༤ ང་ཚོས་མཱ་ཤི་ཀའི་ངང་ནས་དཀོན་མཆོག་ལ་དེ་ལྟ་བུའི་བློ་གདེང་བྱེད་དོ། ༥ ང་ཚོའི་ནུས་པ་ནི་རང་གི་ཕྱོགས་ནས་མིན་ཏེ་དཀོན་མཆོག་གི་ཕྱོགས་ནས་ཡིན་པས། ༦ ཁོང་གིས་ང་ཚོ་བཀའ་ཁྲིམས་ཀྱི་མ་ཡིན་པར་ཐུགས་ཉིད་ཀྱི་ཡིན་པའི་ཞལ་ཆད་གསར་པ་ཞིག་གི་ཞབས་ཏོག་བྱེད་ནུས་པར་མཛད་དོ། བཀའ་ཁྲིམས་ཀྱི་ཡི་གེས་ནི་གསོད་ཅིང་། ཐུགས་ཉིད་ཀྱིས་ནི་གསོན་པར་མཛད་དོ། ༧ མོ་ཤེའི་ཞལ་གྱི་གཟི་བརྗིད་མི་རྟག་པ་ཡིན་ཀྱང་ཨིས་ར་ཨེལ་པ་རྣམས་ཀྱིས་བལྟ་མ་ཕོད། དེ་ལྟར་རྡོ་ལ་ཡི་གེར་བརྐོས་པ་འཆི་བར་འདྲེན་པའི་ཆོས་ཀྱི་ཞབས་ཏོག་ལ་གཟི་བརྗིད་དེ་ཙམ་ལྡན་ན། ༨ ཐུགས་ཉིད་ཀྱི་ཞབས་ཏོག་ལ་གཟི་བརྗིད་ཅི་ཙམ་ལྷག་པར་མི་ལྡན། ༩ ཉེས་ཆད་གཏོང་བའི་ཞབས་ཏོག་ལ་གཟི་བརྗིད་ལྡན་ན། དྲང་བ་ཉིད་ཀྱི་ཞབས་ཏོག་ལ་ལྷག་པར་ལྡན་དགོས། ༡༠ དེ་ལྟར་གཟི་བརྗིད་དཔག་མེད་ལྡན་པ་དེའི་རྐྱེན་གྱིས་སྔར་གཟི་བརྗིད་ལྡན་པ་དེ་གཟི་བརྗིད་མེད་པར་གྱུར་ཏོ། ༡༡ མི་རྟག་པ་དེ་གཟི་བརྗིད་དང་ལྡན་ན། རྟག་པ་དེ་ལྷག་པར་གཟི་བརྗིད་དང་ལྡན་དགོས།

༡༢ ང་ཚོར་དེ་ལྟ་བུའི་རེ་བ་ཡོད་པས། སྙིང་སྟོབས་ཆེན་པོས་གཏམ་གླེང་བྱེད་དེ། ༡༣ ཨིས་ར་ཨེལ་པ་ལ་མི་རྟག་པའི་གཟི་བརྗིད་ཀྱི་མཐར་ཐུག་མི་སྟོན་པའི་ཕྱིར་རང་གི་གདོང་ལ་ཁེབས་བཀབ་པའི་མོ་ཤེ་ལྟར་མིན་ནོ། ༡༤ འོན་ཀྱང་དེ་རྣམས་ཀྱི་ཤེས་པ་འཐུག་པོར་གྱུར་ཏོ། དེའི་ཕྱིར་དེ་རིང་གི་བར་དུ་ཞལ་ཆད་རྙིང་པ་ཀློག་དུས་ཁེབས་དེ་བཀབས་ནས་ལུས་སོ། མཱ་ཤི་ཀ་འབའ་ཞིག་གི་སྒོ་ནས་ཁེབས་དེ་ཤུ་ནུས་སོ། ༡༥ དེ་རིང་གི་བར་དུ་མོ་ཤེའི་མདོ་ཀློག་དུས་སུ་དེ་རྣམས་ཀྱི་སྙིང་ཁེབས་ཀྱིས་བཀབ་ཀྱང་། ༡༦ གཙོ་བོའི་ཕྱོགས་སུ་སེམས་སྒྱུར་ན། ཁེབས་དེ་མེད་པར་འགྱུར་རོ། ༡༧ གཙོ་བོ་ནི་ཐུགས་ཉིད་ལགས་ཏེ། གཙོ་བོའི་ཐུགས་ཉིད་ཡོད་སར་ཐར་པ་ཡོད། ༡༨ གདོང་ཁེབས་མེད་པ་ང་ཚོ་ཐམས་ཅད་གཙོ་བོའི་གཟི་བརྗིད་ཀྱི་མེ་ལོང་ཡིན་པས། ཐུགས་ཉིད་ལགས་པའི་གཙོ་བོའི་མཐུས། ཁོང་དང་མཚུངས་པར་འགྱུར་ཕྱིར་ང་ཚོའི་གཟི་བརྗིད་རིམ་པ་ནས་རིམ་པར་འགྱུར་རོ༎