༦ ཡང་ཡ་ཧོ་ཝཱའི་ཕོ་ཉས་ཡོ་ཤུ་ཨ་ལ་ནན་ཆགས་བྱེད་ཅིང་འདི་སྐད་དུ། ༧ དཔུང་ཆེན་གྱི་ཡ་ཧོ་ཝཱས་འདི་སྐད་གསུང་། གལ་ཏེ་ཁྱོད་ངའི་ལམ་རྣམས་ན་འགྲུལ་ཞིང་། ངའི་བཀའ་སྲུང་ན། ཁྱོད་ཀྱིས་ཀྱང་ངའི་ཕོ་བྲང་ན་སྲིད་བྱ་ཞིང་། ངའི་ཚོམས་རྣམས་ལ་ལྟ་བ་དང་། ངས་ཁྱོད་ལ་འདིར་འགྲེང་བའི་ཁྲོད་དུ་རྒྱུ་བའི་གནས་ཀྱང་སྦྱིན་པར་བྱའོ། ༨ ད་ཀྱེ་བླ་མ་ཆེན་པོ་ཡོ་ཤུ་ཨ། ཁྱོད་དང་ཁྱོད་ཀྱི་གྲོགས་ཁྱོད་ཀྱི་མདུན་དུ་གནས་ཡོད་པ་རྣམས། ཚུར་ལ་ཉོན་ཞིག མི་འདི་དག་ནི་དཔེ་ལྟས་སོ། དེ་ཅིའི་ཕྱིར་ཞེ་ན། ལྟོས་ཤིག་བདག་ཉིད་ཀྱི་བྲན་པོ་ལྕུག་མའི་མཚན་ཅན་དེ་ངས་སྐྱེད་པར་བྱའོ། ༩ དེ་ཅིའི་ཕྱིར་ཞེ་ན། བདག་གིས་ཡོ་ཤུ་ཨའི་མདུན་དུ་བཞག་པའི་རྡོ་དེ་ལ་ལྟོས་ཤིག རྡོ་གཅིག་པོ་དེ་ལ་སྤྱན་བདུན་འདུག ལྟོས་ཤིག་ངས་དེ་རྐོས་ཀྱིས་རྐོ་བར་བྱའོ། ཞེས་དཔུང་ཆེན་གྱི་ཡ་ཧོ་ཝཱས་གསུང་ངོ་། ཡང་ངས་ཡུལ་ཁམས་འདིའི་ཉེས་སྡིག་ནི་ཉི་མ་གཅིག་གི་ནང་འཁྱེར་བར་བྱའོ། ༡༠ ཉིན་མོ་དེར་དཔུང་ཆེན་གྱི་ཡ་ཧོ་ཝཱའི་བཀའ་ནི། ཁྱོད་ཅག་རེ་རེ་ཡིས་རང་གི་ཁྱིམ་མཚེས་ལ་རྒུན་ཤིང་དང་སེ་ཡབ་ཤིང་གི་ལྐོག་ཏུ་སྡོད་དུ་འབོད་པར་བྱའོ། ཞེས་སྨྲས་སོ༎