ཨ་མོས་ཀྱི་བུ་ཡེ་ཤ་ཡཱས་བཱ་བེལ་གྱི་སྐོར་མཐོང་བར་གྱུར་པའི་ལུང་བསྟན་ནི། ༢ རི་སྟོང་གི་ཁར་དར་ཆེན་ཞིག་སྒྲེང་བར་བྱོས་ཤིག་དང་། སྐད་ཆེན་པོས་དེ་རྣམས་ལ་འབོད་ཅིང་། སྐུ་དྲག་དག་གི་སྒོ་མོར་ཞུགས་པའི་སླད་དུ་ལག་དབྱུག་ཐོང་ཞིག ༣ བདག་གིས་རང་གི་དམ་པ་རྣམས་ལ་བཀའ་སྒོ་སྟེ། ངའི་འཕག་པ་ཉིད་ལ་དགའ་མཁན་གྱི་དཔའ་བོ་དག་ལ་ངའི་ཁོང་ཁྲོ་རྫོགས་སུ་ངས་བོས་པ་ཡིན། ༤ རི་བོ་རྣམས་ན་དམག་དཔུང་ཆེན་པོ་དང་འདྲ་བའི་དཔུང་ཚོགས་ཀྱི་འུར་སྒྲ་ཞིག་གདའ། འདི་ནི་ཚོགས་པར་གྱུར་པའི་མི་བརྒྱུད་རྣམས་ཀྱི་རྒྱལ་ཁམས་དག་གི་འདུ་འཛིའི་སྐད་ལགས། དཔུང་ཆེན་གྱི་ཡ་ཧོ་ཝཱས་དམག་ཚོགས་རྣམས་ལ་ཞིབ་དཔྱོད་མཛད་དོ། ༥ ཡུལ་ཐམས་ཅད་མེད་པར་མཛད་དུ། ཡ་ཧོ་ཝཱའམ་ཁོང་གི་ཐུགས་ཁྲོའི་མཚོན་ཆ་ལགས་པ་དེ་དག ས་ཐག་རྒྱང་རིང་ནས་ནམ་མཁའི་མཐའ་མ་ལས་འོང་གིན་གདའོ། ༦ ད་ནི་ཡ་ཧོ་ཝཱའི་ཉིན་མོ་ཉེ་བར་གྱུར་པས། དེ་ནི་ཀུན་དབང་གི་ཕྱོགས་ལས་འཇིག་པ་ཆེན་པོ་དང་འདྲ་བར་འོང་བས་ན། འོ་དོད་ཐོང་ཞིག ༧ དེའི་རྐྱེན་གྱིས་ལག་རྩ་ཐམས་ཅད་ལྷོད་ཅིང་། མི་ཀུན་གྱི་སྙིང་གཞུ་ཞིང་། ༨ དངང་སྐྲག་ཅིང་གཟེར་དང་འཚེར་བས་དེ་དག་གཟུང་སྟེ། སྐྱེ་གཟེར་གྱིས་ཐེབས་པའི་བུད་མེད་དང་མཚུངས་པའི་གཟེར་གྱིས་གཟིར་ཞིང་། ཐབ་ཐོབ་ཏུ་གྱུར་ཏེ། གཅིག་གིས་གཅིག་ལ་བལྟ་སྟེ། དེ་དག་གི་གདོང་ནི་མེ་ལྕེ་ལྟར་འགྱུར་བར་འགྱུར་རོ༎