༥ དེ་ནས་ངས། བདག་ལ་བཀྲ་མི་ཤིས། ང་ནི་མི་གཙང་བའི་ཁ་ལྤགས་ཅན་གྱི་མི་ལགས་ཤིང་། ཁ་ལྤགས་མི་གཙང་བའི་མིའི་དཀྱིལ་ན་གནས་བཞིན་དུ། ངའི་མིག་གིས་དཔུང་ཆེན་གྱི་ཡ་ཧོ་ཝཱ་རྒྱལ་པོ་མཇལ་བས། བདག་མེད་པར་གྱུར་ཟིན། ཞེས་བརྗོད་པ་ཙམ་གྱིས། ༦ སེ་ར་ཕཱིམ་རྣམས་ཀྱི་ནང་ནས། མཆོད་ཁྲིའི་ཐོག་ནས་མེ་ལེན་གྱིས་བླངས་པའི་མེ་ལྒོག་ལག་པར་ཡོད་པ་གཅིག་ངའི་ཕྱོགས་སུ་འཕུར་འོངས་ཏེ། ༧ ཁོང་གིས་དེ་ངའི་ཁ་ལ་རེག་ཅིང་། ལྟོས་ཤིག འདིས་ཁྱོད་ཀྱི་ཁ་ལྤགས་ལ་རེག་པར་གྱུར་པས། ཁྱོད་ཀྱི་ཉེས་སྡིག་མེད་པར་གྱུར་ཅིང་། ཁྱོད་ཀྱི་ཉེས་སྐྱོན་འདག་པར་གྱུར་ཏོ། ཞེས་གསུངས་སོ༎

༨ དེའི་ཚེ་ངས་ཡ་ཧོ་ཝཱའི་སྒྲ་ཐོས་ཞིང་འདི་སྐད་དུ། ངས་སུ་མངག་པ་བྱ། ངེད་ཀྱི་ཕྱོགས་ལས་གང་ཆས་པར་འགྱུར། ཞེས་གསུངས་པ་དང་། ངས། བདག་འདིར་ཡོད། ང་མངག་པར་མཛོད་ཅིག་ཅེས་གསོལ་པ་དང་། ༩ ཁོང་གིས་བདག་ལ། སོང་ལ། མི་བརྒྱུད་འདི་ལ། ཁྱོད་ཅག་གི་ཐོས་བཞིན་དུ་གོ་བར་མི་འགྱུར། མཐོང་བཞིན་དུ་རྟོགས་པར་མི་འགྱུར་ཞེས་སྦྲོན་ཞིག ༡༠ དེ་དག་རང་གི་མིག་གིས་མི་མཐོང་བ་དང་། རྣ་བས་མི་ཐོས་པ་དང་། སྙིང་གིས་མི་རྟོགས་པ་དང་། སེམས་མི་སྒྱུར་བ་དང་། གསོ་བར་མི་འགྱུར་བའི་དོན་དུ། ཁྱོད་ཀྱིས་མི་དེ་དག་གི་སྙིང་སྦོམ་པོ་དང་། རྣ་བ་ལྕི་བ་དང་། མིག་ཚུམ་པར་བྱོས་ཤིག ཅེས་གསུངས་པ་དང་། ༡༡ ངས། གཙོ་བོ། དུས་ཙམ་གྱི་བར་དུ། ཞེས་ཞུས་པའི་ལན་དུ་ཁོང་གིས། གྲོང་ཁྱེར་རྣམས་སྟོངས་ཤིང་གནས་མཁན་སུ་ཡང་མ་ལུས་པར། ཁང་སྟོར་སོང་ནས་ས་གཞི་ཡོངས་སུ་བཞིག་སྟེ། ༡༢ ཡ་ཧོ་ཝཱས་མི་རྣམས་ཐག་རིང་པོར་བསྐྱལ་ཏེ། ཡུལ་གྱི་ནང་ན་སྤངས་པའི་ས་ཆ་མང་མང་འགྱུར་བའི་བར་དུའོ། ཞེས་གསུངས་སོ། ༡༣ འོན་ཀྱང་དེའི་ནང་ནས་བཅུ་ཆ་གཅིག་ཙམ་ལུས་པར་གྱུར་ན། དེ་ཡང་ཟ་བར་འགྱུར། ཨེ་ལཱ་དང་བེ་ཤིང་བཅད་ནས་སྡོང་པོ་ཞིག་ལུས་པ་ལྟར། སྡོང་པོ་དེ་ནི་དམ་པའི་ས་བོན་དུ་འགྱུར་བར་འགྱུར་རོ༎