མཚང་འབྲུ་མཁན་ཁྱོད་སུ་ཡིན་རུང་། ཁྱོད་ལའང་སྐྱོན་ཡོད། ཁྱོད་རང་གིས་ལས་དེ་རང་བྱེད་པས། གཞན་ལ་མཚང་འབྲུ་བའི་བྱ་བ་དེས་རང་ལའང་ཞལ་ཆེ་གཅོད་དོ། ༢ དེ་བཞིན་སྤྱོད་མཁན་ཚོར་དཀོན་མཆོག་གིས་ཞལ་ཆེ་དྲང་པོར་གཅད་པ་ང་ཚོས་ཤེས་སོ། ༣ རང་གིས་ལས་དེ་རང་སྤྱོད་ཅིང་གཞན་ལ་མཚང་འབྲུ་བ་ཁྱོད། དཀོན་མཆོག་གི་ཞལ་ཆེ་ལས་ཐར་འོང་སེམས་སམ། ༤ ཡང་ན་དཀོན་མཆོག་གི་ཐུགས་རྗེས་ཁྱོད་འགྱོད་ཚངས་ཀྱི་ཕྱོགས་སུ་འཁྲིད་པ་དེ་མི་ཤེས་པར། ཁོང་གི་ཐུགས་རྗེ་དང་། ཐུགས་བཟོད་དང་། ཐུགས་སྣ་རིང་བའི་ལོངས་སྤྱོད་ལ་བརྙས་སམ། ༥ ཁྱོད་ཀྱི་འགྱོད་པ་མི་སྐྱེ་བའི་སྙིང་གྱོང་པོས་དཀོན་མཆོག་གི་ཞལ་ཆེ་གཅོད་པའི་ཐུགས་ཁྲོའི་ཉིན་མོའི་ཕྱིར། ཁྱོད་རང་ལ་ཐུགས་ཁྲོ་སོག་པར་བྱེད་དོ། ༦ ཁོང་གིས་མི་རེ་རེ་ལ་དེའི་ལས་དང་བསྟུན་པའི་འབྲས་བུ་གནང་ཞིང་། ༧ ལས་བཟང་བསྒྲུབ་པར་ཡིད་བརྟན་ཅིང་། རྟག་པའི་དཔལ་དང་བཀུར་སྟི་འཚོལ་མཁན་ལ། ཚེ་མཐའ་མེད་པ་གནང་བར་འགྱུར་རོ། ༨ ཕྱོགས་རིས་བྱེད་མཁན་དང་བདེན་པར་མི་འཛིན་ཅིང་། མི་རིགས་པར་ཉན་མཁན་ལ། ཐུགས་ཁྲོ་དང་ཁྲོ་གཏུམ་འབབ་འོང་། ༩ མི་དགེ་བ་སྤྱོད་པ་དང་པོར་ཡ་ཧུ་དཱ་པ་དང་དེ་ནས་ཧེལ་ལེན་པ་ཐམས་ཅད་ལ་སྡུག་བསྔལ་དང་ཉོན་མོངས་འབབ་འོང་། ༡༠ དགེ་བ་སྤྱོད་པ་དང་པོར་ཡ་ཧུ་དཱ་པ་དང་དེ་ནས་ཧེལ་ལེན་པ་ཐམས་ཅད་ལ་དཔལ་དང་བཀུར་སྟི་དང་ཞི་བདེ་གནང་འོང་། ༡༡ དཀོན་མཆོག་ནི་ཕྱོགས་རིས་མེད་པ་ལགས་སོ། ༡༢ བཀའ་ཁྲིམས་མེད་པར་སྡིག་པ་བྱས་པ་ཚོ་བཀའ་ཁྲིམས་མེད་པས་སྟོངས་པར་འགྱུར། བཀའ་ཁྲིམས་ཡོད་དེ་སྡིག་པ་བྱས་པ་རྣམས་ལ་བཀའ་ཁྲིམས་ཀྱིས་ཞལ་ཆེ་གཅད་པར་འགྱུར། ༡༣ དཀོན་མཆོག་གི་དྲུང་དུ་བཀའ་ཁྲིམས་ཐོས་པ་ཚོ་མི་ཐར། བཀའ་ཁྲིམས་སྒྲུབ་པ་ཚོ་ཐར་རོ། ༡༤ ཕྱི་པ་ཚོས་རང་བཞིན་གྱིས་བཀའ་ཁྲིམས་ཀྱི་ལས་བྱེད་ཚེ། བཀའ་ཁྲིམས་ཀྱི་མདོ་མེད་ཀྱང་དེ་ཚོའི་ནང་བཀའ་ཁྲིམས་འདུག་གོ། ༡༥ དེ་ཚོའི་ཤེས་བཟང་^*གིས་དཔང་པོ་བྱེད་དེ། དེ་ཚོའི་བསམ་པས་སྐྱོན་ཡོད་མེད་འབྱེད་ཅིང་། བཀའ་ཁྲིམས་ནི་དེ་ཚོའི་སྙིང་ནང་བྲིས་ཡོད་པར་སྟོན་ནོ། ༡༦ ངས་འཆད་པའི་ཕྲིན་བཟང་ལྟར། དཀོན་མཆོག་གིས་ཡེ་ཤུ་མཱ་ཤི་ཀའི་ངང་ན། མིའི་གསང་བ་རྣམས་ཀྱི་ཞལ་ཆེ་གཅོད་པའི་ཉིན་མོར། དེ་དག་གསལ་བར་འགྱུར་རོ༎