བཱ་བེལ་རྒྱལ་པོ་ནེ་བུ་ཀད་ནེ་ཙར་གྱིས་ངེད་ལ་གཡུལ་འགྱེད་པས། ངེད་ཀྱི་དོན་དུ་ཡ་ཧོ་ཝཱ་ལ་ཐུགས་བརྟག་ཞུས་ཤིག ཁོང་གི་ཕྲིན་ལས་ངོ་མཚར་ཆེ་བ་དང་བསྟུན་ནས་ཁོ་ངེད་ལས་ཕར་འགྲོ་བའི་ཐབས་མཛད་ལས་ཆེའོ། བྱས་ཏེ། ༢ ཡེ་རེམ་ཡཱ་ལ་ཞུ་བའི་ཕྱིར་རྒྱལ་པོ་ཚེ་དེག་ཡཱས་མལ་ཀི་ཡཱའི་བུ་ཕ་ཤུར་དང་། བླ་མ་མ་ཨ་སེ་ཡཱའི་བུ་ཟེ་ཕན་ཡཱ་གཉིས་མངགས་པའི་ཚེ། ཡ་ཧོ་ཝཱ་ལས་ཡེ་རེམ་ཡཱ་ལ་བྱུང་བའི་བཀའ་ལུང་ནི། ༣ དེར་ཡེ་རེམ་ཡཱས་དེ་དག་ལ་འདི་ན་རེ། ཁྱོད་ཚོས་ཚེ་དེག་ཡཱ་ལ་འདི་ལྟར་ཞུས་ཤིག ༤ ཡ་ཧོ་ཝཱ་ཨིས་ར་ཨེལ་གྱི་དཀོན་མཆོག་གིས་འདི་སྐད་གསུང་། ལྟོས་ཤིག ལྕགས་རིའི་ཕྱི་རོལ་ནས་ཁྱོད་རྣམས་ལ་བསྐོར་ཡོད་པའི་བཱ་བེལ་རྒྱལ་པོ་དང་ཀལ་དཱི་པ་རྣམས་དང་འཐབ་པར་ཁྱོད་ཅག་གི་ལག་པར་ཡོད་པའི་མཚོན་ཆ་རྣམས་ངས་རྒྱབ་ཏུ་ཟློག་པར་བྱ་སྟེ། དེ་དག་གྲོང་ཁྱེར་འདིའི་དབུས་སུ་སྤུང་བར་བྱའོ། ༥ ཡང་ངས་ཉིད་ཀྱི་ཐར་བརྐྱངས་ཡོད་པའི་ཕྱག་དང་། ཕྲག་པ་སྟོབས་ལྡན་གྱིས་མ་ཟད། ཁྲོ་བ་དང་། ཁོང་ཁྲོ་དང་། ཁྲོ་གཏུམ་ཆེན་པོས་ཁྱོད་ཅག་ལ་འཐབ་ཅིང་། ༦ ངས་གྲོང་ཁྱེར་འདིར་གནས་པའི་མི་དང་དུད་འགྲོ་གཉིས་པོ་གསོད་པར་བྱ་ཞིང་། རིམས་ནད་ཆེན་པོས་དེ་རྣམས་འཆི་བར་འགྱུར་རོ། ༧ ཡང་བྱ་བ་དེའི་འོག་ཏུ། ཡ་ཧུ་དཱའི་རྒྱལ་པོ་ཚེ་དེག་ཡཱ་དང་། དེའི་འཁོར་རྣམས་དང་། མི་སྡེ་རྣམས་སམ། གྲོང་ཁྱེར་འདིར་རལ་གྲི་དང་མུ་གེ་ལས་ལུས་པ་དག བཱ་བེལ་རྒྱལ་པོ་ནེ་བུ་ཀད་ནེ་ཙར་གྱི་ལག་ཏུ་དང་། དགྲའི་ལག་ཏུ་དང་། དེ་དག་གི་སྲོག་ལ་སྙེགས་པ་རྣམས་ཀྱི་ལག་ཏུ་གཏོད་པར་བྱ་བ་དང་། དེས་འདི་དག་ལ་རལ་གྲིའི་ཁས་རྒྱབ་ཅིང་། དེ་དག་ལ་འཕངས་པའམ། བརྩེ་བའམ། སྙིང་རྗེ་བྱེད་པར་མི་འགྱུར་རོ། ཞེས་ཡ་ཧོ་ཝཱས་གསུང་ངོ་༎