༩ མེས་པོ་དེ་ཚོས་ཕྲག་དོག་གིས་ཡོ་སེབ་་མི་སེར་ཡུལ་དུ་བཙོངས་ཀྱང་། ཁོང་མཉམ་དཀོན་མཆོག་བཞུགས་པས། ༡༠ སྡུག་བསྔལ་ཐམས་ཅད་ལས་སྐྱབས་ཏེ། མི་སེར་ཡུལ་གྱི་རྒྱལ་པོའི་དྲུང་དུ་ཐུགས་རྗེ་དང་ཤེས་རབ་གནང་བས། རྒྱལ་པོས་ཁོང་མི་སེར་ཡུལ་དང་ཕོ་བྲང་ལ་གཏོགས་པ་ཐམས་ཅད་ཀྱི་གོང་དུ་སྤྱི་ཁྱབ་ལ་བསྐོས་སོ། ༡༡ དེ་ནས་མི་སེར་དང་ཀ་ན་ཨན་ཡུལ་ཐམས་ཅད་ལ་མུ་གེ་དང་སྡུག་བསྔལ་ཆེན་པོ་བྱུང་སྟེ། ང་ཚོའི་ཕ་མེས་ལ་ཟ་རྒྱུ་མ་ཐོབ་བོ། ༡༢ ཡ་ཀོབ་ཀྱིས་མི་སེར་ན་འབྲུ་ཡོད་པ་ཐོས་ནས། ང་ཚོའི་མེས་པོ་རྣམས་ཐེངས་དང་པོར་དེར་བཏང་ངོ་། ༡༣ འགྲོ་རེས་གཉིས་པར་ཡོ་སེབ་ཀྱིས་སྤུན་ཚོར་རང་སུ་ཡིན་བཤད་དེ། རྒྱལ་པོས་ཡོ་སེབ་ཀྱི་རིགས་བརྒྱུད་གང་ཡིན་པ་ཤེས་སོ། ༡༤ ཡོ་སེབ་ཀྱིས་རང་གི་ཕ་ཡ་ཀོབ་དང་གཉེན་བཤེས་ཐམས་ཅད་བཅས་མི་གྲངས་བདུན་ཅུ་དོན་ལྔར་འབོད་མི་བཏང་ངོ་། ༡༥ ཡ་ཀོབ་་མི་སེར་དུ་ཕྱིན་ནས། དེར་ཁོང་རང་དང་ང་ཚོའི་ཕ་མེས་ཚེ་འདས་ནས། ༡༦ དེ་ཚོའི་སྤུར་སི་ཀེམ་དུ་ཁྱེར་ཏེ། ཨབ་ར་ཧམ་གྱིས་ཧ་མོར་གྱི་བུ་ཚོ་ལས་དངུལ་བཅལ་ནས་ཉོས་པའི་བང་སོའི་ནང་བཅུག་གོ།

༡༧ དཀོན་མཆོག་གིས་ཨབ་ར་ཧམ་ལ་ཞལ་གྱིས་བཞེས་པའི་དུས་ཉེ་བ་ན། མི་སེར་དུ་མི་སྡེ་འཕེལ་ཞིང་རྒྱས་སོ། ༡༨ དེ་ནས་ཡོ་སེབ་ཀྱི་རྒྱུས་མེད་པའི་རྒྱལ་པོ་ཞིག་འབྱུང་སྟེ། ༡༩ ང་ཚོའི་མི་བརྒྱུད་ལ་གཡོ་སྒྱུ་བྱས་ཏེ། ཕ་མེས་ལ་ཕྲུ་གུ་རྣམས་མི་གསོན་པའི་ཕྱིར་དབྱུག་དགོས་པར་ཐུག་པའི་བར་ངན་བྱས་སོ། ༢༠ དེའི་དུས་སུ་མོ་ཤེ་སྐྱེས་ནས་ཤིན་ཏུ་མཛེས་པ་ཞིག་ཡོད་དེ། ཟླ་བ་གསུམ་གྱི་བར་དུ་ཕའི་ཁང་པར་གསོས་པའི་རྗེས་སུ། ༢༡ དབྱུགས་ནས་རྒྱལ་པོའི་བུ་མོས་བླངས་ཏེ་རང་གི་བུ་ལྟར་གསོས་སོ། ༢༢ མོ་ཤེས་མི་སེར་གྱི་རིག་གནས་ཐམས་ཅད་བསླབས་ཏེ། ངག་དང་ལས་གཉིས་སྟོབས་ཅན་དུ་གྱུར་ཏོ༎

