ཡང་བདག་ལ་ཡ་ཧོ་ཝཱའི་བཀའ་བྱུང་ནས་འདི་སྐད་དུ། ༢ ཀྱེ་མིའི་བུ། རོས་དང་། མེ་ཤེག་དང་། ཐུ་བལ་གྱི་རྗེ་དཔོན་ཡིན་པའི་མ་གོག་ཡུལ་གྱི་གོག་གི་ཕྱོགས་སུ་རང་གི་གདོང་སྒྱུར་ལ། དེ་སྐོར་དུ་ལུང་སྟོན་ཞིང་། ༣ འདི་སྐད་གྱིས་ཤིག ཡ་ཧོ་ཝཱ་གཙོ་བོས་འདི་སྐད་གསུང་། ལྟོས་ཤིག ཀྱེ་གོག རོས་དང་མེ་ཤེག་དང་ཐུ་བལ་གྱི་རྗེ་དཔོན་ཁྱོད་ནི་ངས་དགྲར་འཛིན་པས། ༤ ངས་ཁྱོད་བཟློགས་ཏེ། ཁྱོད་ཀྱི་འགྲམ་པ་རྣམས་ནང་ལྕགས་ཀྱུ་རྒྱུས་ནས། ཁྱོད་རང་དང་། ཐམས་ཅད་དམག་ཆས་སྤྲས་པའི་ཁྱོད་ཀྱི་དམག་དཔུང་དང་། རྟ་དང་། རྟ་པ་ཐམས་ཅད་ཕུབ་དང་ཕ་ལི་ཐོགས་ཤིང་རལ་གྲི་འཁུར་བའི་དཔུང་ཆེན་པོ་དང་བཅས་ཁྱོད་འདྲུད་འཁྱེར་བར་བྱ། ༥ དེ་དག་དང་བཅས་སུ་ཐམས་ཅད་ཀྱིས་ཕུབ་ཐོགས་ཤིང་རྨོག་གྱོན་པའི་ཏ་ཟིག་དང་། ཀུས་དང་། ཕུད་དང་། ༦ གོ་མེར་དང་། དེའི་དཔུང་ཐམས་ཅད་དང་། བྱང་རྒྱང་རིང་གི་ཐོ་གར་མཱ་དང་། དེའི་དཔུང་ཚོགས་ཚང་མ་དང་། ཁྱོད་དང་འགྲོགས་པའི་མི་སྡེ་དུ་མ་ཐམས་ཅད་ཀྱང་། ༧ ད་སྟ་གོན་གྱིས་ཤིག ཁྱོད་དང་ཁྱོད་ཀྱི་དམག་དཔུང་ཚང་མ་དང་། ཁྱོད་དྲུང་ཚོགས་པས་སྟ་གོན་གྱིས་ཤིག ཁྱོད་ཀྱིས་དེ་དག་གི་མགོ་འདྲེན་བྱོས་ཤིག ༨ ཡང་ཞག་མང་པོའི་འོག་ཏུ་ཁྱོད་ལ་ཞིབ་དཔྱོད་བྱེད་པར་འགྱུར་ཏེ། ལོ་མང་པོའི་འོག་ཏུ་རལ་གྲི་ལས་སྐྱོབས་པའི་ཡུལ་དེའི་ནང་དུ་ཁྱོད་སླེབ་པར་འགྱུར། གང་དུ་ཞེ་ན། མི་སྡེ་སོ་སོའི་ནང་ནས་བསྡུས་ཤིང་། ནམ་ནས་སྟོངས་ཡོད་པའི་ཨིས་ར་ཨེལ་གྱི་རི་རྣམས་ཁར། ཡུལ་སོ་སོ་ལ་བཏོན་ཁྱེར་ཏེ། ཐམས་ཅད་ཉེ་ཞོ་མེད་པར་དེར་གནས་པའི་ཡུལ་དུའོ། ༩ ཁྱོད་ཀྱིས་རླུང་དམར་ལྟར་དམག་འདེགས་ཤིང་། ཁྱོད་ཀྱི་དམག་ཚོགས་དང་མི་སྡེ་དུ་མ་ཁྱོད་མཉམ་ཡོད་པས། སྤྲིན་ལྟར་ས་གཞི་འགེབས་ནས་འོང་བར་བྱ།