༥ ཆུ་ཚོད་དེ་རང་ལ་མིའི་ལག་པའི་མཛུབ་མོ་རྣམས་བྱུང་ནས། སྟེགས་བུའི་ཐད་དུ་རྒྱལ་ཁབ་ཀྱི་རྩིག་པའི་ཞལ་བ་ལ་འབྲི་བར་བྱས། འབྲི་བའི་ལག་པའི་མཛུབ་མོ་དེ་དག་རྒྱལ་པོས་མཐོང་བ་དང་། ༦ རྒྱལ་པོའི་གདོང་རྩི་གྱུར་ནས། རང་གི་བསམ་པས་དཀྲུགས་ཏེ། རྐེད་ཚིགས་ལྷོད་ཅིང་། པུས་མོ་གཅིག་ལ་གཅིག་ཐོགས་པར་གྱུར་པ་དང་། ༧ རྒྱལ་པོས་རྩིས་པ་དང་ཀལ་དཱི་པ་དང་ཆ་མཁན་རྣམས་འགུག་ཏུ་སྐད་ཆེན་པོས་འབོད་གྲགས་སོ། རྒྱལ་པོས་བཱ་བེལ་གྱི་མི་མཁས་པ་རྣམས་ལ་གཏམ་བྱས་ཏེ། སུས་ཀྱང་བྲིས་པ་འདི་བཀླགས་ནས། དེའི་དོན་འགྲེལ་ང་ལ་སྟོན་པ་དེ་ལ་མགོ་ལུས་མཚལ་ཁ་དང་། དེའི་མཇིང་པ་ལ་གསེར་གྱི་འཕྲེང་བས་བརྒྱན་ཏེ། རྒྱལ་སྲིད་ནང་དུ་བློན་པོ་གསུམ་པར་འགྱུར་བར་འགྱུར་རོ་ཞེས་སྨྲས་པ་དང་། ༨ རྒྱལ་པོའི་མི་མཁས་པ་ཀུན་ནང་དུ་འོངས་ཀྱང་། བྲིས་པ་དེ་མ་ཕྱེད། རྒྱལ་པོ་ལ་དེའི་དོན་འགྲེལ་ཡང་སྟོན་མ་ནུས་པས། ༩ བེལ་ཤ་ཙར་ཀུན་ནས་འཁྲུགས་ཏེ། དེའི་གདོང་རྩི་གྱུར་ནས། སྐུ་དྲག་རྣམས་ཀྱང་མགོ་ཁྱོར་ཏོ༎

༡༠ དེའང་རྒྱལ་པོ་དང་སྐུ་དྲག་རྣམས་ཀྱི་གཏམ་ཐོས་ནས་རྒྱལ་མོ་མགྲོན་ཁང་དུ་འོངས་ཏེ། རྒྱལ་མོས་གཏམ་བྱས་ཏེ་འདི་སྐད་དུ། ཀྱེ་རྒྱལ་པོ། སྐུ་ཚེ་བརྟན་པར་ཤོག ཁྱེད་ཀྱི་བསམ་པས་ཁྱེད་འཁྲུགས་པར་མ་གྱུར་ཅིག་དང་། ཞལ་གདོང་ཡང་མ་སྒྱུར་ཞིག ༡༡ ཁྱེད་ཀྱི་རྒྱལ་སྲིད་ཀྱི་ནང་ན་ལྷ་དམ་པ་རྣམས་ཀྱི་སེམས་ཉིད་དང་ལྡན་པའི་སྐྱེས་བུ་ཞིག་ཡོད། ཁྱེད་ཀྱི་ཡབ་ཀྱི་སྐུ་རིང་ལ་དེའི་ནང་ན་ལྷའི་ཡེ་ཤེས་དང་འདྲ་བའི་འོད་དང་། བློ་གྲོས་དང་། ཡེ་ཤེས་བརྙེད་པ་ཡིན། རྒྱལ་པོ་ནེ་བུ་ཀད་ནེ་ཙར། ཁྱེད་ཀྱི་ཡབ། ཀྱེ་རྒྱལ་པོ། འོ་ན་ཁྱེད་ཀྱི་ཡབ་དེས་དེ་ནི་མཚན་མཁན་དང་། རྩིས་པ་དང་། ཀལ་དཱི་པ་དང་། ཆ་མཁན་རྣམས་ཀྱི་འགོ་པར་མཛད་པ་ཡིན། ༡༢ དེ་ཅིའི་ཕྱིར་ཞེ་ན། རྒྱལ་པོས་བེལ་ཏེ་ཤ་ཙར་དུ་མིང་བཏགས་པའི་དཱ་ནི་ཨེལ་དེ་རང་གི་ནང་ན་སེམས་ཉིད་ཁྱད་པར་ཅན་ཞིག་དང་། ཤེས་རབ་དང་། བློ་གྲོས་དང་། རྨི་ལམ་གྱི་དོན་འགྲེལ་བ་དང་། བཀབ་ཚིག་མངོན་དུ་བྱེད་པ་དང་། རྣམ་རྟོག་སེལ་བའི་ཡོན་ཏན་བརྙེད་པ་ཡིན་པས། དཱ་ནི་ཨེལ་འབོད་དུ་ཆུག་ལ། ཁོས་དོན་འགྲེལ་བར་འགྱུར་རོ་ཞེས་བསྐུལ་ཏོ༎

