༦ ཡ་ཧོ་ཝཱ་ཐོབ་ཐུབ་དུས་སུ་ཁོང་ཚོལ་ཞིག ཁོང་ཉེ་བར་ཡོད་རིང་ལ་ཁོང་ལ་བོས་ཤིག ༧ མི་ངན་གྱིས་རང་གི་ལམ་དང་། ཆོས་མེད་མིས་རང་གི་བསམ་སྦྱོར་རྣམས་སྤོངས་ཤིག་དང་། ཡ་ཧོ་ཝཱའི་ཐད་དུ་ལོག་ཤོག ཁོང་གིས་ཐུགས་རྗེས་གཟིགས་པར་འགྱུར། ངེད་ཀྱི་དཀོན་མཆོག་སྤྱན་སྔར་དོང་ཞིག་དང་། སྡིག་སེལ་རྒྱས་པ་ཐོབ་པར་འགྱུར་རོ། ༨ དེ་ཅིའི་ཕྱིར་ཞེ་ན། ངའི་ཐུགས་བསམ་ནི་ཁྱོད་ཀྱི་བསམ་པའང་མིན། ཁྱོད་ཀྱི་ལམ་རྣམས་ཀྱང་ངའི་ལམ་རྣམས་མིན་པའི་ཕྱིར་རོ། ༩ གང་ལ་ཞེ་ན། ཇི་ལྟར་ས་ལས་ནམ་མཁའ་རྣམས་མཐོ། དེ་ལྟར་ཁྱོད་ཀྱི་ལམ་རྣམས་ལས་ངའི་ལམ་རྣམས་དང་། ཁྱོད་ཀྱི་བསམ་པ་རྣམས་ལས་ངའི་ཐུགས་བསམ་རྣམས་འཕགས་པའོ། ༡༠ དེ་ཅིའི་ཕྱིར་ཞེ་ན། ཇི་ལྟར་གནམ་ནས་ཁ་ཆར་འབབ་ཅིང་། གྱེན་དུ་མི་ལོག་པར། སོན་པ་ལ་ས་བོན་དང་། ཟ་མཁན་ལ་ཁ་ཟས་སྦྱོར་དུ་ས་འཆུ་ཞིང་། སྔོ་སྐྱེད་དེ་མེ་ཏོག་འབུས་སུ་འཇུག་པ་ལྟར། ༡༡ ངའི་ཞལ་ལས་འཐོན་པའི་བཀའ་མཆིད་ཀྱང་འགྱུར་འོང་ཞིང་། ངའི་དྲུང་དུ་སྟོང་པར་ལོག་མི་འོང་གི། ངས་ཅི་མཉེས་པ་དག་མཐར་བསྐྱེལ་ཏེ། ངས་གང་གི་ཕྱིར་མངགས་པའི་དོན་འགྲུབ་པར་འགྱུར་རོ། ༡༢ དེ་ཅིའི་ཕྱིར་ཞེ་ན། ཁྱེད་དགའ་མགུའི་ནང་ན་ཕྱི་རོལ་དུ་ཐོན་ཏེ། ཞི་བདེའི་ནང་ན་ཕར་འཁྲིད་པར་འགྱུར། ཁྱེད་ཀྱི་མདུན་དུ་རི་བོ་དང་བྲག་རི་རྣམས་ཀྱིས་སྐད་ཆེན་པོས་གླུ་ལེན་ཞིང་། ཐང་གི་རྩི་ཤིང་ཀུན་གྱིས་ལག་བརྡབ་གཏོང་བར་འགྱུར། ༡༣ ཚེར་ཤིང་གི་མལ་དུ་སོམ་ཤིང་བྱུང་ནས། སེ་བའི་མལ་དུ་ཧ་དས་ཤིང་སྐྱེ་བར་འགྱུར། འདི་ནི་ཡ་ཧོ་ཝཱ་ལ་མཚན་དང་། ནམ་ཡང་མི་གཅོད་པའི་རྟག་པའི་རྟགས་སུ་འགྱུར་བར་འགྱུར་རོ༎