ཨིས་ར་ཨེལ་གྱི་སྐོར་དུ་ཡོད་པའི་ཡ་ཧོ་ཝཱའི་བཀའ་མཆིད་ཀྱི་ཁལ་ནི། ནམ་མཁའ་རྣམས་རྐྱོང་བ་དང་། ས་གཞིའི་རྨང་འདིང་བ་དང་། མིའི་ནང་ན་དེའི་སེམས་ཉིད་སྐྱེད་པར་མཛད་པའི་ཡ་ཧོ་ཝཱས་འདི་སྐད་གསུང་ངོ་། ༢ ཀྱེ་ཧོ། ངས་ཡེ་རུ་ཤ་ལེམ་ནི་མཐའི་མི་བརྒྱུད་ཐམས་ཅད་འཁོར་བའི་ཕོར་པར་བྱ་བ་དང་། ཡེ་རུ་ཤ་ལེམ་མཐའ་ནས་བསྐོར་བའི་ཚེ། ཡ་ཧུ་དཱ་ཡང་དེ་ནང་འདྲེས་པར་འགྱུར། ༣ ངས་ཉིན་མོ་དེར་ཡེ་རུ་ཤ་ལེམ་ནི་མི་བརྒྱུད་ཡོངས་ལ་ལྕིད་ཆེ་བའི་རྡོ་རུ་བྱས་ཏེ། སའི་མི་རིགས་ཐམས་ཅད་དེའི་དགར་ལངས་ནས་འཚོགས་པར་འགྱུར་ཡང་། དེ་འདེགས་པ་ཐམས་ཅད་གཏུབ་པར་འགྱུར་རོ། ༤ ཉིན་དེར། ཡ་ཧོ་ཝཱའི་བཀའ་ནི། ངས་རྟ་རེ་རེ་བཞིན་དུ་འདྲོག་ཏུ་བཅུག་ནས། ཞོན་མཁན་རྣམས་སྨྱོ་འབོགས་པར་བྱའི། ཡ་ཧུ་དཱའི་མི་བརྒྱུད་ཀྱི་ཁར་ཉིད་ཀྱི་སྤྱན་ཕྱེས་བཞིན་གཞག་ཀྱང་། མི་བརྒྱུད་རྣམས་ཀྱི་རྟ་ཐམས་ཅད་མདོངས་སུ་གཞུག་གོ། ༥ ཡང་ཡ་ཧུ་དཱའི་ཇོ་བོ་རྣམས་ཀྱིས། ཡེ་རུ་ཤ་ལེམ་པ་རྣམས་ནི་དཔུང་ཆེན་གྱི་ཡ་ཧོ་ཝཱ་དེ་དག་གི་དཀོན་མཆོག་གི་ངང་ན་ངེད་ཀྱི་སྟོབས་ལགས་སོ། ཞེས་རང་གི་སྙིང་ན་ཟེར་བར་འགྱུར།