ཨུ་ཟི་ཡཱའི་བུ་ཡོ་ཐམ་སྟེ། དེའི་བུ་ཨ་ཧས་བྱ་བའི་ཡ་ཧུ་དཱའི་རྒྱལ་པོའི་རིང་དུ་བྱུང་བར་གྱུར་པ་ནི། ཨ་རམ་གྱི་རྒྱལ་པོ་རེ་ཙིན་དང་ཨིས་ར་ཨེལ་གྱི་རྒྱལ་པོ་རེ་མལ་ཡཱའི་བུ་པེ་ཀཱ་གཉིས་མཉམ་དུ་ཡེ་རུ་ཤ་ལེམ་ལ་འཐབ་ཏུ་སོང་ཡང་། མ་ཐུབ་བོ། ༢ དེའི་ཚེ་དཱ་བིད་ཀྱི་གདུང་འཛིན་ལ། ཨ་རམ་པས་ཨེབ་ར་ཨིམ་ར་མདར་སྦྲན་ནས་འོང་ངོ་ཞེས་པའི་ཕྲིན་བཤད་པ་དང་། རླུང་དྲག་གིས་ནགས་ཚལ་གྱི་ཤིང་བསྐྱོད་པ་ལྟར། དེའི་སྙིང་དང་འབངས་ཀྱི་སྙིང་འཁྲུགས་པར་གྱུར་ཏོ། ༣ དེར་ཡ་ཧོ་ཝཱས་ཡེ་ཤ་ཡཱ་ལ་བཀའ་སྩལ་པ། ད་ཁྱོད་ཀྱིས་རང་གི་བུ་ཤེ་ཨར་ཡ་ཤུབ་ཁྲིད་དེ། འཁྲུད་མཁན་གྱི་ཞིང་གི་ལམ་ན་ཡོད་པའི་རྫིང་གོང་མའི་ཁྲི་ཡུར་གྱི་མཇུག་ཏུ། ཨ་ཧས་དང་འཕྲད་དུ་སོང་ནས། ༤ དེ་ལ། དེ་རེ། སེམས་ལྷོད་ཀྱི་སྡོད་ཅིག་དང་། ཨ་རམ་པའི་རེ་ཙིན་དང་། རེ་མལ་ཡཱའི་བུའི་ཁོང་ཁྲོ་འབར་བའི་མགལ་ཐོའི་དུ་བའི་རྔ་མ་གཉིས་ལ་མ་འཇིགས། སྙིང་ཡང་འཁྲུགས་པར་མ་གྱུར་ཅིག ༥ གང་ལ་ཞེ་ན། ཨ་རམ་དང་ཨེབ་ར་ཨིམ་དང་རེ་མལ་ཡཱའི་བུས་ཁྱོད་ཀྱི་ཕྱིར་དུ་གྲོས་ངན་བྱེད་ཅིང་། ༦ ཚུར་ཤོག་ལ། ཡ་ཧུ་དཱ་ལ་དམག་དྲངས་ཏེ་དེ་དག་སྐྲག་པར་བྱེད་ཅིང་། ངེད་རང་གི་དོན་དུ་གློ་བརྟོལ་ཏེ་དེའི་དབུས་སུ་ཏ་བེ་ཨལ་གྱི་བུ་རྒྱལ་པོར་སྐོ་བར་བྱའོ་ཞེས་ཟེར་བས་ན། ༧ ཡ་ཧོ་ཝཱ་དཀོན་མཆོག་གིས་འདི་སྐད་དུ། གྲོས་དེ་མི་གནས་ཤིང་། དོན་ཡང་འགྲུབ་པར་མི་འགྱུར། ༨ གང་ལ་ཞེ་ན། ཨ་རམ་གྱི་མགོ་ནི་ད་མཱ་སེག་དང་། ད་མཱ་སེག་གི་མགོ་ནི་རེ་ཙིན་རང་ཡིན། ཡང་ལོ་དྲུག་ཅུ་རེ་ལྔའི་ནང་དུ་ཨེབ་ར་ཨིམ་ནི་མི་བརྒྱུད་དུ་མི་ལུས་པ་ཙམ་དུ་ཆག་པར་འགྱུར། ༩ ཨེབ་ར་ཨིམ་གྱི་མགོ་ནི་ས་མར་ཡཱ་དང་། ས་མར་ཡཱའི་མགོ་ནི་རེ་མལ་ཡཱའི་བུའོ། ཇི་སྟེ་ཁྱོད་མི་དད་ན། སྲན་འཚུགས་པར་མི་འགྱུར་བ་ངེས་སོ་ཞེས་གསུངས་སོ༎