ཕྱི་པའི་ཁྲོད་དུའང་མི་འབྱུང་བའི་འདོད་ལོག་ཁྱེད་ཁྲོད་བྱུང་སྟེ། གཅིག་གིས་རང་གི་ཕའི་ཆུང་མ་དང་འབྲེལ་བའི་སྐད་ཆ་ཐོས་སོ། ༢ དེ་ལྟར་སྤྱོད་མཁན་ནི་ཁྱེད་ཚོའི་ཁྲོད་ནས་འདོན་པའི་ཕྱིར་མྱ་ངན་བྱེད་པའི་ཚབ་ལ། ཁྱེད་ཚོ་རློམ་མམ། ༣ ངའི་ལུས་དེར་མེད་ཀྱང་ངའི་སེམས་ཁྱེད་ཚོའི་རྩར་ཡོད་པས། ང་རང་དངོས་སུ་ཁྱེད་ཚོ་མཉམ་ཡོད་པ་ལྟར། འདི་ལྟར་ཐག་བཅད་དོ། ༤ གཙོ་བོ་ཡེ་ཤུའི་མཚན་ནང་། ཁྱེད་ཚོ་དང་ངའི་སེམས་ཉིད་འཛོམས་པའི་དུས་སུ། ༥ སྡིག་ཅན་དེ་གཙོ་བོ་ཡེ་ཤུའི་ཉིན་མོར་སེམས་ཉིད་ཀྱི་ལུགས་སུ་ཐར་བའི་ཕྱིར། དེའི་ཟག་ཕུང་འཇིག་པའི་དོན་དུ་ཁོ་བདུད་ལ་གཏོད་དགོས། ༦ ཁྱེད་ཚོའི་རློམ་སེམས་དེ་མི་ལེགས། སྐྱུར་རྩི་ཕྲན་བུས་བག་ཟན་གང་པོར་སྐྱུར་ལང་བ་མི་ཤེས་སམ། ༧ བག་ཟན་གསར་པར་འགྱུར་ཕྱིར་སྐྱུར་རྩི་སྙིང་པ་དེ་སྤོངས། མཱ་ཤི་ཀ་ང་ཚོའི་པེ་སག་ཏུ་མཆོད་པར་གྱུར་བས། ཁྱེད་ཚོ་སྐྱུར་རྩི་མེད་པ་ཡིན། ༨ ད་ངན་སེམས་དང་གནོད་སེམས་ཀྱི་སྐྱུར་རྩི་ཡིན་པའི་སྐྱུར་རྩི་ངན་པའི་དུས་ཆེན་མི་བྱ་བར། སྐྱུར་རྩི་མེད་པའི་དྲང་བ་དང་བདེན་པའི་བག་ལེབ་ཀྱི་དུས་ཆེན་བྱའོ༎