༣ འོན་ཀྱང་། ཀྱེ་ངན་ཆོས་མའི་བུ་རྣམས། གཡེམ་པོ་དང་སྨད་ཚོང་མའི་བརྒྱུད། མདུན་དུ་ཤོག་ཅིག ༤ ཁྱོད་ཀྱིས་སུ་ལ་ཚིག་པ་སྲེག སུ་ལ་རང་གི་ཁ་གདངས་ཏེ་ལྕེ་ནར་ནར་བྱེད། ཁྱོད་ཉེས་པ་ཅན་གྱི་ཕྲུ་གུ་དང་། གཡོ་སྒྱུ་ཅན་གྱི་བུ་བརྒྱུད་མིན་ནམ། ༥ སྐུ་འདྲ་དང་བཅས་ཤིང་སྡོང་སྔོན་པོ་རེ་རེའི་འོག་ཏུ་འདོད་ཆགས་སྐྱེད་ཅིང་། ལུང་པའི་ནང་དུ་བྲག་སྐྱིབས་ཀྱི་འོག་ཏུ་བྱིས་པ་དག་གི་སྲོག་གཅོད་པ་རྣམས། ༦ ལུང་པའི་ཆུ་རྡོའི་ཁྲོད་ན་ཁྱོད་ཀྱི་ཟ་སྐལ་ཡོད། དེ་ཀ་རྣམས་ཁྱོད་ཀྱི་སྐལ་བ་ཡིན། འོ་ན། དེ་དག་ལ་ཁྱོད་ཀྱིས་གསེར་སྐྱེམས་ཀྱང་བཏང་། ཚོགས་ཀྱང་ཕུལ་བས་ན། འདི་དག་གིས་ངའི་ཁྲོ་ཞི་བར་བྱའམ། ༧ རི་མཐོ་མཐོའི་ཁར་ཁྱོད་ཀྱིས་རང་གི་མལ་ཁྲི་བཞག་སྟེ། ཁྱོད་དེར་ཡང་དམར་མཆོད་འབུལ་དུ་འཛེགས་ཕྱིན་ཏེ། ༨ སྒོ་རྣམས་དང་རི་བཞིའི་རྒྱབ་ཏུ་ཁྱོད་རང་གི་དྲན་རྟེན་བསླངས་ནས། ཁྱོད་ང་དང་གྱེས་ནས་གཞན་གྱི་ཕྱིར་ཁེབས་ཐེན་ནས་འཛེགས་སོང་། རང་གི་མལ་ཁྲི་ཡང་ཆེ་བར་བྱས་ཏེ་དེ་དག་དང་ཆད་བྱས། དེ་དག་གི་མལ་ཁྲི་གར་མཐོང་ཡང་དུང་དུང་བྱེད། ༩ ཡང་རང་ལ་སྣུམ་བྱུགས་ནས་རྒྱལ་པོའི་ཐད་དུ་ཕྱིན་ཏེ། རང་གི་དྲི་བསུང་སྤེལ་ཏེ། རྒྱང་རིང་པོར་ཁྱོད་རང་གི་བང་ཆེན་བཏང་སྟེ། ཁྱོད་ཀྱིས་དམྱལ་བའི་བར་དུའང་རང་གི་དམའ་ཕབ་བོ། ༡༠ ཁྱོད་ཀྱི་བྱེས་ཐག་རིང་ཞིང་ཐང་ཆད་ཀྱང་། ཁྱོད་ཀྱིས་རེ་བ་མེད་དོ་མ་ཟེར་ཏོ། རང་གི་ལག་པའི་ནང་སྲོག་ད་དུང་ཡོད་པས། མ་འཚེར་བ་ཡིན། ༡༡ ཡང་ཁྱོད་ཀྱིས་རྫུན་ལབ་སྟེ། ང་མ་དྲན་པར་སྣང་རྟགས་ཀྱང་མ་བཏང་བས། ཁྱོད་གང་ལ་དངང་སྐྲག་ཅིང་འཇིགས་པ་ཡིན། ངས་སྔོན་མ་ནས་ཁ་རོག་མ་བསྡད་དམ། དེ་ནས་ཀྱང་ཁྱོད་ང་ལ་མི་འཇིགས་སོ། ༡༢ ངས་ཁྱོད་ཀྱི་དྲང་བ་ཉིད་དང་ལས་རྣམས་མངོན་པར་བྱའོ། དེ་ཅིའི་ཕྱིར་ཞེ་ན། དེ་དག་གིས་ཁྱོད་ལ་ཕན་མི་གདགས་སོ། ༡༣ ཁྱོད་ཀྱིས་འོ་དོད་འདོན་པའི་ཚེ་ན་རང་གི་ལྷ་སྐུའི་ཚོགས་ལ་སྐྱོབ་ཏུ་ཆུག་ཅིག འོན་ཀྱང་དེ་རྣམས་རླུང་གིས་འཁྱེར་ཞིང་། ཧས་ཀྱང་དེ་ཐམས་ཅད་འཁྱེར་བར་འགྱུར་གྱིས། བདག་ལ་བློ་གཏད་བཅོལ་བའི་མིས་ས་ལ་དབང་ཞིང་། ངའི་རི་བོ་དམ་པ་ནོར་སྐལ་དུ་རྙེད་པར་འགྱུར། ༡༤ དེ་ནས་སྤུངས་ཤིག སྤུངས་ཤིག ལམ་ཤོམ་ཤིག ངའི་འབངས་ཀྱི་འགྲོ་ལམ་ལས་སླུ་རྡོ་དེ་ཐེན་ཞིག ཅེས་ཟེར་བར་འགྱུར་རོ༎

༡༥ དེ་ཅིའི་ཕྱིར་ཞེ་ན། བླ་ན་མེད་པ་འཕགས་པའི་མཐའ་ཡས་པར་མཆིས་པའི་མཚན་དུ་དམ་པ་ཞེས་བྱ་བས་འདི་སྐད་གསུང་། ང་ནི་འཕགས་པ་དང་དམ་པའི་གནས་སུ་བཞུགས་ཀྱིས། སེམས་གུས་པ་ཅན་དག་གི་སེམས་གསོ་བ་དང་། སྙིང་ཆག་པོ་དག་གི་སྙིང་གསོན་པོར་བྱེད་པའི་དོན་དུ། ང་ནི་སྙིང་ཆག་པོ་དང་སེམས་གུས་པ་ཅན་དག་དང་མཉམ་དུའང་གནས་སོ། ༡༦ གང་ལ་ཞེ་ན། ངས་རྒྱུན་དུ་མི་རྒོལ། རྟག་ཏུ་ཐུགས་འཁྲོ་བར་ཡང་མི་བྱ་སྟེ། བྱས་ན་ངས་མཛད་པའི་སེམས་ཉིད་དང་རྣམ་ཤེས་དག་ངའི་ཞལ་ངོར་ཡལ་བར་འགྱུར་རོ། ༡༧ ང་དེའི་བརྣབས་སེམས་ཀྱི་སྡིག་པར་ཁྲོས་ཏེ་དེ་ལ་བརྡུངས་ནས། ངའི་ཞལ་སྦས་ནས་ཁྲོས་པ་དང་། དེ་རང་གི་སྙིང་གི་ལམ་ནང་ངོ་ལོག་བྱེད་ཀྱིན་ཕྱིན་པ་ཡིན། ༡༨ ངས་དེའི་ལམ་རྣམས་མཐོང་བས། ངས་དེ་གསོ་བར་བྱའོ། ངས་དེའི་ལམ་སྣ་པ་ཡང་བྱ་ཞིང་། དེ་རང་དང་དེའི་མྱ་ངན་བྱེད་པ་དག་ལ་སླར་སེམས་གསོ་སྟེར་བར་ཡང་བྱའོ། ༡༩ ཡ་ཧོ་ཝཱས་འདི་སྐད་གསུང་། ངས་ཁ་ལྤགས་ཀྱི་འབྲས་བུ་སྐྱེད་པར་བྱེད། རྒྱང་རིང་པོར་ཡོད་པ་དང་ཉེ་བར་ཡོད་པར་གཉིས་པོར་ཞི་བདེ། ཞི་བདེ། ངས་དེ་གསོ་བར་བྱའོ། ༢༠ འོན་ཀྱང་མི་ངན་དག་ནི་ཞི་བར་མི་ནུས་པའི་རྒྱ་མཚོ་འཁྲུགས་པ་དང་འདྲ་སྟེ། དེའི་ཆུས་འདམ་རྫབ་དང་མི་གཙང་བ་སྲུང་བར་བྱེད། ༢༡ མི་ངན་ལ་ཞི་བདེ་ཅིའང་མེད་ཅེས་ངའི་དཀོན་མཆོག་གིས་གསུང་ངོ་༎