དེའི་རྐྱེན་གྱིས་ངས་བྱ་བ་ཐམས་ཅད་ལ་སྙིང་གི་ནང་དུ་བསམ་བློ་བཏང་ཞིང་། དེ་ཐམས་ཅད་སར་བཅད་པ་ཡིན། གང་ལ་ཞེ་ན། ཆོས་དྲང་པོ་དང་། མཁས་པ་དང་། དེ་དག་གི་ལས་རྣམས་དཀོན་མཆོག་གི་ཕྱག་ཏུ་ཡོད་པས། མི་གང་གིས་ཀྱང་རང་གི་སྔོན་དུ་ཡོད་པ་ཐམས་ཅད་བྱམས་ཐུགས་སམ། སྡང་བར་མཛད་པ་ཡིན་རྟོགས་པར་མི་ནུས། ༢ ཐམས་ཅད་ལ་ཐམས་ཅད་སྙོམས་པོར་འབྱུང་སྟེ། ཆོས་དྲང་པོ་དང་སྡིག་སྤྱོད་དང་། བཟང་པོ་གཙང་བ་དང་མི་གཙང་བ་དང་། མཆོད་པ་འབུལ་མཁན་དང་མི་འབུལ་མཁན་རྣམས་ལ་གཅིག་པ་འབྱུང་སྟེ། ཆོས་དྲང་པོ་ལྟར་སྡིག་ཅན་དང་། མནའ་སྐྱེལ་མཁན་ལྟར་མནའ་ཐོར་མི་འཇིགས་མཁན། ༣ ཐམས་ཅད་ལ་བྱ་བ་གཅིག་པ་ཞིག་འབྱུང་བ་ནི། ཉི་མའི་འོག་ན་འབྱུང་བའི་བྱ་བ་ཐམས་ཅད་ཀྱི་ནང་ན་ཐུ་བ་ཞིག་ཡིན། འོ་ན། མིའི་བུ་རྣམས་ཀྱི་སྙིང་ཡང་ངན་པས་གང་སྟེ། གསོན་རིང་བར་དུ་དེ་དག་གི་སྙིང་དུ་བློ་མུན་པ་གནས། དེའི་རྗེས་སུ་གཤིན་པོའི་ཁྲོད་དུ་འགྲོ། ༤ དེ་ལྟར་གསོན་པོ་ཀུན་དང་འབྲེལ་བ་རྣམས་ལ་རེ་བ་ཡོད་པས། སེང་གེའི་རོ་ལས་ཁྱི་གསོན་པོ་དྲག ༥ དེ་ཅིའི་ཕྱིར་ཞེ་ན། གསོན་པོ་རྣམས་ཀྱིས་རང་འཆི་བར་འགྱུར་བ་ཤེས་ཀྱང་། གཤིན་པོས་ཅིའང་མི་ཤེས། འདི་དག་དྲན་པ་ནི་བརྗེད་པའི་སྟབས་ཀྱིས། དེ་དག་ལ་རྔན་པ་གང་ཡང་མེད། ༦ དེ་དག་གི་ཆགས་སྡང་དང་། འཁོན་སེམས་ཀྱང་མེད་པར་གྱུར་པས། དེ་རྣམས་ལ་ཉི་མའི་འོག་ན་བྱས་པའི་ལས་གང་རུང་གི་སྐལ་བ་གང་ཡང་ཕྱིན་ཆད་དུ་མི་ཐོབ་བོ༎