ཨིས་ར་ཨེལ་གྱི་མིང་ནས་བོས་པ་དང་། ཡ་ཧུ་དཱའི་ཆུ་རྣམས་ལས་བྱུང་བ་དང་། ཡ་ཧོ་ཝཱའི་མཚན་གྱི་མནའ་སྐྱེལ་བ་དང་། བདེན་པ་ཉིད་དང་དྲང་བ་ཉིད་ལས་བྲལ་ཏེ། ཨིས་ར་ཨེལ་གྱི་དཀོན་མཆོག་བརྗོད་པར་བྱེད་མཁན། ཀྱེ་ཡ་ཀོབ་ཀྱི་ཁྱིམ་ཁྱོད་འདི་ལ་ཉོན་དང་། ༢ གང་ལ་ཞེ་ན། དེ་དག་གིས་རང་ལ་དམ་པའི་གྲོང་ཁྱེར་པ་དང་། མཚན་དུ་དཔུང་ཆེན་གྱི་ཡ་ཧོ་ཝཱ་ལགས་པའི་ཨིས་ར་ཨེལ་གྱི་དཀོན་མཆོག་ལ་བློ་གཏད་བྱེད་མཁན་ཡིན་ནོ་ཟེར། ༣ སྔར་བྱུང་བ་རྣམས་ངས་ཐོག་མ་ནས་བསྟན་པ་ཡིན། དེ་དག་ངའི་ཞལ་ནས་ཐོན་ཏེ། དེ་དག་ངས་མངོན་པར་བྱས་ནས། དེ་དག་བློ་བུར་དུ་ངས་བསྒྲུབ་པ་དང་། དེ་དག་གྲུབ་པར་གྱུར་ཏོ། ༤ གང་གི་དོན་དུ་ཞེ་ན། ཁྱོད་རང་ཁ་ལོ་གྱོང་པོ་ལགས་པ་དང་། ཁྱོད་ཀྱི་མཇིང་རྩ་ནི་ལྕགས་དང་། དཔྲལ་བ་ནི་ར་གན་ཡིན་པ་ངས་སྔར་ནས་ཤེས་པ་ཡིན། ༥ ཁྱོད་ཀྱིས་འདི་དག་ངའི་སྐུ་འདྲས་བསྒྲུབས་ཏེ། ངའི་རྐོས་སྐུ་དང་ངའི་བླུག་སྐུས་དེ་དག་བསྒོ་བ་ཡིན་ཞེས་སྨྲ་མི་ནུས་པའི་ཕྱིར། ངས་དེ་དག་ཐོག་མ་ནས་ཁྱོད་ལ་བཤད་དེ། མ་བྱུང་གོང་དུ་ཁྱོད་ལ་བསྟན་པ་ཡིན། ༦ འདི་ཀུན་ལ་ལྟོས་ཤིག ཁྱོད་ཀྱིས་ཐོས་ཡོད་པས། དེ་འཆད་པར་མི་བྱའམ། ད་ལྟ་ངས་ཁྱོད་ལ་རྒྱུས་མེད་པའི་བྱ་བ་གསར་པ་དང་སྦས་པ་རྣམས་བསྟན་པ་ཡིན། ༧ དེ་དག་ནི་སྔར་མེད་ཀྱང་ད་ལྟ་རང་བཀོད་པ་ཡིན། ཁྱོད་ཀྱིས། ལྟོས་ཤིག འདི་དག་གི་རྒྱུས་ང་ལ་ཡོད་སྨྲ་མི་ནུས་པའི་ཕྱིར། ཉིན་མོ་དེ་རིང་གི་སྔོན་དུ་ཁྱོད་ཀྱིས་མ་ཐོས། ༨ འོ་ན། ཁྱོད་ཀྱིས་མ་ཐོས། འོ་ན། མ་རྟོགས། འོ་ན། སྔོན་མ་ནས་ཁྱོད་ཀྱི་རྣ་བ་ཕྱེས་ནས་མེད་པ་ཡིན། ཅི་ལ་ཞེ་ན། ཁྱོད་རབ་ཏུ་ལོག་པར་བྱེད་པ་ངས་སྔར་ནས་བཤེས་པ་ཡིན་ཏེ། མངལ་གྱི་དུས་ནས་ངོ་ལོག་མཁན་དུ་གྲགས་སོ། ༩ ངས་ཁྱོད་མི་གཅོད་པའི་ཕྱིར། ངས་རང་གི་མཚན་གྱི་ངོར་ཐུགས་ཁྲོ་འགྱངས་པར་བྱ། ཉིད་ཀྱི་ཆེ་བའི་སླད་དུ་ངས་ཐུགས་བཟོད་སྒོམ་པར་བྱའོ། ༡༠ ཀྱེ་ཧོ། ངས་ཁྱོད་ཀྱི་ལྷད་བཏོན་གྱི། དངུལ་ལྟར་མ་བཏོན་པར། སྡུག་བསྔལ་གྱི་མེ་ཐབ་ཀྱི་ནང་ནས་ངས་ཁྱོད་འདམས་པ་ཡིན། ༡༡ ང་ཉིད་ཀྱི་ངོར། འོ་ན། ང་ཉིད་ཀྱི་ངོར་ངས་དེ་དག་སྒྲུབ་པར་བྱའོ། ཅིའི་སླད་དུ་བདག་གི་མཚན་ལ་གྲིབ་འཕོག་པར་རུང་། ངས་ཉིད་ཀྱི་གཟི་བརྗིད་གཞན་ལ་སྟེར་བར་མི་བྱ།