༥ ཡང་ངས་ཞལ་ཆེ་གཅོད་དུ་ཁྱོད་དང་ཉེ་བར་བྱོན་ཏེ། སྔགས་པ་དང་། ལོག་པར་གཡེམ་པ་དང་། བརྫུན་གྱི་མནའ་སྐྱེལ་མཁན་དང་། གླ་པར་དབང་ཤེད་ཀྱིས་གླ་མི་སྤྱིན་མཁན་དང་། མོ་རང་མོ་དང་དྭ་ཕྲུག་ལ་ངན་པ་བྱེད་མཁན་དང་། རྒྱལ་ཁམས་པ་ལ་དེའི་ཐོབ་ཐང་མི་ཐོབ་ཕྱིར་བཟློག་པར་བྱེད་མཁན་དང་། ང་ལ་མི་འཇིགས་པ་རྣམས་ཀྱི་ཕྱིར་དཔང་བྱེད་དུ་ང་རིངས་པར་འགྱུར་རོ། ཞེས་དཔུང་ཆེན་གྱི་ཡ་ཧོ་ཝཱས་གསུང་ངོ་། ༦ དེ་ཅིའི་ཕྱིར་ཞེ་ན། ང་ནི་ཡ་ཧོ་ཝཱ་འགྱུར་མེད་ལགས་པས་ན། ཀྱེ་ཡ་ཀོབ་ཀྱི་བུ་རྣམས། ཁྱོད་ཅག་མེད་པར་གྱུར་ཏོ༎

༧ ཁྱོད་ཅག་གི་ཕ་མེས་རྣམས་ནས་ཚུན་ཆད་ཁྱོད་ཅག་ངའི་བཀའ་ཁྲིམས་ལས་འདས་ཏེ། དེ་རྣམས་མ་བསྲུངས་སོ། ཁྱོད་ཅག་ངའི་ཕྱོགས་སུ་ལོག་ཤོག་དང་། ང་ཁྱོད་ཕྱོགས་སུ་ལོག་འོང་བར་བྱའོ། ཞེས་དཔུང་ཆེན་གྱི་ཡ་ཧོ་ཝཱས་གསུང་ངོ་། འོན་ཏེ་ཁྱོད་ཚོས་ནི། ངེད་ཅིའི་ནང་དུ་ལོག་འོང་བར་བྱ་ཞེས་ཟེར་རོ། ༨ མི་ཞིག་གིས་དཀོན་མཆོག་ལས་འཕྲོག་པར་བྱའམ། འོན་ཀྱང་ཁྱོད་ཚོས་ང་ལས་ཕྲོགས་ཀྱང་། ངེད་ཀྱིས་ཁྱེད་ལས་ཅིའི་ནང་དུ་ཕྲོགས་ཞེས་ཟེར། བཅུ་ཁག་དང་འབུལ་བ་རྣམས་ཀྱི་ནང་དུའོ། ༩ ཁྱོད་ཅག་རང་གིས་མ་ཟད་མི་སྡེ་ཧྲིལ་པོ་འདིས་ཁོ་བོ་ལས་ཕྲོགས་པས་ན་ཁྱོད་དམོད་པས་དམོད་པར་གྱུར་ཏོ། ༡༠ ངའི་ཕོ་བྲང་ན་ཁ་ཟས་ཡོད་པའི་ཕྱིར་ཁྱོད་ཀྱིས་བཅུ་ཁག་ཚང་པོ་དཀོར་མཛོད་དུ་ཁྱེར་ཤོག་དང་། ད་ལྟ་འདིའི་ངང་ནས་ང་བརྟག་པར་བྱོས་ཤིག དཔུང་ཆེན་གྱི་ཡ་ཧོ་ཝཱའི་བཀའ་ནི། ངས་ནམ་མཁའི་དཀར་ཁུང་རྣམས་འབྱེད་ཅིང་། མི་ཤོང་བ་ཙམ་དུ་བྱིན་རླབས་ཁྱོད་ཀྱི་ཁར་བླུག་གམ་མི་བླུག ༡༡ ཡང་མིད་མཁན་ལ་ཁྱོད་ཀྱི་དོན་དུ་ངས་བཀའ་བཀྱོན་ཞིང་། དེས་ཁྱོད་ཀྱི་ཞིང་གི་སྟོན་ཐོག་མི་འཇིག་པར། ཀླུངས་ནང་གི་ཁྱོད་ཀྱི་རྒུན་ཤིང་གིས་དུས་ལས་སྔོན་དུ་འབྲས་བུ་འཕེན་པར་མི་འགྱུར་རོ། ཞེས་དཔུང་ཆེན་གྱི་ཡ་ཧོ་ཝཱས་གསུང་ངོ་། ༡༢ ཁྱོད་ཅག་ནི་སྙིང་སྡུག་པའི་ཡུལ་དུ་གྱུར་ནས། མི་བརྒྱུད་ཀུན་གྱིས་ཁྱོད་ཅག་ལ་ཤིས་པ་བརྗོད་པར་འགྱུར། ཞེས་དཔུང་ཆེན་གྱི་ཡ་ཧོ་ཝཱས་གསུང་ངོ་༎

