དུས་ཆེན་པེ་སག་གི་སྔོན་དུ། ཡེ་ཤུས་འཇིག་རྟེན་འདི་ནས་ཡབ་ཀྱི་དྲུང་དུ་གཤེགས་པའི་དུས་ལ་བབས་པ་མཁྱེན་ཞིང་། འཇིག་རྟེན་འདི་ན་ཁོང་གི་གང་ཡིན་པ་རྣམས་ལ་སྔར་ཡང་བྱམས་ཤིང་། དུས་མཐའ་མའི་བར་དུ་ཡང་བྱམས་པར་མཛད་དོ། ༢ ཤི་མོན་གྱི་བུ་ཀར་ཡོད་པ་ཡུ་དཱའི་སྙིང་ནང་། བདུད་ཀྱིས་ཁོང་དགྲར་གཏད་པའི་བསམ་པ་སྐྱེད་དོ། ༣ ཡེ་ཤུས་ཡབ་ཀྱིས་ཐམས་ཅད་ཁོང་ལ་བཏད་པ་དང་། ཁོང་ཉིད་དཀོན་མཆོག་ནས་བྱུང་སྟེ། དཀོན་མཆོག་གི་དྲུང་དུ་འཕགས་པར་མཁྱེན་ཏེ། གསོལ་བ་བཞེས་པའི་ཚེ། ༤ གྲལ་ནས་བཞེངས་ཤིང་། ན་བཟའ་ཕུད་དེ། ལག་ཕྱིས་སྐུ་རྐེད་ལ་དཀྲིས་ཤིང་། ༥ གཞོང་པའི་ནང་ཆུ་བླུགས་ནས། ཉེ་གནས་རྣམས་ཀྱི་རྐང་པ་འཁྲུད་ཅིང་། དཀྲིས་ཡོད་པའི་ལག་ཕྱིས་ཀྱིས་འཕྱིས་སོ། ༦ ཤི་མོན་པེ་ཏྲོའི་རྩར་ཕེབས་པ་དང་། དེས་གཙོ་བོ་ཁྱེད་ཀྱིས་ངའི་རྐང་པ་བཀྲུའམ་ཞུས་པས། ༧ ཡེ་ཤུས། ངས་བྱེད་པ་འདི་ཁྱོད་ཀྱིས་ད་ལྟ་མི་གོ་ཡང་། རྗེས་སུ་གོ་འོང་གསུངས་སོ། ༨ པེ་ཏྲོས། ཁྱེད་ཀྱིས་ངའི་རྐང་པ་བཀྲུ་བ་ནམ་ཡང་མི་རིགས་སོ། ཞུས་པས། ཡེ་ཤུས། ངས་ཁྱོད་མི་བཀྲུ་ན། ཁྱོད་ལ་ང་དང་མཉམ་འབྲེལ་བ་མེད་གསུངས་སོ། ༩ ཤི་མོན་པེ་ཏྲོས། གཙོ་བོ། ངའི་རྐང་པ་མ་ཟད་མགོ་ལག་ཀྱང་འཁྲུད་པར་མཛོད་ཞུས་སོ། ༡༠ ཡེ་ཤུས། ཁྲུས་བྱས་པས་ལུས་མི་དག་པ་མེད་པས་རྐང་པ་མ་གཏོགས་འཁྲུད་དགོས་མེད། ཁྱོད་དག་པ་ཡིན། འོན་ཀྱང་ཐམས་ཅད་ནི་དག་པ་མིན་གསུངས་སོ། ༡༡ ཁོང་དགྲར་གཏད་མཁན་དེ་མཁྱེན་པས། ཐམས་ཅད་ནི་དག་པ་མིན་གསུངས་སོ༎