ཁྱེད་ཀྱི་སྙིང་མ་འཁྲུག་ཅིག དཀོན་མཆོག་ལ་དད་ཅིང་། ང་ལའང་དད་པར་བྱོས་ཤིག ༢ ངའི་ཡབ་ཀྱི་ཕོ་བྲང་ནང་ཁང་བཟང་མང་པོ་ཡོད། དེ་མིན་ང་ཁྱེད་ཕྱིར་འདུག་སའི་གྲལ་བྱེད་དུ་འགྲོའོ་མི་ཟེར། ༣ ང་སོང་སྟེ་ཁྱེད་ཀྱི་ཕྱིར་འདུག་ས་བཤམ་པའི་རྗེས་སུ། ང་ཡོད་སར་ཁྱེད་ཀྱང་བསླེབས་པའི་ཕྱིར། ང་ལོག་འོང་སྟེ་ཁྱེད་ངའི་རྩར་འཁྲིད་འོང་། ༤ ང་འགྲོ་སའི་ལམ་ཁྱེད་ཀྱིས་ཤེས་སོ་གསུངས་སོ། ༥ ཐོ་མཱས་ཁོང་ལ་གཙོ་བོ། ཁྱེད་གང་དུ་ཕེབས་པ་མི་ཤེས་པས། ལམ་ཇི་ལྟར་དུ་ཤེས་ཞུས་པས། ༦ ཡེ་ཤུས་ང་ནི་ལམ་དང་། བདེན་པ་ཉིད་དང་། སྲོག་དེ་ཡིན། ང་མ་རྒྱུད་པར་སུའང་ཡབ་ཀྱི་དྲུང་དུ་མི་བསླེབ། ༧ ཁྱེད་ཀྱིས་ང་ཤེས་ན་ངའི་ཡབ་ཀྱང་ཤེས། ད་ནས་ཕྱིན་ཁོང་མཇལ་བས་ཤེས་སོ་གསུངས་པས། ༨ ཕི་ལིབ་ཀྱིས། གཙོ་བོ། ང་ཚོར་ཡབ་སྟོན་པར་མཛོད་ཅིག་དང་། ང་ཚོ་ཚིམ་པར་འགྱུར་རོ་ཞུས་སོ། ༩ ཡེ་ཤུས། ཕི་ལིབ། ང་ཁྱོད་མཉམ་འདི་ཙམ་བསྡད་ཀྱང་ད་དུང་ང་མ་ཤེས་སམ། ང་མཐོང་མཁན་དེས་ཡབ་མཇལ་བས། ཁྱོད་ཀྱིས་ཡབ་སྟོན་ཅི་ལ་ཟེར། ༡༠ ང་ཡབ་ཀྱི་ནང་ཡོད་དེ་ཡབ་ངའི་ནང་བཞུགས་པར་ཁྱོད་དད་པ་མི་བྱེད་དམ། ངས་འཆད་པའི་བཀའ་ངའི་ཕྱོགས་ནས་མིན། ངའི་ནང་བཞུགས་པའི་ཡབ་ཀྱིས་ཉིད་ཀྱི་ཕྲིན་ལས་མཛད་དོ། ༡༡ ང་ཡབ་ནང་དང་ཡབ་ངའི་ནང་བཞུགས་སོ་ཞེས་ངས་ཟེར་བ་ལ་དད་པ་བྱོས་ཤིག ༡༢ ང་ཡབ་ཀྱི་དྲུང་དུ་འགྲོ་བས། ང་ལ་དད་པ་དེས་ངས་བྱས་པའི་ལས་བྱེད་པ་མ་ཟད། དེ་ལས་ཆེ་བའང་བྱེད་པར་འགྱུར། ༡༣ ཡབ་ལ་སྲས་ཀྱི་སྒོ་ནས་དཔལ་འབྱུང་བའི་དོན་དུ། ཁྱོད་ཀྱིས་ངའི་མིང་བརྗོད་ཅིང་ཞུ་བ་དེ་ངས་སྒྲུབ་འོང་། ༡༤ ངའི་མིང་བརྗོད་ཅིང་ང་ལ་ཅི་ཞུ་ནའང་། ངས་དེ་སྒྲུབ་པར་བྱའོ༎