གཟི་བརྗིད་ཀྱི་ན་བཟའ་སྐུ་ལ་གསོལ་ཏེ། མཐུ་དབང་ཆེན་པོའི་ནང་ན་གཤེགས་ཤིང་། ཨེ་དོམ་གྱི་ཕྱོགས་ནས་ན་བཟའ་མཚལ་ཁ་གསོལ་ནས། བོས་རཱ་ནས་བྱོན་པ་འདི་སུ་ལགས། དྲང་བ་ཉིད་ཀྱི་ངང་ན་གླེང་ཞིང་སྐྱོབ་པའི་མཐུ་སྟོབས་དང་ལྡན་པ་དེ་ནི་ང་ཡིན་ནོ། ༢ ཁྱེད་ཀྱི་ན་བཟའ་དམར་ཞིང་། རྒུན་གྱི་འཆག་གཞོང་ནང་འཆགས་བྱེད་པའི་མི་དང་འདྲ་བའི་སྐུ་ཆས་ཅིའི་ཕྱིར་གསོལ་བ་ལགས། ༣ ང་གཅིག་པུས་འཆག་གཞོང་ནང་བཅག་པ་ཡིན། མི་བརྒྱུད་རྣམས་ཀྱི་ནང་ནས་གང་ཡང་ང་མཉམ་མེད་པ་ཡིན། འོ་ན། ངས་རང་གི་ཐུགས་ཁྲོའི་ནང་ན་དེ་དག་བརྫིས་ཏེ། ཁྲག་རླུང་གི་ནང་ན་རྐང་གདགས་སུ་བཏང་བས། དེ་དག་གི་ཁོང་ཁྲག་ངའི་གོས་ཁར་གཏོར་ནས། ངས་རང་གི་གོས་ཀུན་བརླགས་སུ་བཅུག་པ་ལགས། ༤ དེ་ཅིའི་ཕྱིར་ཞེ་ན། དགྲ་ལན་ལེན་པའི་ཉིན་མོ་དེ་ངའི་སྙིང་གི་ནང་ན་ཡོད་པས། ངས་སྐྱོབ་པ་རྣམས་ཀྱི་ལོ་དེ་བསླེབས་ཚར། ༥ ཡང་ངས་བལྟས་པས། གྲོགས་བྱེད་མཁན་གཅིག་ཀྱང་མེད། རྒྱབ་སྐྱོར་བྱེད་མི་གང་ཡང་མ་བྱུང་བས། ང་ཧ་ལས་པར་གྱུར་ཏོ། དེ་བས་ན་ང་རང་གི་ཕྲག་པས་ངའི་དོན་དུ་ཐར་པ་དྲངས་ཏེ། ངའི་ཁྲོས་ང་ལ་རྒྱབ་རྟེན་བྱས་སོ། ༦ ཡང་ངས་རང་གི་ཁོང་ཁྲོའི་ནང་ན་མི་བརྒྱུད་རྣམས་བརྫིས་ཏེ། ཁྲག་རླུང་གི་ནང་ན་དུམ་བུར་བཅག་སྟེ། དེ་དག་གི་ཁོང་ཁྲག་ས་ལ་ཕོས་པ་ཡིན།