དེ་ནས་ཡ་ཧོ་ཝཱའི་བཀའ་བདག་ལ་བྱུང་ཞིང་། འདི་སྐད་དུ། ༢ ཀྱེ་མིའི་བུ། ཁྱོད་ཡེ་རུ་ཤ་ལེམ་གྱི་ཕྱོགས་སུ་གདོང་པ་སྒྱུར་ལ། གཙང་ཁང་རྣམས་ཀྱི་ཐད་དུ་རང་གི་གཏམ་འཕེན་ཞིང་། ཨིས་ར་ཨེལ་ཡུལ་ཁམས་ལ་གནོད་པའི་ལུང་སྟོན་ཞིག ༣ ཨིས་ར་ཨེལ་ཡུལ་ཁམས་ལ་སྨྲོས་ཤིག ཡ་ཧོ་ཝཱས་འདི་སྐད་གསུང་། ལྟོས་ཤིག ངས་ཁྱོད་ལ་སྡང་བས། ཤུབས་ཀྱི་ནང་ནས་ཉིད་ཀྱི་རལ་གྲི་བཏོན་ཏེ། ཆོས་དྲང་པོ་དང་སྡིག་སྤྱོད་གཉིས་པོ་ཁྱོད་ལས་འཕྲལ་བར་བྱ། ༤ ཆོས་དྲང་པོ་དང་སྡིག་སྤྱོད་གཉིས་པོ་ཁྱོད་ལས་འཕྲལ་བར་བྱའོ། དེའི་ཕྱིར་ངའི་རལ་གྲི་ཤུབས་ཀྱི་ནང་ནས་འཐོན་ཞིང་། ལྷོ་ཕྱོགས་ནས་བྱང་ཕྱོགས་ཀྱི་བར་དུ་སྲོག་ཆགས་ཡོངས་ཀྱི་ཕྱོགས་སུ་འགྲོ་བར་འགྱུར། ༥ དེ་ནས་ཤ་ཡོད་དོ་ཅོག་གིས་ཁོ་བོ་ཡ་ཧོ་ཝཱས་ཉིད་ཀྱི་རལ་གྲི་ཤུབས་ཀྱི་ནང་ནས་ཕྱུང་བ་ཡིན་པ་རྟོགས་པར་འགྱུར་ཏེ། སླར་ཤུབས་ཀྱི་ནང་དུ་ལོག་འགྲོ་བར་མི་འགྱུར། ༦ དེ་བས་ན་ཀྱེ་མིའི་བུ། རྐེད་པ་ཆག་གིན་ཤུགས་ནར་ཕྱུང་ཞིག་དང་། དེ་ཚོ་ཡི་མིག་གི་མདུན་དུ་ཁ་ཏིག་པའི་ཁོང་ཤུགས་ཕྱུང་ཞིག ༧ དེ་ནས་དེ་དག་གིས་ཁྱོད་ལ། ཅིའི་དོན་དུ་ཤུགས་ནར་འབྱིན། ཞེས་འདྲི་བའི་ལན་དུ། འཕྲིན་གྱི་ཕྱིར་འབྱིན། དེ་ཅིའི་ཕྱིར་ཞེ་ན། དེ་འོང་གིན་གདའ། སྙིང་ཐམས་ཅད་འཇུ་ཞིང་། ལག་རྩ་ཐམས་ཅད་ལྷོད་ཅིང་། སེམས་ཉིད་ཚང་མ་བརྒྱལ་ཞིང་། པུས་མོ་ཀུན་ཆུ་ལྟར་ཞན་པར་འགྱུར་རོ། ལྟོས་དང་། དེ་འོང་གིན་གདའ་བས། དེ་བཞིན་འབྱུང་བར་འགྱུར་རོ། ཡ་ཧོ་ཝཱ་དཀོན་མཆོག་གིས་གསུང་ངོ་༎