༣༡
ར་མདའི་དོན་དུ་མི་སེར་ལ་འགྲོ་བ་དང་། རྟ་ལ་བློ་བཀལ་བ་དང་། ཤིང་རྟ་ལ་བློ་གཏོད་པ་རྣམས་བཀྲ་མི་ཤིས། ཇི་ལྟར་ཞེ་ན། དེ་དག་གི་རྟ་པའི་ཤུགས་ཆེ་ཞིང་ཤིང་རྟ་མང་བས་སོ། འོན་ཀྱང་དེ་དག་གིས་ཨིས་ར་ཨེལ་གྱི་དམ་པ་ཉིད་ལ་མི་ལྟ་ཞིང་། ཡ་ཧོ་ཝཱ་ཡང་མི་འཚོལ་ལོ། ༢ ཁོང་ཡང་ཐུགས་མཁས་པ་སྟེ། སྡུག་བསྔལ་འབེབས་ཤིང་ཉིད་ཀྱི་གསུང་ཚིག་ཟློག་པར་མི་བྱའི། མི་ངན་གྱི་ཁྱིམ་དང་མི་ཚངས་པ་སྤྱོད་པ་དག་ལ་ར་མདའ་བྱེད་པའི་ཐད་དུ་བཞེངས་པར་འགྱུར། ༣ དེ་ཅིའི་ཕྱིར་ཞེ་ན། མི་སེར་པ་ཡང་མི་སྟེ། དཀོན་མཆོག་ནི་མིན། དེ་དག་གི་རྟ་ཡང་ཤ་ཡིན། སེམས་ཉིད་ནི་མིན། ཡ་ཧོ་ཝཱས་ཕྱག་བརྐྱང་བའི་ཚེ་ན་སྐྱབས་བྱེད་མཁན་དེ་གྱེལ་ཏེ། སྐྱབས་ཐོབ་པ་ལྷུང་ནས། དེ་རྣམས་ལྷན་ཅིག་ཏུ་འཕུང་བར་འགྱུར།༤ དེ་ཅིའི་ཕྱིར་ཞེ་ན། ཡ་ཧོ་ཝཱས་བདག་ལ་འདི་སྐད་དུ། ཇི་ལྟར་སེང་གེ་དང་སེང་གེ་དར་མས་རང་གི་ཁྱི་ར་ལ་འཆང་སྟེ་ངར་སྐད་འདོན་པ་ལས། རྒོལ་དུ་བོས་པའི་ལུག་རྫིའི་དཔུང་གི་ཀུ་སྒྲས་མི་འཇིགས་ཤིང་། དེ་དག་གི་སྐད་ཀྱིས་དེའི་ངར་མི་ཆག་པ་ལྟར། རི་བོ་ཙི་ཨོན་དང་དེའི་སྒང་ཁའི་དོན་དུ་འཐབ་ཏུ་ཡ་ཧོ་ཝཱ་མར་འབྱོན་པར་འགྱུར། ༥ ཤོག་པ་འཁྲབ་པའི་འདབ་ཆགས་ཀྱི་ཚུལ་དུ་དཔུང་ཆེན་གྱི་ཡ་ཧོ་ཝཱས་ཡེ་རུ་ཤ་ལེམ་སྐྱོབ་པ་དང་། སྐྱོབ་ཅིང་སྒྲོལ་བར་མཛད་དེ། དེའི་སྟེང་དུ་ཕེབས་ཤིང་སྲུང་འོང་།
༦ གཏིང་ནས་ངོ་ལོག་བྱས་པའི་ཨིས་ར་ཨེལ་གྱི་བུ་རྣམས། ཁྱོད་ཁོང་གི་ཕྱོགས་སུ་ལོག་ཅིག ༧ དེ་ཅིའི་ཕྱིར་ཞེ་ན། ཉིན་མོ་དེར་མི་རེ་རེ་བཞིན་གྱིས་རང་གི་ལག་པས་ཉེས་ལྟུང་བྱེད་དུ་བཟོས་པའི། རང་གི་དངུལ་སྐུ་དང་གསེར་སྐུ་ཁྱོད་ཀྱིས་འདོར་བར་འགྱུར་རོ། ༨ དེའི་ཚེ་ཨ་སུར་པ་རྣམས་མིའི་མིན་པའི་རལ་གྲིས་ལྟུང་ཞིང་། མིའི་མ་ལགས་པའི་རལ་གྲིས་དེ་དག་བསད་དེ། རལ་གྲིའི་འཇིགས་སྣང་གིས་བྲོས་ཏེ། དེའི་དར་ལ་བབ་པ་དག་གིས་འུ་ལག་སྐྱེལ་བར་འགྱུར། ༩ དེའི་བྲག་ནི་དངང་སྐྲག་གིས་འདར་བར་འགྱུར། དེའི་དཔོན་པོ་རྣམས་ཀྱིས་འཕྱར་དར་མཐོང་ནས་འདར་བར་འགྱུར་རོ། ཞེས་པ་འདི་ནི། ཙི་ཨོན་ན་མེ་དང་། ཡེ་རུ་ཤ་ལེམ་ན་མེ་ཐབ་ཡོད་པའི་ཡ་ཧོ་ཝཱས་གསུང་ངོ་༎