དེའི་འོག་ཏུ་ཡེ་ཤུ་ཏི་བེར་ཡཱའི་མཚོ་བྱ་བའི་ག་ལིལ་མཚོའི་ཕ་རོལ་དུ་གཤེགས་པ་དང་། ༢ མི་ཚོགས་ཀྱིས་ནད་པ་རྣམས་ལ་མཛད་པའི་ལྟས་མཐོང་ནས། ཁོང་གི་ཕྱི་བཞིན་འབྲངས་སོ། ༣ ཡེ་ཤུ་རིར་ཕེབས་ནས་ཉེ་གནས་རྣམས་དང་མཉམ་དུ་བཞུགས་སོ། ༤ ཡ་ཧུ་དཱ་པའི་པེ་སག་གི་དུས་ཆེན་ཐག་ཉེ་བར་ཡོད་དོ། ༥ ཡེ་ཤུས་སྤྱན་བཏེགས་ནས། མི་ཚོགས་ཆེན་པོ་འོང་བར་གཟིགས་ཏེ། ཕི་ལིབ་ལ། འདི་རྣམས་ལ་སྟེར་བའི་བག་ལེབ་ཅི་ལྟར་ཉོ་གསུངས་སོ། ༦ ཉིད་ཀྱིས་ཅི་མཛད་འོང་བ་མཁྱེན་བཞིན། ཕི་ལིབ་ཀྱི་ཉམས་སད་པའི་ཕྱིར་དེ་ལྟར་གསུངས་སོ། ༧ ཕི་ལིབ་ཀྱིས་ཞུ་ལན་དུ། དངུལ་ཊཾ་ཉིས་བརྒྱའི་བག་ལེབ་ཀྱིས་ཀྱང་མི་རེ་རེ་ལ་ཅུང་ཟད་སྟེར་དུ་མི་འདང་ཞུས་སོ། ༨ ཉེ་གནས་ཡིན་པའི་ཤི་མོན་པེ་ཏྲོའི་ནུ་བོ་ཨན་དྲེ་ཨས་ཁོང་ལ། ༩ འདིར་ཡོད་པའི་ཁྱེའུ་ཞིག་ལ་འབྲུ་སོ་བའི་བག་ལེབ་ལྔ་དང་ཉ་གཉིས་འདུག་ཀྱང་། མི་འདི་ཙམ་མང་པོ་ལ་ཅི་ཕན་ནུས་ཞུས་སོ། ༡༠ ཡེ་ཤུས་མི་རྣམས་ས་ལ་སྡོད་དུ་ཆུག་གསུངས་པས། དེར་རྩྭ་མང་པོ་ཡོད་དེ། མི་སྟོང་ལྔ་ཙམ་དེར་བསྡད་དོ། ༡༡ ཡེ་ཤུས་བག་ལེབ་ཕྱག་ཏུ་བཞེས་ནས། གཏང་རག་ཕུལ་ཏེ། སར་བསྡད་པ་རྣམས་ལ་བགོས་ནས་སྩལ། དེ་བཞིན་དུ་ཉའང་ཇི་ཙམ་དགོས་པ་སྩལ་ཏོ། ༡༢ དེ་ཚོ་ཚིམ་པ་དང་། ཁོང་གིས་ཉེ་གནས་རྣམས་ལ། ཅིའང་ཆུད་ཟོས་མི་འགྲོ་བའི་ཕྱིར་ལྷག་མ་བྲུལ་བུ་རྣམས་སྡུས་ཤིག་གསུངས་པས། ༡༣ བསྡུས་ཏེ་མི་རྣམས་ཀྱིས་ཟོས་པའི་སོ་བའི་བག་ལེབ་ལྔ་པོ་ལས་ལུས་པའི་བྲུལ་བུ་ཙེལ་པོ་བཅུ་གཉིས་བཀང་ངོ་། ༡༤ མི་རྣམས་ཀྱིས་ཁོང་གིས་མཛད་པའི་ལྟས་མཐོང་ནས། འཇིག་རྟེན་དུ་འབྱོན་པར་འགྱུར་བའི་ལུང་སྟོན་པ་དེ་ནི། འདི་ཡིན་པར་ཐེ་ཚོམ་མེད་ཅེས་སྨྲས་སོ། ༡༥ མི་རྣམས་ཀྱིས་ཁོང་གཟུང་ནས་རྒྱལ་པོར་བསྐོ་འོང་གྲབས་ཡོད་པ་དེ་ཡེ་ཤུས་མཁྱེན་ནས་གཅིག་པུར་རིར་གཤེགས་སོ༎