ཡེ་རུ་ཤ་ལེམ་བཟུང་བ་ནི་འདི་ལྟར་རོ། ཡ་ཧུ་དཱའི་རྒྱལ་པོ་ཚེ་དེག་ཡཱའི་ལོ་དགུ་པའི་ཟླ་བ་བཅུ་པའི་ནང་དུ་བཱ་བེལ་རྒྱལ་པོ་ནེ་བུ་ཀད་ནེ་ཙར་རང་གི་དམག་དཔུང་ཐམས་ཅད་དང་བཅས་སུ། ཡེ་རུ་ཤ་ལེམ་གྱི་ཐད་དུ་འོངས་ནས། དེ་ལ་དམག་བསྐོར་བཏང་སྟེ། ༢ ཚེ་དེག་ཡཱའི་ལོ་བཅུ་གཅིག་པའི་ཟླ་བ་བཞི་པའི་ཚེས་དགུ་པར་གྲོང་ཁྱེར་དེ་ཆག་པར་གྱུར་ཏོ། ༣ བཱ་བེལ་རྒྱལ་པོའི་སྐུ་དྲག་ཐམས་ཅད་དམ། ནེར་གལ་ཤར་ཨེ་ཟེར། སམ་གར་ནེ་བོ། སར་སེ་ཀིམ། རབ་ས་རིས། ནེར་གལ་ཤར་ཨེ་ཟེར། རབ་མག་དང་། བཱ་བེལ་རྒྱལ་པོའི་སྐུ་དྲག་གཞན་ཀུན་དང་བཅས་པ་ནང་དུ་ཞུགས་ནས། རྒྱ་སྒོ་དཀྱིལ་མར་བསྡད་དོ། ༤ དེ་ནས་ཡ་ཧུ་དཱའི་རྒྱལ་པོ་ཚེ་དེག་ཡཱ་དང་དམག་གི་སྐྱེ་བོ་ཀུན་གྱིས་དེ་དག་མཐོང་ནས་བྲོས་ཏེ། མཚན་མོར་རྒྱལ་པོའི་སྐྱེད་ཚལ་གྱི་ལམ་ལས་ལྕགས་རི་གཉིས་ཀྱི་བར་གྱི་སྒོ་ནས་རྒྱལ་ས་ལས་ཐོན་ཏེ། ཐང་ལམ་དུ་ཞུགས་པ་དང་། ༥ ཀལ་དཱི་པའི་དམག་དཔུང་གིས་དེ་དག་ལ་བདས་ནས། ཡེ་རི་ཀོའི་ཐང་རྣམས་སུ་ཚེ་དེག་ཡཱར་ནོན་ཏེ་བཟུང་ནས། ཧ་མད་ཀྱི་ཉེ་འཁོར་གྱི་རིབ་ལཱ་བྱ་བར་བཱ་བེལ་རྒྱལ་པོ་ནེ་བུ་ཀད་ནེ་ཙར་གྱི་དྲུང་དུ་ཁྲིད་པ་དང་། དེར་དེས་ཁོང་གི་ཞལ་ཆེ་བཅད་དེ། ༦ བཱ་བེལ་རྒྱལ་པོས་རིབ་ལཱ་རུ་ཚེ་དེག་ཡཱའི་བུ་རྣམས་དེའི་མིག་གི་མདུན་དུ་བསད་དེ། བཱ་བེལ་རྒྱལ་པོས་ཡ་ཧུ་དཱའི་སྐུ་དྲག་ཐམས་ཅད་ཀྱང་བསད་དོ། ༧ དེ་མ་ཟད་ཚེ་དེག་ཡཱའི་མིག་གཉིས་པོའང་བཏོན་ནས། བཱ་བེལ་དུ་འཁྱེར་རྒྱུར་ར་གན་གྱི་སྒྲོག་གཉིས་བརྒྱབས་སོ། ༨ ཡང་ཀལ་དཱི་པ་རྣམས་ཀྱིས་རྒྱལ་ཁབ་དང་། མི་སྡེའི་ཁང་པ་རྣམས་མེས་བསྲེགས་ནས། ཡེ་རུ་ཤ་ལེམ་གྱི་ལྕགས་རི་རྣམས་བསློགས་སོ། ༩ དེ་ནས་སྐུ་བསྲུང་པའི་དཔོན་པོ་ནེ་བུ་ཟར་ཨ་དཱན་གྱིས་རྒྱལ་སའི་ནང་དུ་ལུས་ཡོད་པའི་མི་དང་། དེའི་རྩར་བྲོས་ཡོད་པ་དང་། མི་སྡེའི་ནང་ནས་ལུས་ཡོད་པའི་མི་རྣམས་བཙོན་དུ་བཟུང་ནས་བཱ་བེལ་དུ་ཁྱེར་གྱིས། ༡༠ སྐུ་བསྲུང་དཔོན་པོ་ནེ་བུ་ཟར་ཨ་དཱན་གྱིས་མི་སྡེའི་ཁྲོད་ལས་ཅིའང་མེད་པའི་དབུལ་ཕོངས་རྣམས་ཡ་ཧུ་དཱར་བཞག་ནས། ཉིན་དེ་རང་དུ་འདི་དག་ལ་རྒུན་ཚལ་དང་ཞིང་བསྟེར་ཏོ༎