དེའང་མི་སེར་ཡུལ་དང་། མིག་དོལ་དང་། ཏཱ་ཕན་ཧེས་དང་། ནཱོབ་དང་། ཕད་རོས་ཡུལ་འཁོར་དུ་གཞིས་ཆགས་ཡོད་པའི་ཡ་ཧུ་དཱ་པ་ཚང་མའི་ཕྱིར་ཡེ་རེམ་ཡཱར་བྱུང་བའི་བཀའ་མཆིད་དེ་ནི། ༢ དཔུང་ཆེན་རྣམས་ཀྱི་ཡ་ཧོ་ཝཱ་ཨིས་ར་ཨེལ་གྱི་དཀོན་མཆོག་གིས་འདི་སྐད་གསུང་། ཁོ་བོས་ཡེ་རུ་ཤ་ལེམ་དང་ཡ་ཧུ་དཱའི་གྲོང་ཁྱེར་ཐམས་ཅད་ཀྱི་ཐོག་ཏུ་ཕབ་པའི་རྐྱེན་ངན་དེ་ཚང་མ་ཁྱོད་ཅག་རང་གིས་མཐོང་བ་ཡིན། ད་ལྟོས་ཤིག དེ་རིང་ནི་དེ་རྣམས་སྟོངས་ཏེ། གནས་མཁན་གཅིག་ཀྱང་དེར་མེད། ༣ དེ་ནི་དེ་དག་གམ། ཁྱོད་ཅག་གམ། ཁྱོད་ཅག་གི་ཕ་མེས་རྣམས་ལ་ཆ་མེད་པའི་ལྷ་གཞན་རྣམས་ཀྱི་དྲུང་དུ་བསངས་གཏོང་བ་དང་ཕྱག་འཚལ་དུ་སོང་བའི་ངང་ནས། ངའི་ཐུགས་ཁྲོ་དཀྲུག་པའི་ཕྱིར་བྱས་པའི་ལས་ངན་གྱི་རྐྱེན་གྱིས་ཡིན་ཏེ། ༤ འོན་ཀྱང་ཁོ་བོས་ཁྱོད་ཅག་གི་དྲུང་དུ་ཉིད་ཀྱི་ཞབས་ཏོག་པའི་ལུང་སྟོན་པ་ཚང་མ་མངགས་ཤིང་། སྔ་གསར་བཞེངས་ནས་རྫོང་ཞིང་། ཁོ་བོས་ཁྱོད་ཅག་ལ། ངས་ཞེན་ལོག་པའི་སྐྱུག་བྲོ་བོ་དེ་མ་བྱེད་ཅིག་ཅེས་བསྒོ་ནའང་། ༥ དེ་དག་རང་གི་ལས་ངན་ལ་རྒྱབ་ལོག་བསྟན་ཏེ། ལྷ་གཞན་ལ་བསངས་མི་གཏོང་བའི་ཚིག་ལ་དེ་དག་གིས་ཉན་པར་ཡང་མ་བྱས། རྣ་བའང་མ་བཏུད་པའི་རྐྱེན་གྱིས། ༦ ངའི་ཐུགས་ཁྲོ་དང་ཁྲོ་གཏུམ་ཕོས་པ་དང་། ཡ་ཧུ་དཱའི་གྲོང་ཁྱེར་རྣམས་དང་། ཡེ་རུ་ཤ་ལེམ་གྱི་ལམ་སྲང་རྣམས་ནང་མེ་ལྟར་འབར་བས། དེ་རིང་སང་ཡོད་པ་ལྟར་དེ་དག་བཤིག་ནས་སྟོངས་པར་བྱས་སོ། ༧ དེས་ན་ད་ལྟ་དཔུང་ཆེན་རྣམས་ཀྱི་དཀོན་མཆོག་ཡ་ཧོ་ཝཱ་ཨིས་ར་ཨེལ་གྱི་དཀོན་མཆོག་གིས་འདི་སྐད་གསུང་། ཡ་ཧུ་དཱའི་ནང་ནས་སྐྱེས་པ་དང་། བུད་མེད་དང་། བྱིས་པ་དང་། འོ་འཐུང་རྣམས་མེད་པར་བྱེད་ཅིང་། ཁྱོད་ཅག་གི་ནང་ནས་གང་ཡང་མི་ལུས་པའི་དོན་དུ། ཁྱོད་ཅག་རང་གི་སྲོག་ལ་གནོད་པ་ཆེན་པོ་འདི་ཅི་ལ་བྱེད། ༨ ཁྱོད་ཅག་རང་མེད་པར་གྱུར་ཏེ། སའི་མི་རིགས་ཐམས་ཅད་ཀྱི་དཀྱིལ་ན་དམོད་པ་དང་སྨད་སྒྲར་འགྱུར་དུ། གཞིས་བཟུང་དུ་ཕྱིན་པའི་མི་སེར་ཡུལ་ཁམས་ཀྱི་ནང་ན། རང་གི་ལག་པས་བཅོས་མཁན་དང་། ལྷ་གཞན་རྣམས་ལ་བསངས་བཏང་བའི་སྒོ་ནས་བདག་ལ་ཚིག་པ་འཁོལ་དུ་འཇུག་གོ། ༩ ཡ་ཧུ་དཱའི་ཡུལ་ཁམས་དང་ཡེ་རུ་ཤ་ལེམ་གྱི་ལམ་སྲང་རྣམས་ནང་བྱས་པའི་ཁྱོད་ཅག་གི་ཕ་མེས་རྣམས་ཀྱི་ལས་ངན་དང་། ཡ་ཧུ་དཱའི་རྒྱལ་པོ་རྣམས་ཀྱི་ལས་ངན་དང་། དེ་དག་གི་བཙུན་མོ་རྣམས་ཀྱི་ལས་ངན་དང་། ཁྱོད་ཅག་རང་གི་ལས་ངན་དང་། ཁྱོད་ཅག་གི་ཆུང་མ་རྣམས་ཀྱི་ལས་ངན་རྣམས་ཁྱོད་ཚོས་བརྗེད་སོང་ངམ། ༡༠ དེ་དག་ནི་ཉི་མ་དེ་རིང་གི་བར་དུ་སྙིང་ཡང་མ་ཆག འཇིགས་ཀྱང་མ་འཇིགས། ངས་ཁྱོད་ཅག་དང་ཁྱོད་ཅག་གི་ཕ་མེས་རྣམས་ཀྱི་མདུན་དུ་བཞག་པའི་ངའི་བཀའ་རྒྱ་དང་། སྤྱད་མཚམས་རྣམས་ཀྱི་ནང་དུའང་མ་འགྲུལ་ཏོ༎