༡༣ དེ་ནས་དཱ་ནི་ཨེལ་རྒྱལ་པོའི་དྲུང་དུ་དྲངས་ནས། རྒྱལ་པོས་དཱ་ནི་ཨེལ་ལ་གཏམ་བྱས་ཏེ། ངའི་ཡབ་རྒྱལ་པོས་ཡ་ཧུ་དཱ་ནས་དྲངས་པའི་ཡ་ཧུ་དཱའི་བཙོན་པ་རྣམས་ཀྱི་ནང་ནས་ཡིན་པའི་དཱ་ནི་ཨེལ་དེ་ཁྱེད་རང་ཡིན་ནམ། ༡༤ ཁྱེད་ཀྱི་ནང་ན་ལྷ་རྣམས་ཀྱི་སེམས་ཉིད་ཡོད་པ་དང་། འོད་དང་། བློ་གྲོས་དང་། ཡེ་ཤེས་ཁྱད་པར་ཅན་ཞིག་ཡོད་པའི་གྲགས་པ་ངས་ཐོས་སོ། ༡༥ དེའང་བྲིས་པ་དེ་ཕྱེད་མཁན་དང་། དེའི་དོན་འགྲེལ་ང་ལ་སྟོན་དུ་མི་མཁས་པའམ་རྩིས་པ་རྣམས་ངའི་དྲུང་དུ་འོངས་ཀྱིས། དེ་དག་གིས་བདག་ལ་དེའི་དོན་འགྲེལ་བསྟན་པར་མ་ནུས་སོ། ༡༦ འོན་ཀྱང་ཁྱེད་ཀྱིས་དོན་འགྲེལ་ནུས་པ་དང་། རྣམ་རྟོག་སེལ་བའི་གཏམ་ངས་ཐོས། ད་ཇི་སྟེ་ཁྱེད་ཀྱིས་བྲིས་པ་དེ་བཀླགས་ཏེ། དེའི་དོན་འགྲེལ་ན། ཁྱེད་ལ་མགོ་ལུས་མཚལ་ཁ་དང་། མཇིང་བར་གསེར་གྱི་འཕྲེང་བས་བརྒྱན་ཞིང་། རྒྱལ་སྲིད་ཀྱི་བློན་པོ་གསུམ་པར་འགྱུར་བར་འགྱུར་རོ་ཞེས་སྨྲས་སོ༎

༡༧ དེ་ནས་དཱ་ནི་ཨེལ་གྱིས་རྒྱལ་པོའི་དྲུང་དུ་ལན་དུ། ཁྱེད་ཀྱི་རྔན་པ་རྣམས་ཁྱེད་རང་གི་རྩར་ལུས་ཆུག ཡང་ཁྱེད་ཀྱི་བྱ་དགའ་དེ་གཞན་ལ་སྩོལ་ཞིག དེ་ནས་ཀྱང་བྲིས་པ་དེ་རྒྱལ་པོའི་དོན་དུ་ཀློག་པར་བྱ་ཞིང་། དེའི་དོན་ཁོང་ལ་འགྲེལ་བར་བྱའོ། ༡༨ ཀྱེ་རྒྱལ་པོ། བླ་ན་མེད་པའི་དཀོན་མཆོག་གིས་ཁྱེད་ཀྱི་ཡབ་ནེ་བུ་ཀད་ནེ་ཙར་ལ་རྒྱལ་སྲིད་དང་། ཆེ་བ་དང་། དཔལ་དང་། བཀུར་སྟི་གནང་བར་མཛད་དེ། ༡༩ ཁོང་གིས་གནང་བའི་གཟི་བརྗིད་ཀྱི་དབང་གིས་མི་སྡེ་དང་། མི་རིགས་དང་། སྐད་རིགས་ཐམས་ཅད་དེའི་དྲུང་དུ་འདར་ཞིང་བསྐྲགས་པར་གྱུར་ཏོ། ཁོང་གིས་གང་དགའ་བ་བསད། གང་དགའ་བ་གསོན་པོར་བཞག གང་དགའ་བ་མཐོ་སར་སྤར། གང་དགའ་བ་དམའ་སར་ཕབ། ༢༠ འོན་ཀྱང་དེའི་སྙིང་ན་རང་མཐོང་བསྐྱེད་དེ། དེའི་སྙིང་ང་རྒྱལ་གྱིས་སྲ་བར་གྱུར་པའི་ཚེ། རང་གི་རྒྱལ་ཁྲི་ལས་ཕབ་ནས། དེའི་གཟི་བརྗིད་འཕྲོག་པར་གྱུར་ཏོ། ༢༡ བླ་ན་མེད་པའི་དཀོན་མཆོག་གིས་མིའི་རྒྱལ་ཁམས་ཀྱི་ནང་ན་སྲིད་མཛད་ཅིང་། དེའི་ཐོག་ཏུ་གང་ལ་མཉེས་པ་དེ་སྐོ་བར་མཛད་པ། ཁོས་ངོ་མ་འཕྲོད་པའི་བར་དུ། མིའི་བུ་རྣམས་ཀྱི་དཀྱིལ་ནས་བསྐྲད་པར་གྱུར་ཏེ། དེའི་སྙིང་དུད་འགྲོའི་སྙིང་འདྲ་བར་མཛད་ནས། རྐྱང་རྣམས་དང་མཉམ་དུ་གནས་ཤིང་། དེ་ལ་གླང་ལྟར་རྩྭ་བསྟེར་ཏེ། དེའི་ལུས་གནམ་གྱི་ཟིལ་པས་སྦངས་སོ། ༢༢ འོན་ཀྱང་ཁོང་གི་སྲས་ལགས་པ་ཁྱེད་ཀྱེ་བེལ་ཤ་ཙར། ཁྱེད་ལ་འདི་ཐམས་ཅད་ཀྱི་རྒྱུས་ཡོད་པའི་སྟེང་དུའང་། རང་གི་སྙིང་གུས་པ་བྱེད་པ་མ་ཟད། ༢༣ ནམ་མཁའི་གཙོ་བོའི་ཞལ་ངོར་རང་མཐོང་བསྐྱེད་དེ། ཁོང་གི་ཕོ་བྲང་གི་མཆོད་རྫས་རྣམས་དེ་དག་གིས་ཁྱེད་ཀྱི་དྲུང་དུ་དྲངས་ནས། ཁྱེད་རང་དང་། རང་གི་སྐུ་དྲག་རྣམས་དང་། རང་གི་བཙུན་མོ་རྣམས་དང་། ཟུར་གྲོགས་རྣམས་ཀྱིས་དེ་དག་གི་ནང་དུ་རྒུན་ཆང་བཏུང་སྟེ། མི་མཐོང་བ་དང་། མི་ཐོས་པ་དང་། འདུ་བཤེས་མེད་པའི་རང་གི་དངུལ། གསེར། ར་གན། ལྕགས། ཤིང་དང་། རྡོ་བའི་ལྷ་རྣམས་ལ་བསྟོད་བསྔགས་བྱས། འོན་ཀྱང་གང་གི་ཕྱག་ཏུ་ཁྱེད་ཀྱི་སྙིང་དང་། གང་གི་དབང་དུ་ཁྱེད་ཀྱི་ལམ་ཐམས་ཅད་ཡོད་པའི་དཀོན་མཆོག་ཁོང་ལ་མ་བསྟོད་དོ། ༢༤ དེའི་ཕྱིར་དུ་ཁོང་གི་ཕྱོགས་ནས་ལག་པའི་མཛུབ་མོ་དེ་རྣམས་མངགས་ནས། ཡི་གེ་འདི་བྲིས་སོ༎

༢༥ ཡང་བྲིས་པའི་ཡི་གེ་ནི་འདི་ལྟ་སྟེ། མེ་ནེ། མེ་ནེ། ཐེ་ཀཱེལ། ཨུ་ཕར་སིན། ༢༦ མེ་ནེ་ཞེས་པའི་ཚིག་གི་དོན་ནི། དཀོན་མཆོག་གིས་ཁྱེད་ཀྱི་རྒྱལ་སྲིད་ཀྱི་རྩིས་མཛད་ནས་དེ་ཟད་པར་མཛད་དོ། ༢༧ ཐེ་ཀཱེལ་གྱི་དོན་ནི། ཁྱེད་སྲང་ལ་བཅལ་ནས་མ་ལོངས། ༢༨ ཕེ་རེས་ཀྱི་དོན་ནི། ཁྱེད་ཀྱི་རྒྱལ་ཁམས་བགོ་བཤའ་མཛད་ནས། མ་དཱ་ཨི་པ་དང་ཏ་ཟིག་པ་རྣམས་ལ་བཏང་ཟིན་ཏོ་ཞེས་སྨྲས་སོ། ༢༩ དེ་ནས་བེལ་ཤ་ཙར་གྱིས་བཀའ་གནང་ཞིང་། དཱ་ནི་ཨེལ་ལ་མགོ་ལུས་མཚལ་ཁ་བསྐོན་ནས། དེའི་མཇིང་པར་གསེར་གྱི་འཕྲེང་བ་བཏགས་ཏེ། རྒྱལ་ཁམས་ཀྱི་བློན་པོ་གསུམ་པར་གྱུར་པའི་བཀའ་སྒྲོག་ཏུ་བཅུག་གོ། ༣༠ མཚན་མོ་དེ་རང་ལ་ཀལ་དཱི་པའི་རྒྱལ་པོ་བེལ་ཤ་ཙར་བསད་ནས། ༣༡ མ་དཱ་ཨི་པ་དར་ཡཱས་ཁོ་རང་ལོ་དྲུག་ཅུ་རེ་གཉིས་པའི་ནང་དུ་རྒྱལ་སྲིད་དེ་བླངས་སོ༎