུ་བཏད་པ་ཡིན་པས། ༡༢ ང་ཚོའི་ནང་འཆི་བས་ལས་བྱེད་ཅིང་། ཁྱེད་ཚོའི་ནང་གསོན་པ་ཉིད་ཀྱིས་ཕྲིན་ལས་མཛད་དོ། ༡༣ མདོ་ན། ངས་དད་པ་བྱས་པས་གཏམ་ཡང་བྱས། ཞེས་བྲིས་པ་དང་འདྲ་བའི་དད་པ་གནང་བའི་ཐུགས་ཉིད་ང་ཚོ་ལ་ཡོད་དེ། ༡༤ གཙོ་བོ་ཡེ་ཤུ་གཤིན་པོའི་དཀྱིལ་ནས་སྐུ་གསོན་པོར་བསླངས་པ་ཁོང་གིས་ང་ཚོའང་ཡེ་ཤུ་དང་མཉམ་དུ་བསླངས་ནས། ཁྱེད་ཚོ་དང་ལྷན་ཅིག་ཏུ་ཉིད་ཀྱི་སྤྱན་སྔར་འཇོག་པར་འགྱུར་བ་ཤེས་ཏེ། ང་ཚོས་ཀྱང་དད་པ་བྱེད་པས་གཏམ་བྱེད་དོ། ༡༥ དེ་ཐམས་ཅད་ཁྱེད་ཚོའི་དོན་དུ་བྱུང་བས། ཇི་ཙམ་མི་མང་པོ་ལ་ཐུགས་རྗེས་རྒྱས་པ་དེ་ཙམ་དཀོན་མཆོག་གི་དཔལ་ལ་གཏང་རག་འབུལ་བར་འགྱུར་རོ༎

༡༦ དེའི་ཕྱིར་ང་ཚོས་སྙིང་ཆུང་མི་བྱེད་པར་ལུས་ནི་རྒུད་ཀྱིན་འགྲོ་ཡང་། སེམས་ནི་ཞག་པས་ཞག་གསར་དུ་འགྲོའོ། ༡༧ ཡུད་ཙམ་གྱི་སྡུག་བསྔལ་ཡང་བ་འདིས། ངེད་ཀྱི་དོན་དུ་རྟག་པའི་དཔལ་ལྷུན་འགྲན་ཟླ་བྲལ་བ་ཞིག་ཤོམ་མོ། ༡༨ མཐོང་བ་རྣམས་མི་རྟག་པ་ཡིན་ཅིང་། མི་མཐོང་བ་རྣམས་རྟག་པ་ཡིན་པས། ང་ཚོས་མཐོང་བ་རྣམས་ལ་མི་ལྟ་བར། མི་མཐོང་བ་རྣམས་ལ་ལྟའོ༎