༡༣ ཁྱོད་ཅག་གི་ཚིག་རྣམས་ང་ལ་རབ་ཏུ་རྩུབ་པོར་གྱུར་ཏོ། ཞེས་ཡ་ཧོ་ཝཱས་གསུང་ངོ་། འོན་ཀྱང་ཁྱོད་ཀྱིས། ངེད་ཀྱིས་ཁྱེད་ལ་འདི་འདྲའི་རྒོལ་བ་ཇི་ལྟར་ཞུས་ཞེས་ཟེར། ༡༤ ཁྱོད་ཚོས་དཀོན་མཆོག་གི་གཡོག་བྱེད་པ་ནི་ཕན་དོན་མེད་དོ། ཁོང་གི་བཀའ་རྒྱའི་འབངས་བྱེད་ཅིང་། དཔུང་ཆེན་གྱི་ཡ་ཧོ་ཝཱའི་སྤྱན་སྔར་སྡུག་ལྷུང་བའི་ཚུལ་གྱིས་འགྲུལ་པས། ངེད་ལ་ཕན་ཅི་འདུག ༡༥ ད་ལྟ་ངེད་ཀྱིས། ང་རྒྱལ་ཅན་བདེའོ་ཟེར། འོ་ན། ངན་པ་བྱེད་མཁན་རྣམས་རྒྱགས་ཏེ། དཀོན་མཆོག་ལ་ཡང་ཐུགས་སད་པར་བྱེད་ཀྱི། དེ་དག་ཐར་རོ། ཞེས་ཁྱོད་ཀྱིས་སྨྲས་སོ༎

༡༦ དེ་ནས་ཡ་ཧོ་ཝཱ་ལ་བག་བྱེད་པ་རྣམས་གཅིག་ལ་གཅིག་གིས་གཏམ་བྱས་པ་ལས། ཡ་ཧོ་ཝཱས་སྙན་བཏད་ཅིང་གསན་ཏེ། ཡ་ཧོ་ཝཱ་ལ་བག་བྱེད་པ་དང་། ཁོང་གི་མཚན་སྒོམ་པ་རྣམས་ཀྱི་དོན་དུ། ཁོང་གི་མདུན་དུ་བརྗེད་ཐོའི་དཔེ་ཆ་ཞིག་བྲིས་པར་གྱུར་ཏོ། ༡༧ ཡང་ངས་ཁྱད་མཚར་གྱི་རྒྱན་ཆ་མཛད་པའི་ཉིན་མོར་དེ་དག་རང་གི་ཡིན་པར་འགྱུར། ཞེས་དཔུང་ཆེན་གྱི་ཡ་ཧོ་ཝཱས་གསུང་ངོ་། མི་ཞིག་གིས་རང་ལ་ཞབས་ཏོག་བྱེད་པའི་རང་གི་བུ་ལ་སྙིང་བརྩེ་བ་ལྟར། ངས་དེ་དག་ལ་ཐུགས་བརྩེ་བར་བྱའོ། ༡༨ དེ་ནས་ཁྱོད་ཅག་སླར་ལོག་ནས། ཆོས་དྲང་པོ་དང་ཆོས་མེད་པ། དཀོན་མཆོག་གི་གཡོག་བྱེད་པ་དང་གཡོག་མི་བྱེད་པ་གཉིས་ཀྱི་ཤན་འབྱེད་པར་འགྱུར་རོ༎