༧ དཀོན་མཆོག་གི་བཀའ་དར་ནས། ཡེ་རུ་ཤ་ལེམ་དུ་ཉེ་གནས་ཀྱི་གྲངས་ཤིན་ཏུ་འཕེལ་ཏེ། བླ་མ་མང་པོའང་དད་པ་འདིའི་བཀའ་འབངས་སུ་གྱུར་ཏོ༎

༨ སེ་ཏེ་ཕན་ལ་ཐུགས་རྗེ་དང་མཐུ་སྟོབས་ཀྱིས་གང་སྟེ་མི་སྡེའི་ནང་དུ་ངོ་མཚར་ཆེ་བའི་ལས་དང་ལྟས་བསྟན་ཏོ། ༩ ལི་བེར་ཏིན་དང་། ཀི་རེ་ནེ་དང་། ཨ་ལེག་སན་དྲི་ཡཱ་དང་། ཀི་ལིག་དང་། ཨ་སི་ཨ་པའི་འདུ་ཁང་ལ་གཏོགས་པ་ཁ་ཤས་ལངས་ནས་སེ་ཏེ་ཕན་དང་རྩོད་པ་བྱས་ནས། ༡༠ སེ་ཏེ་ཕན་གྱིས་ཤེས་རབ་དང་ཐུགས་ཉིད་ཀྱི་ངང་ནས་གསུངས་པར་ཁ་ཡ་མ་ཐུབ་པས། ༡༡ མི་འདིས་མོ་ཤེ་དང་དཀོན་མཆོག་ལ་སྐུར་པ་བཏབ་པ་ང་ཚོས་ཐོས་སོ་ཞེས་སྨྲ་བར་དེ་ཚོས་མི་ཁ་ཅིག་ལ་བསླབས་སོ། ༡༢ ཡང་དེ་ཚོས་ཡུལ་མི་དང་། རྒན་མི་དང་། མཁན་པོ་རྣམས་དཀྲུགས་ནས། ཁོང་གི་ཐོག་ཏུ་འོངས་ཏེ་བཟུང་ནས་གྲོས་འདུན་པའི་དྲུང་དུ་ཁྲིད་དེ། ༡༣-༡༤ རྫུན་གྱི་དཔང་པོར་ལངས་ཏེ་འདི་སྐད་དུ། མི་འདིས་ན་ཙཱ་རེད་པ་ཡེ་ཤུས་གནས་འདི་བཤིག་ནས་མོ་ཤེས་ང་ཚོར་བཏད་པའི་སྲོལ་རྣམས་སྒྱུར་བར་བྱའོ། ཟེར་བ་ང་ཚོས་ཐོས་ཤིང་། གནས་དམ་པ་འདི་དང་བཀའ་ཁྲིམས་ལ་རྒྱུན་ཆད་མེད་པར་སྐུར་པ་འདེབས་སོ་ཞེས་སྨྲས་པ་དང་། ༡༥ འདུན་སར་ཚོགས་པ་ཐམས་ཅད་ཀྱིས་སེ་ཏེ་ཕན་ལ་མིག་ཕུར་ཚུགས་སུ་བལྟས་པ་ལས། ཁོང་གི་ཞལ་རས་ནི་ཕོ་ཉའི་ཞལ་རས་དང་འདྲ་བ་ཡོད་པ་མཐོང་ངོ་༎