ཧའེ་ཧའེ། ངས་རང་གི་མི་སྡེའི་བུ་མོའི་བསད་པར་གྱུར་པ་རྣམས་ཀྱི་དོན་དུ་ཉིན་མཚན་མེད་པར་ངུ་བའི་ཕྱིར། ང་ལ་ཆུ་རྣམས་ཀྱི་མགོ་དང་། མཆི་མའི་ཆུ་མིག་གི་མིག་རྣམས་ང་ལ་ཡོད་ན་ཅི་མ་རུང་། ༢ ཧའེ་ཧའེ། ངས་ཉིད་ཀྱི་མི་སྡེ་འཇོག་པ་དང་། དེ་དག་ལས་བཞུད་དུ་འབྲོག་སྟོང་གི་ནང་ན་ང་ལ་བྱེས་པའི་བྲང་ས་ཞིག་ཡོད་པ་ཡིན་ན་ཅི་མ་རུང་། གང་ལ་ཞེ་ན། དེ་ཐམས་ཅད་གཡེམ་བྱེད་དང་། ལོག་པར་ཅན་གྱི་མི་ཚོགས་ཤིག་སྟེ། ༣ རྫུན་ལབ་ཏུ་རང་གི་ལྕེ་གཞུ་ལྟར་སྐྱིལ། དྲང་པོ་བྱེད་པའི་ངང་ནས་ཡུལ་ཁམས་ཀྱི་ནང་དུ་སྟོབས་ལྡན་དུ་མ་གྱུར་ཏོ། དེ་ཅིའི་ཕྱིར་ཞེ་ན། དེ་དག་ངན་པའི་ནང་ནས་ངན་པའི་ནང་དུ་འགྲོ་ཞིང་། ངའི་ངོ་མི་ཤེས་པའི་ཕྱིར་རོ། ཞེས་ཡ་ཧོ་ཝཱས་གསུང་ངོ་། ༤ མི་རེས་རང་གི་ཁྱིམ་མཚེས་ལ་དོགས་ཟོན་གྱིས་ཤིག ཡང་སྤུན་སུ་ལའང་ཡིད་མ་ཆེས་ཤིག གང་ལ་ཞེ་ན། སྤུན་རེ་ཡིས་སྤྲ་ལག་བྱེད། ཁྱིམ་མཚེས་རེ་རེ་བཞིན་གྱིས་གཏམ་ངན་སྒྲོག་གིན་འཁོར། ༥ རེ་རེ་ཡིས་རང་གི་ཁྱིམ་མཚེས་པའི་མགོ་སྐོར་ཞིང་། བདེན་ཚིག་མི་གླེང་། དེ་དག་གིས་རྫུན་ཚིག་གླེང་ལུགས་རང་གི་ལྕེ་ལ་བསླབས་ཏེ། མི་དགེ་བ་སྤྱོད་ཅིང་དེ་དག་ངལ། ༦ མགོ་བསྐོར་གྱི་དབུས་ན་ཁྱོད་ཀྱི་གནས་ཚང་འདུག ཟོལ་ཟོག་གི་རྐྱེན་གྱིས་ཁོ་བོ་ངོ་འཕྲོད་པར་དེ་དག་མ་འདོད་དོ། ཞེས་ཡ་ཧོ་ཝཱས་གསུང་། ༧ དེ་བས་ན་དཔུང་ཆེན་གྱི་ཡ་ཧོ་ཝཱས་འདི་སྐད་གསུང་། ཀྱེ་ཧོ། ངས་དེ་རྣམས་བཞུས་ཏེ་བསད་པར་བྱའོ། དེ་ཅིའི་ཕྱིར་ཞེ་ན། དེ་མ་གཏོགས་ཉིད་ཀྱི་མི་སྡེའི་བུ་མོའི་དོན་དུ་ངས་གཞན་ཅི་ཞིག་བྱ། ༨ དེ་དག་གི་ལྕེ་ནི་སྲོག་ལེན་གྱི་མདའ་མོ་སྟེ། གཡོ་སྒྱུའི་ངང་ནས་གླེང་ཞིང་། ཁ་ནས་རང་གི་ཁྱིམ་མཚེས་ལ་ཞི་བདེ་ལབ་ཀྱང་། སྙིང་གི་ནང་ནས་དེ་ལ་འཇབ་བོ། ༩ བྱ་བ་འདི་དག་གི་ཕྱིར་ངས་དེ་དག་ལས་ལན་ལེན་པར་མི་བྱའམ། མི་རིགས་འདི་འདྲ་བ་ལ་ངའི་སེམས་ཀྱིས་དགྲ་ལན་མི་གཞལ་ལམ། ཞེས་ཡ་ཧོ་ཝཱས་གསུང་ངོ་༎