མིར་ཡམ་དང་དེའི་ཨ་ཆེ་མར་ཐཱའི་ཡུལ་ཚོ་བེད་ཨན་ཡཱ་པ་ལཱ་ཟར་བྱ་བ་ན་བར་གྱུར་ཏོ། ༢ ན་བའི་ལཱ་ཟར་ནི། གཙོ་བོ་ལ་སྤོས་ཆུ་བྱུགས་ནས། ཁོང་གི་ཞབས་སྐྲས་ཕྱིས་པའི་མིར་ཡམ་གྱི་མིང་པོ་ཡིན་པས། ༣ སྲིང་མོ་གཉིས་ཀྱིས། གཙོ་བོ། ཁྱེད་ཀྱི་གཅེས་པའི་ལཱ་ཟར་ནའོ་ཞེས་ཞུ་ལོན་ཕུལ་ཏོ། ༤ ཡེ་ཤུས་དེ་གསན་ནས། ནད་འདི་འཆི་བའི་རྒྱུ་མ་ཡིན། དཀོན་མཆོག་གི་དཔལ་གྱི་ཕྱིར་དུ་ཡིན། དེའི་སྒོ་ནས་དཀོན་མཆོག་གི་སྲས་ལ་དཔལ་འབྱུང་ངོ་གསུངས་སོ། ༥ ཡེ་ཤུས་མར་ཐཱ་དང་དེའི་ནུ་མོ་དང་ལཱ་ཟར་ལ་བྱམས་པར་མཛད་དོ། ༦ ཁོ་ན་བ་གསན་ཀྱང་། ཁོང་བཞུགས་ཡོད་ས་དེར་ད་དུང་ཞག་གཉིས་བཞུགས་སོ། ༧ དེའི་རྗེས་སུ་ཉེ་གནས་རྣམས་ལ། སླར་ཡ་ཧུ་དཱ་ཡུལ་ལ་འགྲོའོ་གསུངས་ནས། ༨ དེ་ཚོས། སྟོན་པ། ཁ་སང་རང་ཡ་ཧུ་དཱ་པ་རྣམས་ཀྱིས་ཁྱེད་རྡོ་རུབ་ལ་གཏོང་བར་བརྩམས་ཀྱང་། དེར་སླར་ཕེབས་སམ་ཞུས་པས། ༩ བཀའ་ལན་དུ། ཉིན་མོ་གཅིག་ལ་ཆུ་ཚོད་བཅུ་གཉིས་མེད་དམ། ཉིན་མོ་ལ་འགྲུལ་བ་དེ། འཇིག་རྟེན་གྱི་འོད་མཐོང་བས། རྐང་པ་མི་འཁད་དོ། ༡༠ མཚན་མོར་འགྲུལ་བ་དེའི་ནང་ན་འོད་མེད་པས། རྐང་པ་འཁད་དོ། ༡༡ ཞེས་དང་། ང་ཚོའི་མཛའ་བོ་ལཱ་ཟར་གཉིད་ལ་སོང་ཡང་། ང་ཁོའི་གཉིད་སད་དུ་འགྲོའོ། གསུངས་པས། ༡༢ ཉེ་གནས་ཚོས། གཙོ་བོ། ཁོ་གཉིད་ལ་སོང་ཡོད་ན་ཕན་འོང་ཞུས་སོ། ༡༣ ཡེ་ཤུས་ཁོ་ཤི་བའི་སྐོར་དུ་གསུངས་ཀྱང་། དེ་ཚོས་ངལ་གསོའི་གཉིད་ཡིན་བསམས་པས། ༡༤ ཡེ་ཤུས་དེ་ཚོར་གསལ་པོར། ལཱ་ཟར་ཤིའོ། ༡༥ ཁྱེད་ཀྱིས་དད་པའི་ཕྱིར། ཁྱེད་ལ་ལྟ་སྟེ། ང་སྔོན་དུ་དེར་མེད་པས་དགའ་འོ། ད་ཤོག དེའི་རྩར་འགྲོའོ་གསུངས་པས། ༡༦ ཉེ་གནས་མཚེ་མའམ་ཐོ་མཱས་ཉེ་གནས་གཞན་རྣམས་ལ། ཁོང་དང་མཉམ་དུ་འཆི་བར་ང་ཚོའང་འགྲོའོ་སྨྲས་སོ༎