དཀོན་མཆོག་ལས་མ་བྱུང་བའི་མངའ་བདག་མེད་ཅིང་། ཡོད་པ་རྣམས་དཀོན་མཆོག་གིས་བསྐོས་པས། མི་རེ་རེས་མངའ་བདག་གི་བཀའ་ལ་ཉོན་ཞིག ༢ མངའ་བདག་ལ་རྒོལ་བ་དེས་དཀོན་མཆོག་གི་གོ་རིམ་ལ་རྒོལ་ལོ། རྒོལ་པ་པོར་ཆད་པ་འཕོག་པར་འགྱུར་རོ། ༣ ངན་པ་བྱེད་མཁན་མ་གཏོགས་བཟང་པོ་བྱེད་མཁན་མངའ་བདག་ལ་འཇིགས་མི་དགོས། གལ་ཏེ་མངའ་བདག་ལ་མི་འཇིགས་པར་འདོད་ན། བཟང་པོ་བྱོས་ཤིག ༤ དེ་ནི་ཁྱོད་ལ་ཕན་ཕྱིར་དཀོན་མཆོག་གི་ཞབས་ཕྱི་ཡིན་པས། དེའི་ཕྱོགས་ནས་བསྟོད་སྒྲ་འབྱུང་འོང་། ཇི་སྟེ་ངན་པ་བྱེད་ན་འཇིགས་དགོས། དེས་རལ་གྲི་ཐོགས་པ་དོན་མེད་དུ་མིན་ཅིང་། ལས་ངན་བྱེད་པ་ཚོར་ཐུགས་ཁྲོའི་ཆད་པ་གཅོད་པའི་དཀོན་མཆོག་གི་ཞབས་ཕྱི་ཡིན་ནོ། ༥ ཐུགས་ཁྲོའི་འཇིགས་པ་འབའ་ཞིག་མ་ཟད་ཤེས་བཟང་གི་དོན་དུའང་འབངས་བྱེད་དགོས། ༦ དེ་ནི་དཀོན་མཆོག་གི་ཞབས་ཕྱི་ཡིན་ཅིང་། ལས་ཚན་དེ་བྱེད་པས། ཁྱོད་ཀྱིས་དཔྱ་ཁྲལ་ཡང་འཇལ་ལོ། ༧ ཐམས་ཅད་ལ་ཅི་འོས་པ་ཕུལ་ཞིག དཔྱ་ཁྲལ་འབུལ་འོས་པ་ལ་དཔྱ་ཁྲལ་དང་། ཚོང་ཁྲལ་འབུལ་འོས་པར་ཚོང་ཁྲལ་ཕུལ་ཞིག འཇིགས་འོས་པ་ལ་འཇིགས་ཤིག ཞེ་ས་བྱེད་འོས་པ་ལ་ཞེ་ས་བྱོས་ཤིག