ཁྱེད་སྤུན་རྣམས་ཐུགས་ཉིད་དང་ལྡན་པ་འདྲ་བར་ངས་སྨྲ་བར་མ་ནུས། འཇིག་རྟེན་པ་དང་ཆོས་ཚོགས་ཀྱི་བྱིས་པ་འདྲ་བར་སྨྲས་སོ། ༢ ངས་ཁྱེད་ལ་ཟན་མི་བསྟེར་བར་འོ་མ་བསྟེར། ཟན་ནི་མི་འཇུ་བས། ད་དུང་ཡང་ཁྱེད་འཇིག་རྟེན་པ་ཡིན་པས་འཇུ་མི་ནུས་སོ། ༣ ཁྱེད་ཚོའི་ནང་ཕྲག་དོག་དང་རྩོད་པ་ཡོད་རིང་། འཇིག་རྟེན་པ་མ་ཡིན་ནམ། མི་ཕལ་པ་ལྟར་མི་སྤྱོད་དམ། ༤ གཅིག་གིས་ང་པའུ་ལུའི་ཕྱོགས་པ་དང་། གཅིག་གིས་ང་ཨ་པོལ་ལོའི་ཕྱོགས་པ་ཡིན་ཟེར་རིང་། ཁྱེད་ཚོ་འཇིག་རྟེན་གྱི་མི་མ་ཡིན་ནམ། ༥ ཨ་པོལ་ལོ་སུ་ཡིན། པའུ་ལུ་སུ་ཡིན། གཙོ་བོས་རེ་རེ་ལ་སྐལ་བ་གནང་བ་བཞིན་དུ་ཁྱེད་དད་པར་བཀོད་པའི་ཞབས་ཕྱི་ཡིན། ༦ ངས་བཙུགས་ཤིང་། ཨ་པོལ་ལོས་ཆུ་བཏང་ཡང་། དཀོན་མཆོག་གིས་བསྐྱེད་བཅུག་པས། ༧ སྐྱེད་མཁན་དཀོན་མཆོག་དེ་འབའ་ཞིག་ལས་འཛུག་མཁན་དང་ཆུ་གཏོང་མཁན་གཉིས་གང་ཡང་མ་ཡིན། ༨ འཛུག་མཁན་དང་ཆུ་གཏོང་མཁན་འདྲ་བ་ཡིན་ཏེ། རེ་རེའི་ལས་བཞིན་རྔན་པ་ཐོབ་འོང་། ༩ ང་ཚོ་དཀོན་མཆོག་གི་ལས་གྲོགས་ཡིན་ཏེ། ཁྱེད་དཀོན་མཆོག་གི་ཞིང་དང་མཁར་ཡིན་ནོ། ༡༠ ང་ལ་གནང་བའི་དཀོན་མཆོག་གི་ཐུགས་རྗེ་བཞིན། རྩིག་དཔོན་མཁས་པ་དང་འདྲ་བར། ངས་རྨང་བཏིང་ཞིང་། གཞན་གྱིས་དེའི་ཁར་རྩིག་པས། རེ་རེས་རང་གི་མཁར་ལས་ལ་བྱ་ར་བྱོས་ཤིག ༡༡ ཡེ་ཤུ་མཱ་ཤི་ཀ་ཡིན་པའི་རྨང་བཏིང་ཟིན་པ་མ་གཏོགས། རྨང་གཞན་སུས་ཀྱང་འདིང་བར་མི་ནུས། ༡༢ རྨང་དེའི་ཁར་གསེར་རམ། དངུལ་ལམ། རིན་པོ་ཆེ་འམ། ཤིང་ངམ། རྩྭའམ། འཇག་མ་སོགས་དངོས་པོ་གང་ཞིག་གིས་རྩིག་ན། ༡༣ རེ་རེའི་ལས་མངོན་འོང་། དེའི་ཉིན་མོར་མི་རེ་རེའི་ལས་མེས་སད་པས་མངོན་འོང་། ༡༤ སུ་ཞིག་གི་རྨང་དེ་ལ་རྩིགས་པའི་མཁར་གནས་ན། རྔན་པ་ཐོབ་འོང་། ༡༥ འཚིག་ན་ལས་སྟོང་སྟེ། མི་དེ་མེ་ལྟ་བུ་ལས་ཚེ་ཐར་འོང་། ༡༦ ཁྱེད་དཀོན་མཆོག་གི་མཆོད་ཁང་ཡིན་ཏེ། དཀོན་མཆོག་གི་ཐུགས་ཉིད་ཁྱེད་ནང་བཞུགས་པ་མི་ཤེས་སམ། ༡༧ དཀོན་མཆོག་གི་མཆོད་ཁང་དམ་པ་ཡིན་པས། མཆོད་ཁང་བཤིག་པ་དེ། དཀོན་མཆོག་གིས་མེད་པར་མཛད་འོང་། མཆོད་ཁང་དེ་ཁྱེད་ཡིན་ནོ༎