ང་ཚོའི་ཕ་མེས་རྣམས་སྤྲིན་གྱི་འོག་ཏུ་བསྡད་དེ། རྒྱ་མཚོ་རྒལ་བས། ༢ ཐམས་ཅད་ཀྱིས་སྤྲིན་དང་མཚོའི་ནང་མོ་ཤེའི་ཁྲུས་བླངས་པ་ནི། ཁྱེད་སྤུན་རྣམས་ཀྱིས་ཤེས་པར་ང་འདོད་དོ། ༣ ཐམས་ཅད་ཀྱིས་ཐུགས་ཉིད་ཀྱི་ཁ་ཟས་གཅིག་པ་ཟོས། ༤ ཐུགས་ཉིད་ཀྱི་བཏུང་བ་གཅིག་པ་བཏུངས། དེ་རྣམས་དང་མཉམ་དུ་བྱོན་པའི་ཐུགས་ཉིད་ཀྱི་བྲག་ལས་བཏུངས་པས་སོ། བྲག་དེ་ནི་མཱ་ཤི་ཀའོ། ༥ འོན་ཀྱང་དེ་རྣམས་མང་ཤོས་དཀོན་མཆོག་གིས་སྤངས་པས། དེ་ཚོའི་རོ་འབྲོག་སྟོང་ནང་དབྱུགས་སོ། ༦ ཕ་མེས་ཀྱིས་ངན་པ་འདོད་པ་ལྟར་ང་ཚོས་ཀྱང་མི་འདོད་པའི་ཕྱིར། བྱ་བ་དེ་དག་ང་ཚོའི་ཕྱིར་སྐུལ་མའོ། ༧ མདོ་ན། མི་སྡེ་ཚོ་ཟ་འཐུང་ཕྱིར་བསྡད་ནས། གར་འཆམ་ཕྱིར་ལངས་སོ། ཞེས་བྲིས་པ་བཞིན། མི་ལ་ལས་སྐུ་འདྲར་ཕྱག་ཕུལ་བ་ལྟར་ཁྱེད་ཀྱིས་མ་འབུལ་ཞིག ༨ ཡང་ལ་ལས་ལོག་གཡེམ་བྱས་པས་ཉིན་གཅིག་ནང་མི་སྟོང་ཉེར་གསུམ་ཤི་བ་ལྟར། ང་ཚོས་ཀྱང་མ་བྱེད་ཅིག ༩ ལ་ལས་གཙོ་བོའི་ཐུགས་སད་པས་སྦྲུལ་གྱིས་བསད་པ་ལྟར། ང་ཚོས་ཐུགས་མ་སད་ཅིག ༡༠ ལ་ལས་མ་རངས་པའི་ཚིག་སྨྲས་ནས་གཤེད་མས་བསད་པ་ལྟར། ཁྱེད་ཚོས་མ་རངས་པའི་ཚིག་མ་སྨྲ་ཞིག ༡༡ གནས་ཚུལ་དེ་ནི་དེ་ཚོར་བརྡའི་ལུགས་སུ་བྱུང་ནས། ང་ཚོ་དུས་ཀྱི་མཐའ་མར་བསླེབས་ཡོད་པ་རྣམས་ལ་བསླབ་བྱའི་ཕྱིར་བྲིས་པ་ཡིན། ༡༢ དེ་བས་ན་བརྟན་པོར་ལངས་ཡོད་སྙམ་པ་དེས་འགྱེལ་བ་ལས་ཟོན་བྱོས་ཤིག ༡༣ བཟོད་མི་ཐུབ་པའི་དཀའ་བ་ཁྱེད་ཚོར་མ་བྱུང་། དཀོན་མཆོག་ནི་བསླུ་མེད་ལགས་པས། ཁྱེད་ཚོར་བཟོད་མི་ཐུབ་པའི་དཀའ་བ་མྱོང་མི་འཇུག་པར། བཟོད་པའི་སྟོབས་གནང་ཞིང་། དཀའ་བ་ལས་ཐར་བའི་ཐབས་ཀྱང་གནང་འོང་ངོ་། ༡༤ དེའི་ཕྱིར་གཅེས་པ་རྣམས། ལྷ་ཆོས་ལ་འཛེམས་ཤིག