ཕ་རུ་ཤི་པ་ནི་ཀོ་དེམ་བྱ་བ་ཡ་ཧུ་དཱ་པའི་དཔོན་པོ་ཞིག་ཡོད་དེ། ༢ མཚན་མོ་ཡེ་ཤུ་མཇལ་དུ་འོངས་ནས། སྟོན་པ། ཁྱེད་ནི་དཀོན་མཆོག་གི་ཕྱོགས་ནས་ཕེབས་པའི་སྟོན་པ་ལགས་པར་ཤེས་སོ། ཅིའི་ཕྱིར་ཞུ་ན། ཁྱེད་ཀྱིས་སྟོན་པར་མཛད་པའི་ལྟས་འདི་རྣམས། དཀོན་མཆོག་དང་མི་ལྡན་པར་སུས་ཀྱང་སྟོན་པར་མི་ནུས་སོ། ཞེས་ཞུས་པའི་ལན་དུ་ཡེ་ཤུས། ༣ མི་ཞིག་ཡང་སྐྱར་མ་སྐྱེ་ན། དཀོན་མཆོག་གི་རྒྱལ་སྲིད་མཐོང་བར་མི་ནུས་སོ་ཞེས་ངས་བདེན་པར་ཟེར་གསུངས་སོ། ༤ ནི་ཀོ་དེམ་གྱིས། རྒས་པ་ཞིག་ཇི་ལྟར་སྐྱེ་བར་ནུས། མའི་མངལ་དུ་ཞུགས་ནས་ལན་གཉིས་པར་སྐྱེ་བར་ནུས་སམ་ཞུས་པས། ༥ ཡེ་ཤུས། ཆུ་དང་ཐུགས་ཉིད་ལས་མ་སྐྱེས་པ་དེ། དཀོན་མཆོག་གི་རྒྱལ་སྲིད་ནང་འཇུག་པར་མི་འགྱུར་ཞེས་ངས་བདེན་པར་ཟེར། ༦ ལུས་ནས་སྐྱེས་པ་ནི་ལུས་ཡིན། ཐུགས་ཉིད་ལས་སྐྱེས་པ་ནི་ཐུགས་ཉིད་ཡིན། ༧ ངས་ཁྱེད་ལ་ཡང་སྐྱར་སྐྱེ་དགོས་སྨྲས་པ་ལ། ཡ་མཚན་མ་བྱེད་ཅིག ༨ རླུང་གང་དགར་རྒྱུ་སྟེ། དེའི་སྐད་ཐོས་ཀྱང་། དེ་ག་ནས་འོང་ཞིང་ག་རུ་འགྲོ་བ་ཁྱེད་ཀྱིས་མི་ཤེས། ཐུགས་ཉིད་ནས་སྐྱེས་པ་ཐམས་ཅད་དེ་ལྟར་ཡིན་ནོ་གསུངས་སོ། ༩ ནི་ཀོ་དེམ་གྱིས། དེ་ཅི་ལྟར་སྲིད་ཞུས་པར། ༡༠ ཡེ་ཤུས། ཁྱེད་ཨིས་ར་ཨེལ་གྱི་སྟོན་པ་ཡིན་གྱི། དེ་མི་ཤེས་སམ། ༡༡ ང་ཚོས་ཅི་ཤེས་པ་ཟེར་ཞིང་། ཅི་མཐོང་བ་དེའི་དཔང་པོ་བྱེད་ཀྱང་། ང་ཚོས་དཔང་བྱེད་པར་ཁྱེད་མི་ཉན་ནོ་ཞེས་ངས་བདེན་པར་ཟེར། ༡༢ ངས་སའི་གཏམ་བྱས་ཏེ་ཡིད་མི་ཆེས་ན། ནམ་མཁའི་གཏམ་བྱེད་ན་ཁྱེད་ཅི་ལྟར་ཡིད་ཆེས་པར་འགྱུར། ༡༣ ནམ་མཁའ་ནས་བབས་པའི་མིའི་བུ་མ་གཏོགས་པར། སུའང་ནམ་མཁར་མ་འཕགས་སོ། ༡༤-༡༥ མོ་ཤེས་འབྲོག་སྟོང་ནང་སྦྲུལ་དེ་སྒྲེང་བ་ལྟར། མིའི་བུ་ཁོང་ལ་དད་པ་རྣམས་ལ་ཚེ་མཐའ་མེད་པ་ཐོབ་པའི་ཕྱིར་དུ། མིའི་བུ་ཡང་སྒྲེང་དགོས་སོ༎