༨ ཡ་ཧོ་ཝཱ་གཙོ་བོས་རང་ཉིད་ཀྱི་དབུ་མནའ་བཞེས་ཞིང་། དཔུང་ཆེན་རྣམས་ཀྱི་དཀོན་མཆོག་ཡ་ཧོ་ཝཱས་འདི་སྐད་གསུང་། ངས་ཡ་ཀོབ་ཀྱི་ཆེ་ཐབས་ལ་ཞེན་པ་ལོག དེའི་ཁབ་རྣམས་འཁོན་དུ་འཛིན། དེ་བས་ན་ངས་གྲོང་ཁྱེར་འདི་དང་གྲོང་ཁྱེར་གྱི་ནང་ན་ཡོད་པ་ཐམས་ཅད་གཞན་ལ་གཏད། ༩ དེས་མ་ཟད་ཁྱིམ་གཅིག་ན་མི་བཅུ་ལུས་ན། དེ་དག་ཀྱང་སྲོག་དང་འབྲལ་བར་འགྱུར། ༡༠ སུ་ཞིག་གི་གཉེན་དྲུང་ངམ། དེ་སྲེག་མཁན་གྱིས་ཁྱིམ་གྱི་ནང་ནས་རུས་པ་ཕྱི་རུ་འཁྱེར་བའི་ཕྱིར་ཐོགས་པར་བྱ་ཏེ། ཕུགས་ལ་ཡོད་པའི་མི་ལ། ད་དུང་ཁྱོད་དང་མཉམ་སུ་རེ་ཡོད་དམ་སྨྲ་བའི་ཚེ། དེས་སུའང་མེད་སྨྲ་ཡོང་། དེ་ནས་གཅིག་ཤོས་དེས། ངེད་ཀྱིས་ཡ་ཧོ་ཝཱའི་མཚན་ལེན་པར་མི་རུང་བས། ཁ་རོག་ཅིག་ཅེས་སྨྲ་བར་འགྱུར་རོ། ༡༡ དེའི་ཕྱིར་ལྟོས་ཤིག ཁྱིམ་ཆེ་བ་དེ་ལ་བུག་པ་རྣམས་དང་། ཁང་བུ་དེ་ལ་སེར་ག་རྣམས་འཐོན་པའི་བཀའ་ཡ་ཧོ་ཝཱས་ཟིན་ཏོ། ༡༢ བྲག་ཁར་རྟ་རྣམས་རྒྱུག་གམ། དེར་སུས་གླང་རྣམས་ཀྱིས་རྨོ། དེ་ཅིའི་ཕྱིར་ཞེ་ན། ཁྱོད་རྣམས་ཀྱིས་ཁྲིམས་དྲང་པོ་ནི་དུག་ཆུ་དང་། དྲང་བ་ཉིད་ཀྱི་འབྲས་བུ་ནི་ཁན་པ་རུ་བསྒྱུར་བར་བྱས། ༡༣ ཁྱོད་ཀྱིས་རྫུས་མ་ལ་དགའ་བས། ངེད་ཅག་རང་སྟོབས་ཀྱིས་རང་ལ་རྭ་ཅོ་བསྐྱེད་པར་མ་བྱས་སམ་ཟེར། ༡༤ འོན་ཀྱང་ཀྱེ་ཨིས་ར་ཨེལ་གྱི་མི་བརྒྱུད། ལྟོས་ཞིག ངས་མི་བརྒྱུད་ཅིག་ཁྱོད་ཀྱི་དགྲ་རུ་བསླང་བར་བྱའོ་ཞེས་ཡ་ཧོ་ཝཱ་དཔུང་ཆེན་རྣམས་ཀྱི་དཀོན་མཆོག་གིས་གསུང་། དེ་དག་གིས་ཧ་མད་ཀྱི་སྒོ་ནས་འབྲོག་སྟོང་གི་གྲོག་པོའི་བར་དུ་ཁྱོད་ལ་འཚེ་བར་འགྱུར་རོ༎