ད་ཅི་སྨྲ། ཐུགས་རྗེ་རྒྱས་པར་ཐོབ་ཕྱིར་སྡིག་པ་ངེས་པར་གསོག་དགོས་སམ། ༢ དེ་ལྟར་མ་ཡིན། ང་ཚོ་སྡིག་པ་ལ་བརྟེན་ནས་ཤི་ཟིན་ན། ད་དེའི་ནང་ཅི་ལྟར་འཚོ་སྲིད། ༣ ང་ཚོ་ཡེ་ཤུ་མཱ་ཤི་ཀ་དང་གཅིག་ཏུ་གྱུར་བའི་ཁྲུས་གསོལ་ལེན་ཚད་ཀྱིས། ཁོང་གྲོངས་པའི་ངང་ལ་ལེན་པར་མི་ཤེས་སམ། ༤ ཁྲུས་གསོལ་དེའི་སྒོ་ནས་ང་ཚོ་ཁོང་དང་མཉམ་དུ་ཤི་ནས་དུར་དུ་བཅུག་པ་ཡིན་པས། མཱ་ཤི་ཀ་ནི་ཡབ་ཀྱི་མཐུས་གཤིན་པོའི་ནང་ནས་སྐུ་གསོན་པོར་བསླངས་པ་ལྟར། ང་ཚོས་མི་ཚེ་གསར་པ་བསྐྱང་དགོས། ༥ ཁོང་གྲོངས་པ་དང་མཚུངས་པར་ང་ཚོ་ཤི་ནས་ཁོང་དང་གཅིག་གྱུར་ན། སྐུ་གསོན་པོར་བཞེངས་པ་ལའང་གཅིག་གྱུར་འོང་། ༦-༧ ཤི་བ་དེ་སྡིག་པ་ལས་ཐར་བ་ཡིན་པས། ད་ཕྱིན་ཆད་སྡིག་པའི་གཡོག་མི་བྱེད་པ་དང་། སྡིག་ཅན་གྱི་ལུས་འདི་མེད་པར་བྱེད་དུ། ང་ཚོའི་གང་ཟག་རྙིང་པ་ཁོང་མཉམ་བརྐྱངས་པ་^*ཡིན་པ་ཤེས་སོ། ༨ ང་ཚོ་མཱ་ཤི་ཀ་དང་མཉམ་དུ་ཤི་བ་ཡིན་ན། ཁོང་མཉམ་འཚོ་བ་ལའང་ཡིད་ཆེས་སོ། ༩ མཱ་ཤི་ཀ་གཤིན་པོའི་ནང་ནས་སྐུ་གསོན་པོར་བཞེངས་ནས་འཆི་བའི་དབང་དུ་མེད་པས་སླར་མི་འགྲོང་ངོ་། ༡༠ ཁོང་སྡིག་པའི་ཕྱིར་ལན་ཅིག་གྲོངས་ཀྱང་། དཀོན་མཆོག་གི་ཕྱིར་གསོན་པོར་བཞུགས་པ་ང་ཚོས་ཤེས་སོ། ༡༡ དེ་བཞིན་དུ་ཁྱེད་ཀྱང་མཱ་ཤི་ཀ་ཡེ་ཤུའི་ངང་ན་སྡིག་པ་ལ་ལྟ་སྟེ་ཤི་མཁན་དང་། དཀོན་མཆོག་ལ་ལྟ་སྟེ་གསོན་པ་ཡིན་པར་རྩིས་ཤིག