ཡང་ཡ་ཧོ་ཝཱའི་བཀའ་བདག་ལ་བྱུང་ནས་འདི་སྐད་གསུང་། ༢ དཔུང་ཆེན་ཡ་ཧོ་ཝཱས་འདི་སྐད་གསུང་། ཙི་ཨོན་གྱི་ཕྱིར་བདག་ལ་འཁྲེན་སེམས་རབ་ཏུ་ཆེ་བའི་ངང་ནས་འཁྲེན་སེམས་བསྐྱེད་དེ། བདག་ཁོང་ཁྲོ་ཆེ་བའི་ངང་ནས་དིའི་ཕྱིར་འཁྲེན་སེམས་སྐྱེད་དོ། ༣ ཡ་ཧོ་ཝཱས་འདི་སྐད་གསུང་། བདག་ཙི་ཨོན་གྱི་ཕྱོགས་སུ་ལོག་འོང་ཞིང་། ཡེ་རུ་ཤ་ལེམ་གྱི་གཞུང་དུ་གདན་ཆགས་ཤིང་། ཡེ་རུ་ཤ་ལེམ་ལ་དྲང་བ་ཉིད་ཀྱི་གྲོང་ཁྱེར་དང་། དཔུང་ཆེན་གྱི་ཡ་ཧོ་ཝཱའི་རི་བོ་ལ། རི་བོ་དམ་པའི་མིང་གིས་འགྲགས་པར་འགྱུར། ༤ དཔུང་ཆེན་གྱི་ཡ་ཧོ་ཝཱས་འདི་སྐད་གསུང་། ད་དུང་ཡང་རྒད་པོ་དང་རྒད་མོ་རྣམས་ཡེ་རུ་ཤ་ལེམ་གྱི་ལམ་སྲང་ན་སྡོད་ཅིང་། ན་སོ་བགྲེས་པས། མི་རེའི་ལག་ན་དབྱུག་པ་ཡོད་པར་བྱ། ༥ གྲོང་ཁྱེར་གྱི་ལམ་སྲང་རྣམས་རྩེད་མོ་རྩེད་པའི་བུ་དང་བུ་མོས་གང་བར་འགྱུར་རོ། ༦ དཔུང་ཆེན་གྱི་ཡ་ཧོ་ཝཱས་འདི་སྐད་གསུང་། མི་བརྒྱུད་འདིའི་ལྷག་མ་རྣམས་ཀྱི་མིག་གི་མདུན་དུ་ཉིན་མོ་དེ་རྣམས་ལ་ཧ་ལས་རུང་། ངའི་གཟིགས་སྣང་ལའང་ཧ་ལས་ཤིག་སྣང་བར་འགྱུར་རམ། ཞེས་དཔུང་ཆེན་གྱི་ཡ་ཧོ་ཝཱས་གསུང་། ༧ དཔུང་ཆེན་གྱི་ཡ་ཧོ་ཝཱས་འདི་སྐད་གསུང་། ལྟོས་ཤིག བདག་གིས་རང་གི་མི་སྡེ་ཤར་ཕྱོགས་དང་། ཉི་མ་ནུབ་སའི་ཡུལ་ནས་བསྒྲལ་ཏེ། ༨ ངས་དེ་དག་དྲངས་པ་ལས། ཡེ་རུ་ཤ་ལེམ་གྱི་དབུས་ན་གནས་ཤིང་། དེ་དག་ངའི་མི་སྡེ་དང་། ང་བདེན་པ་ཉིད་དང་དྲང་བ་ཉིད་ཀྱི་ངང་ནས་དེ་དག་གི་དཀོན་མཆོག་ཏུ་འགྱུར་བར་འགྱུར་རོ༎