༦ སྐུ་ཚབ་དང་རྒན་མི་རྣམས་དེའི་སྐོར་ལ་བསམ་བློ་བཏང་ཕྱིར་འཛོམས་ཏེ། ༧ རྩོད་གླེང་མང་པོ་བྱུང་ནས་པེ་ཏྲོ་བཞེངས་ཏེ་འདི་སྐད་དུ། སྤུན་རྣམས། སྔར་དཀོན་མཆོག་གིས་ཁྱེད་ཀྱི་ནང་ནས་འདམ་ཀ་མཛད་དེ། ཕྱི་པ་རྣམས་ལ་ངའི་ཁ་ནས་ཕྲིན་བཟང་ཐོས་པ་དང་དད་པ་བྱེད་པ་ཁྱེད་ཀྱིས་མཁྱེན་ནོ། ༨ མིའི་སྙིང་མཁྱེན་པའི་དཀོན་མཆོག་གིས། ང་ཚོ་དང་འདྲ་བར་དེ་ཚོར་ཡང་དམ་པའི་ཐུགས་ཉིད་གནང་ནས་དེ་ཚོ་འོས་པ་ཡིན་པའི་དཔང་པོ་མཛད་དོ། ༩ དེ་ཚོའི་དད་པའི་རྐྱེན་གྱིས་སྙིང་དག་པར་མཛད་དེ། ང་ཚོ་དང་ཁོང་ཚོའི་བར་ལ་ཁྱད་པར་ཅིའང་མ་མཛད་དོ། ༡༠ ད་ང་ཚོ་རང་དང་ང་ཚོའི་ཕ་མེས་ཀྱིས་ཀྱང་འཁུར་མ་བཏུབ་པའི་གཉའ་ཤིང་དེ་ཉེ་གནས་ཀྱི་གཉའ་བར་བཀལ་ནས་དཀོན་མཆོག་གི་ཐུགས་ཅི་ལ་སད། ༡༡ དེ་ཚོ་གཙོ་བོ་ཡེ་ཤུའི་ཐུགས་རྗེའི་སྒོ་ནས་ཐར་བར་འགྱུར་བ་ལྟར་ང་ཚོའང་ཐར་བར་ཡིད་ཆེས་སོ་ཞེས་གསུངས་པ་དང་། ༡༢ མི་ཚོགས་ཁ་རོག་བསྡད་ཅིང་། བར་ན་བཱ་དང་པའུ་ལུས་དཀོན་མཆོག་གིས་ཕྱི་པའི་དཀྱིལ་དུ་ཁོང་གི་སྒོ་ནས་མཛད་པའི་ལྟས་དང་ངོ་མཚར་ཆེ་བའི་ཕྲིན་ལས་བཤད་པ་ལ་ཉན་ཏོ། ༡༣ དེ་གཉིས་ཀྱིས་བཤད་ཟིན་པ་དང་། ཡ་ཀོབ་ཀྱིས་འདི་སྐད་དུ། སྤུན་རྣམས་ང་ལ་གསོན་ཞིག ༡༤ དཀོན་མཆོག་གིས་ཉིད་ཀྱི་ཕྱིར་ཕྱི་པའི་ནང་ནས་མི་སྡེ་ཞིག་བཞེས་ཕྱིར་དང་པོ་དེ་རྣམས་ལ་ཐུགས་རྗེས་ཇི་ལྟར་གཟིགས་པ་ཤི་མོན་གྱིས་བཤད་དོ། ༡༥ ལུང་སྟོན་པ་རྣམས་ཀྱི་གསུང་ཡང་འདི་དང་མཐུན་ཏེ་འདི་སྐད་དུ།

