ཀྱེ་ཨིས་ར་ཨེལ་གྱི་བུ་རྣམས། ཡ་ཧོ་ཝཱས་ཁྱོད་ཅག་གམ། མི་སེར་ཡུལ་ནས་ཕྱིར་བཏོན་པའི་མི་བརྒྱུད་ཀྱི་སྐོར་དུ་གསུང་བའི་གཏམ་འདི་ལ་ཉོན་ཞིག ༢ སའི་མི་བརྒྱུད་ཐམས་ཅད་ཀྱི་ནང་ནས་ངས་ཁྱོད་འབའ་ཞིག་གི་ངོ་ཤེས་པས་ན། ཁྱོད་ཀྱི་མི་ཚངས་པ་ཀུན་གྱི་ཕྱིར་ངས་ཆད་པས་གཅད་དོ། ༣ མི་གཉིས་ཁ་མ་འཆམ་པར་ལྷན་ཅིག་ཏུ་འདོང་བར་སྲིད་དམ། ༤ སེང་གེ་ལ་ལེངས་མ་ཐོབ་པའི་ཚེ། ནགས་ཀྱི་ནང་ན་ངར་སྐད་སྒྲོག་པར་བྱེད་དམ། སེང་དར་མས་ཅིའང་མ་འཛིན་པར་ཕུག་པའི་ནང་ནས་ང་རོ་སྒྲོག་གམ། ༥ ས་ལ་རྙི་མ་འཛུགས་པར་བྱ་ཞིག་རྙིར་འཁད་སྲིད་དམ། རྙིར་ཅིའང་མ་འཁད་པར་དེ་ས་ལས་འཕར་སྲིད་དམ། ༦ གྲོང་ཁྱེར་ན་དམག་དུང་འབུད་པ་ལ་མི་རྣམས་མི་འདར་རམ། ཡ་ཧོ་ཝཱས་མ་གནང་བར་ཡུལ་དུ་བར་ཆད་འབབ་བམ། ༧ ཡ་ཧོ་ཝཱ་གཙོ་བོས་ཉིད་ཀྱི་ཞབས་སྟེགས་པའི་ལུང་སྟོན་པ་རྣམས་ལ་ཉིད་ཀྱི་གསང་བ་མངོན་དུ་མཛད་པའི་གོང་དུ་ཕྲིན་ལས་གང་ཡང་ཁྱོན་ནས་མཛད་པར་མི་འགྱུར་རོ༎