ཡ་ཧོ་ཝཱ་གཙོ་བོས་ང་ལ་བསྟན་པར་གྱུར་པ་ནི་འདི་ལྟ་སྟེ། ལྟོས་ཤིག ཤིང་ཏོག་སྨིན་པའི་སླེ་པོ་ཞིག་འདུག ༢ ཡང་ཁོང་གིས། ཨ་མོས། ཁྱོད་ཀྱིས་ཅི་མཐོང་འདུག་གསུངས་པ་དང་། ངས་ཤིང་ཐོག་སྨིན་པའི་སླེ་པོ་ཞིག་འདུག་ཅེས་ཞུས་སོ། དེ་ནས་ཡ་ཧོ་ཝཱས་ང་ལ། ངའི་མི་སྡེ་ཨིས་ར་ཨེལ་གྱི་ཚེའི་དུས་ལ་བབས་ཏེ། ཕྱིན་ཆད་དུ་སླར་ང་དེ་དག་གི་རྩར་སྐྱོད་པར་མི་བྱའོ། ༣ ཉིན་མོ་དེར་རྒྱལ་ཁབ་ཀྱི་གླུ་དབྱངས་རྣམས་ཆོ་ངེས་སུ་འགྱུར་བར་འགྱུར། ཞེས་ཡ་ཧོ་ཝཱ་གཙོ་བོས་གསུང་ངོ་། གནས་ཀུན་དུ་ཤི་བའི་རོ་མང་པོ་ཡོད་པར་འགྱུར། མི་རྣམས་ཤུད་བྱས་ནས་ཕྱི་རོལ་དུ་འཕེན་པར་འགྱུར་རོ། ༤ དབུལ་པོ་རྣམས་ཡུལ་ནས་ཚར་གཅོད་པའི་ཕྱིར། དགོས་འགྱག་ཅན་རྣམས་མིད་མཁན་ཁྱོད་རྣམས་གཏམ་འདི་ལ་ཉོན་དང་། ༥ ངེད་ཀྱིས་འབྲུ་འཚོང་བའི་ཕྱིར་ཟླ་བ་གསར་པ་ནམ་འདའ་འོང་། གྲོའི་བང་ཁ་འབྱེད་པའི་ཕྱིར་ཤབ་བཱད་ནམ་འདའ་འོང་། ཨེ་ཕ་ཆུང་ལ་ཤེ་ཀེལ་ཆེ་རུ་བྱེད་ཅིང་ཟོལ་ཟོག་གི་སྲང་གིས་མགོ་སྐོར་ཞིང་། ༦ མི་དབུལ་པོ་དངུལ་དང་། འཕོངས་པ་ལྷམ་ཟུང་གཅིག་ལ་ཉོ་བ་དང་། གྲོ་མི་འདོད་པ་ངེད་ཀྱིས་འཚོང་བར་བྱ་ཞེས་སྨྲའི། ༧ ཡ་ཧོ་ཝཱས་ཡ་ཀོབ་ཀྱི་གྲགས་པའི་དབུ་མནའ་བཞེས་ཤིང་། ངས་ཁྱོན་ནས་དེ་དག་གི་ལས་རྣམས་ལས་གཅིག་ཀྱང་བརྗེད་པར་མི་བྱའོ་ཞེས་གསུང་ངོ་། ༨ དེའི་རྐྱེན་གྱིས་ས་གཞི་འདར་བར་མི་འགྱུར་རམ། དེའི་ནང་ན་ཡོད་པ་རེ་རེས་མྱ་ངན་མི་བྱའམ། འོ་ན་དེ་ནི་ཆུ་རུད་ལྟ་བུར་ཀུན་ནས་ལང་ཞིང་། མི་སེར་གྱི་གཙང་པོ་བཞིན་ཁེངས་ཤིང་འབབ་པར་འགྱུར།