༢༢ སྐུ་ཚབ་དང་རྒན་མི་དང་ཆོས་ཚོགས་དང་བཅས་པས་དེ་རྣམས་ཀྱི་ནང་ནས་ཁ་ཤས་འདམས་ཏེ་པའུ་ལུ་དང་བར་ན་བཱ་མཉམ་དུ་ཨན་ཏི་ཡོག་ཏུ་གཏོང་བར་རིགས་སོ་དགོངས་ནས། སྤུན་གྱི་ནང་ན་གཙོ་ཆེ་ཡིན་པའི་བར་ས་བཱ་བྱ་བའི་ཡུ་དཱ་དང་སི་ལཱ་གཉིས་ལ་གཤམ་གསལ་གྱི་ཡི་གེ་བཅས་བཏང་ངོ་། ༢༣ ཨན་ཏི་ཡོག་དང་། སི་རི་ཡཱ་དང་། ཀི་ལིག་ཏུ་གནས་པའི་ལྷ་ཆོས་པ་ནས་ཡིན་པའི་སྤུན་རྣམས་ལ། སྐུ་ཚབ་དང་རྒན་མིས་ཕྱག་ཕུལ་ལོ། ༢༤ ང་ཚོའི་བསླབ་བྱ་མེད་པར་ང་ཚོ་ནས་ཁ་ཅིག་གིས། ཐེ་ཚོམ་སྐྱེད་པའི་ཚིག་སྨྲས་ནས། ཁྱེད་ཀྱི་སེམས་དཀྲུག་པའི་གཏམ་ཐོས་པས། ༢༥-༢༦ ཚོགས་འདུས་ཀྱིས་མི་རེ་འདམས་ནས། ང་ཚོའི་གཙོ་བོ་ཡེ་ཤུ་མཱ་ཤི་ཀའི་ཕྱིར་རང་གི་སྲོག་གཏོང་བའི་ང་ཚོའི་གཅེས་པའི་བར་ན་བཱ་དང་པའུ་ལུ་མཉམ་དུ་ཁྱེད་ཀྱི་རྩར་གཏོང་བར་རིགས་སོ་ཞེས་དགོངས་སོ། ༢༧ དེའི་ཕྱིར་ཡུ་དཱ་དང་སི་ལཱ་གཉིས་གཏང་སྟེ། དེ་གཉིས་ཀྱིས་ངག་གི་སྒོ་ནས་ཀྱང་འདི་བཞིན་འཆད་འོང་། ༢༨ དམ་པའི་ཐུགས་ཉིད་དང་ང་ཚོས་གལ་ཆེ་བ་འདི་ཚོ་ལས་ལྷག་པ་ཁྱེད་ལ་ཁུར་འགེལ་བར་མི་རིགས་པར་དགོངས་ཤིང་། ༢༩ ཁྲག་དང་། དབུགས་བསུབས་པའི་ཤ་དང་། སྐུ་འདྲ་ལ་ཕུལ་བའི་ཤ་རྫས་དང་། ལོག་གཡེམ་སྤོངས་ཤིག དེ་ཚོར་འཛེམ་ན་ལེགས་པར་བྱེད་དོ། བདེ་བར་གྱུར་ཅིག

༣༠ དེ་ཚོ་བཏང་ནས་ཨན་ཏི་ཡོག་ཏུ་བསླེབས་ཤིང་། ཆོས་ཚོགས་བསྡུས་ཏེ་ཡི་གེ་དེ་བཏད་དོ། ༣༡ དེ་བཀླགས་པས་དེ་ཚོ་གདམས་ངག་དེ་ལ་དགའ་བར་གྱུར་ཏོ། ༣༢ ཡུ་དཱ་དང་སི་ལཱ་ནི་ཆོས་འཆད་མཁན་ཡང་ཡིན་པས། སྤུན་རྣམས་ལ་གདམས་ངག་མང་པོ་སྟོན་ཞིང་བརྟན་པར་བྱས་སོ། ༣༣ དེ་གཉིས་རེ་ཞིག་དེར་བཞུགས་མཐར། ཁོང་བཏང་བ་ཚོའི་དྲུང་དུ་སྤུན་ཚོས་ཞི་བདེ་བར་ཕྱིར་ལོག་བཏང་ངོ་། ༣༤ ༼གནའ་བོའི་བཤུས་ཡིག་ལ་ལར་ཚིག་བཅད་འདི་མེད་པ་ཡིན།༽ ༣༥ པའུ་ལུ་དང་བར་ན་བཱ་་ཨན་ཏི་ཡོག་ཏུ་བཞུགས་ནས། གཞན་མང་པོ་དང་བཅས་པས་གཙོ་བོའི་བཀའ་སྒྲོག་ཅིང་བཤད་དོ༎

༣༦ ཞག་ཁ་ཅིག་སོང་བ་དང་པའུ་ལུས་བར་ན་བཱ་ལ། གཙོ་བོའི་བཀའ་བཤད་པའི་གྲོང་ཁྱེར་ཀུན་ཏུ་སོང་ནས། སྤུན་རྣམས་ཇི་ལྟར་ཡོད་པ་བལྟའོ་གསུངས་པ་དང་། ༣༧ བར་ན་བཱས་མར་ཀུ་བྱ་བའི་ཡོ་ཧ་ནན་མཉམ་དུ་འཁྲིད་པར་དགོངས་ཀྱང་། ༣༨ པའུ་ལུས་ཁོ་ཕམ་ཕིལ་ཡཱ་རུ་བརྒྱབ་ལོག་ཅིང་ཁོང་མཉམ་ལས་བྱེད་དུ་མ་སོང་བས་ཁོ་འཁྲིད་པར་མི་རིགས་སོ་དགོངས་ཏེ། ༣༩ ཁོང་གཉིས་ནང་མི་མཐུན་པས་རྩོད་གླེང་དྲག་པོ་བྱུང་ནས་སོ་སོར་གྱེས་ཤིང་། བར་ན་བཱས་མར་ཀུ་འཁྲིད་དེ་སིབ་རུས་ལ་ཆུ་ཐོག་ཏུ་ཕེབས། ༤༠ པའུ་ལུས་སི་ལཱ་འདམས་སོ། སྤུན་ཚོས་འདི་གཉིས་གཙོ་བོའི་ཐུགས་རྗེ་ལ་བཅོལ་ཞིང་ཐེགས་ཏེ། ༤༡ སི་རི་ཡཱ་དང་ཀི་ལིག་རྒྱུད་དེ་ཆོས་ཚོགས་བརྟན་པོ་བྱེད་ཅིང་ཕེབས་སོ༎