༢༣ ལོ་བཞི་བཅུ་ཙམ་ལོན་པ་དང་། རང་གི་སྤུན་ཨིས་ར་ཨེལ་པ་རྣམས་ཀྱི་གནས་ཚུལ་བལྟའོ་སྙམ་སྟེ། ༢༤ གཅིག་ལ་ངན་བྱེད་པར་མཐོང་བས། དེ་སྐྱབས་ཏེ་གནོད་ལན་དུ་མི་སེར་པ་དེ་བསད་དོ། ༢༥ ད་དཀོན་མཆོག་གིས་ང་རྒྱུད་ནས་དེ་ཚོ་སྐྱོབ་པར་དེ་ཚོས་གོ་འོང་བསམས་ཀྱང་དེ་ཚོས་མ་གོའོ། ༢༦ དེའི་ཕྱི་ཉིན་ཁོང་དེ་ཚོའི་ནང་ནས་ཕན་ཚུན་འཐབ་ཅིང་ཡོད་པ་གཉིས་ཀྱི་རྩར་བསླེབས་ཏེ། ནང་སྒྲིག་བྱེད་པར་འདོད་ཅིང་། སྐྱེ་བོ་ཁྱེད་སྤུན་ཡིན་པར་ཕན་ཚུན་ཅི་ལ་ངན་བྱེད་སྨྲས་སོ། ༢༧ ཁྱིམ་མཚེས་ལ་ངན་བྱེད་མཁན་དེས་ཁོང་ཕར་འཕུལ་ནས། ཁྱོད་ང་ཚོའི་དཔོན་པོ་དང་ཁྲིམས་དཔོན་དུ་སུས་བསྐོས་བྱུང་། ༢༨ ཁྱོད་ཀྱིས་མདང་མི་སེར་པ་དེ་བསད་པ་ལྟར་ངའང་གསོད་པར་འདོད་དམ་སྨྲས་པ་དང་། ༢༩ གཏམ་དེ་ཐོས་ནས་མོ་ཤེ་བྲོས་ཏེ། མིད་ཨན་ཡུལ་དུ་འཁྱམ་ཞིང་དེར་བུ་གཉིས་ཀྱི་ཕར་གྱུར་ཏོ༎

༣༠ དེ་ནས་ལོ་བཞི་བཅུ་ཚང་བ་དང་། རི་སི་ནཱའི་འབྲོག་སྟོང་ན་ཚེར་མ་འབར་བའི་མེ་ལྕེའི་ནང་ན་ཕོ་ཉ་ཞིག་སྣང་བྱུང་ངོ་། ༣༡ མོ་ཤེས་དེ་མཐོང་ནས་མཐོང་སྣང་དེ་ལ་ངོ་མཚར་དུ་གྱུར་ཏེ། བལྟ་ཕྱིར་ཉེ་བར་སོང་བས། གཙོ་བོའི་གསུང་སྐད་བྱུང་སྟེ། ༣༢ ང་ནི་ཁྱོད་ཀྱི་ཕ་མེས་ཨབ་ར་ཧམ་དང་། ཨི་སཱག་དང་། ཡ་ཀོབ་ཀྱི་དཀོན་མཆོག་ཡིན་གསུངས་པ་དང་། མོ་ཤེ་འདར་ཞིང་ལྟ་བར་མ་སྤོབས་སོ། ༣༣ གཙོ་བོས། ཁྱོད་འགྲེང་བའི་གནས་འདི་ནི་དམ་པ་ཡིན་པས། རྐང་པ་ནས་ལྷམ་ཕུད་ཅིག ༣༤ མི་སེར་དུ་ཡོད་པའི་ངའི་མི་སྡེའི་སྡུག་བསྔལ་ངས་ངེས་པར་གཟིགས་ཏེ། དེའི་སྡུག་བསྔལ་གྱི་སྐད་ཀྱང་གསན་ནས། དེ་ཐར་བར་བྱེད་དུ་ང་མར་བབས་པས། ད་ཤོག་ལ་ངས་ཁྱོད་མི་སེར་ཡུལ་དུ་རྫོང་བར་བྱའོ་གསུངས་སོ། ༣༥ ཁྱོད་དཔོན་པོ་དང་ཁྲིམས་དཔོན་དུ་སུས་བསྐོས་ཟེར་ཞིང་སྤངས་པའི་མོ་ཤེ་དེ། ཚེར་མའི་ནང་སྣང་བའི་ཕོ་ཉའི་སྒོ་ནས་དཀོན་མཆོག་གིས་དཔོན་པོ་དང་མགོན་དུ་བརྫངས་སོ། ༣༦ ཁོང་གིས་དེ་ཚོ་ཕྱུངས་ནས། མི་སེར་དང་། རྒྱ་མཚོ་དམར་པོ་དང་། འབྲོག་སྟོང་ནང་ལོ་བཞི་བཅུ་ངོ་མཚར་ཆེ་བའི་ལས་དང་ལྟས་བསྟན་ཏོ། ༣༧ དཀོན་མཆོག་གིས་ཁྱེད་ཚོའི་དོན་དུ་ཁྱེད་ཚོའི་སྤུན་གྱི་ནང་ནས་ང་ལྟར་ལུང་སྟོན་པ་ཞིག་འདོན་པར་འགྱུར་ཞེས་ཨིས་ར་ཨེལ་པ་ལ་གསུང་མཁན་མོ་ཤེ་ཁོང་ཉིད་ཡིན་ནོ། ༣༨ རི་སི་ནཱ་རུ་གསུང་གླེང་མཛད་པའི་ཕོ་ཉ་དང་བཅས་འབྲོག་སྟོང་གི་ཆོས་ཚོགས་ནང་ཕ་མེས་མཉམ་བཞུགས་ཤིང་། ང་ཚོར་གནང་ཕྱིར་གསོན་པོའི་བཀའ་ཐོབ་པ་ཁོང་ཉིད་ཡིན་ནོ། ༣༩ འོན་ཀྱང་ང་ཚོའི་ཕ་མེས་ཁོང་ལ་ཉན་པར་མ་དགའ་བས། ཁོང་ཟུར་དུ་བཞག་ནས་སྙིང་ནང་མི་སེར་ཡུལ་ལ་ལོག་འདོད་ཅིང་། ༤༠ ཨ་རོན་ལ། ང་ཚོའི་གདོང་དུ་འགྲོ་བའི་ལྷ་སྐུ་བཟོ་བར་མཛོད་ཅིག ང་ཚོ་མི་སེར་ནས་ཁྲིད་པའི་མོ་ཤེ་དེ་ལ་ཅི་བྱུང་བ་མི་ཤེས་སོ་ཞུས་སོ། ༤༡ དེའི་དུས་སུ་གླང་བུ་ཞིག་གི་སྐུ་འདྲ་བཟོས་ནས། དེ་ལ་མཆོད་པ་ཕུལ་ཞིང་། རང་གི་ལག་པའི་ལས་ལ་ཡི་རངས་སོ། ༤༢ ལུང་བསྟན་གྱི་མདོ་ལས།

༥༤ འདུན་མི་རྣམས་ཀྱིས་དེ་ཐོས་ནས་སྙིང་ལ་འཕོགས་ཏེ་སོ་ཁྲིག་ཁྲིག་བྱས་སོ། ༥༥ སེ་ཏེ་ཕན་ནི་དམ་པའི་ཐུགས་ཉིད་ཀྱིས་ཁྱབ་སྟེ། ནམ་མཁར་སྤྱན་ཕུར་ཚུགས་སུ་གཟིགས་ནས། དཀོན་མཆོག་གི་གཟི་བརྗིད་དང་། དཀོན་མཆོག་གི་ཕྱག་གཡས་སུ་ཡེ་ཤུ་བཞེངས་པ་མཇལ་བ་དང་། ༥༦ ལྟོས་ཤིག ནམ་མཁའ་བྱེ་སྟེ། དཀོན་མཆོག་གི་ཕྱག་གཡས་སུ་མིའི་བུ་བཞེངས་པ་མཇལ་ལོ་གསུངས་ཀྱང་། ༥༧ དེ་ཚོས་ཀུ་སྒྲ་བརྒྱབས་ནས་རྣ་བ་བཀག་སྟེ་ལྷན་ཅིག་ཏུ་ཁོང་ལ་རུབ་བོ། ༥༨ དེ་ནས་གྲོང་ཁྱེར་གྱི་ཕྱི་རོལ་དུ་བཏོན་ཏེ། ཁོང་རྡོ་རུབ་ལ་བཏང་ངོ་། རྩོད་པ་པོ་རྣམས་ཀྱིས་རང་གི་གོས་ཕུད་ནས། ཤ་ཨུལ་ཟེར་བའི་གཞོན་ནུ་ཞིག་གི་མདུན་དུ་བཞག་གོ། ༥༩ རྡོ་རུབ་ལ་གཏོང་བའི་ཚེ་སེ་ཏེ་ཕན་གྱིས་སྨོན་ལམ་འདེབས་ཤིང་། གཙོ་བོ་ཡེ་ཤུ། ངའི་སེམས་ཉིད་བཞེས་སུ་གསོལ་ཅེས་ཞུས་སོ། ༦༠ དེ་ནས་པུས་མོ་བཙུགས་ནས་སྐད་ཆེན་པོས། ཀྱེ་གཙོ་བོ། སྡིག་པ་འདིའི་ལན་དེ་རྣམས་ནས་ལེན་པར་མ་མཛད་ཅེས་ཞུས་ནས་སྐུ་གཤེགས་སོ། ཁོང་བཀྲོང་བ་ལ་ཤ་ཨུལ་ཁ་འཆམ་པ་ཡིན་ནོ༎