༥
ཁྱེད་དཀོན་མཆོག་གི་ཕོ་བྲང་དུ་འགྲོ་བའི་དུས་སུ། རང་གི་རྐང་པ་ལ་ཉ་ར་བྱོས། གླེན་པ་ཞིག་རང་གིས་བྱེད་པའི་ངན་པ་མི་རྟོགས་པས། དེ་དག་གི་སྦྱིན་སྲེག་ལས། ཁྱོད་ཀྱིས་བཀའ་ཐོས་པ་ལ་ལྷག་པར་གཅང་པོ་གྱིས་ཤིག ༢ ཁྱོད་ལབ་ཏུ་ཁ་མ་མགྱོགས། དཀོན་མཆོག་གི་དྲུང་དུ་ཁ་མི་ཐལ་བའི་ཕྱིར་དུ་རང་གི་སྙིང་ཙབ་ཙོབ་མ་བྱེད། གང་ལ་ཞེ་ན། དཀོན་མཆོག་ནི་གནམ་ལ་བཞུགས། ཁྱོད་ས་ལ་ཡོད་པས། གཏམ་ཉུང་ཉུང་ལབ་པར་བྱོས་ཤིག༣ ལས་མང་སྟབས་ཀྱིས་རྨི་ལམ་རྨི། ལབ་ལབ་མང་བ་གླེན་པའི་གཏམ།
༤ ནམ་ཁྱོད་ཀྱིས་དཀོན་མཆོག་ལ་སྡོམ་པ་བླང་ན། དེ་སྒྲུབ་ཏུ་མ་འགོར། ཅི་ལ་ཟེར་ན། གླེན་པ་རྣམས་ལ་ཁོང་ཐུགས་མི་མཉེས་པས། སྡོམ་པ་དེ་སྒྲུབ་པར་བྱོས་ཤིག ༥ སྡོམ་པ་བླངས་ནས་མི་སྒྲུབ་པ་བས། སྡོམ་པ་མི་ལེན་པ་ལེགས། ༦ ཁྱོད་རང་གི་ལུས་ཀྱིས་ཉེས་པ་བྱེད་རྒྱུར་རང་གི་ཁ་འདའ་ཡན་དུ་མ་ཐོང་ཞིག ཕོ་ཉའི་མདུན་དུའང་ངས་མ་ཤེས་པར་ནོར་བ་ཡིན་མ་ཞུས་ཤིག ཞུ་ན། དཀོན་མཆོག་ནི་ཁྱོད་ཀྱི་སྐད་ལ་ཐུགས་འཁྲོ་ཞིང་། ཁྱོད་ཀྱི་ལག་ལས་མེད་པར་བྱེད་ལས་ཆེ།
༧ རྨི་ལམ་མང་མང་དང་། གཏམ་མང་མང་གི་ནང་ན་སྙིང་པོ་མེད་པ་སྣ་ཚོགས་ཡོད་པས། ཁྱོད་དཀོན་མཆོག་ལ་འཇིགས་ཤིག
༨ ཇི་སྟེ་ཡུལ་གྱི་ནང་ན་དབུལ་པོ་ལ་ཚོད་བཅད་དང་། ཁྲིམས་ལོག་དང་གཤགས་ལོག་བྱེད་པ་ཁྱོད་ཀྱིས་མཐོང་ན། དེ་ལ་ཧ་ལས་མི་དགོས། དེ་ཅིའི་ཕྱིར་ཞེ་ན། མཐོ་ཤོས་རྣམས་ལས་ཀྱང་མཐོན་པོ་ལགས་པ་དེས་གཟིགས་ཏེ། དེ་དག་ལས་འཕགས་པ་ཞིག་བཞུགས་སོ། ༩ དེ་མ་ཟད་ས་གཞིའི་ཁེ་བཟང་དེ་ཀུན་གྱི་ཕྱིར་ཡིན། རྒྱལ་པོ་རང་ཡང་ཞིང་གིས་ཕན་ཐོགས་སོ༎
༡༠ དངུལ་འདོད་ཅན་ཞིག་དངུལ་གྱིས་ཆོག་པར་མི་འགྱུར། ནོར་འདོད་ཅན་ཞིག་འཕེལ་གྱིས་ཀྱང་ཆོག་པར་མི་འགྱུར། འདི་ལ་ཡང་སྙིང་པོ་མེད།
༡༡ ནོར་འཕེལ་དུས་ཟ་མཁན་ཡང་འཕེལ་བས། ནོར་གྱི་བདག་པོ་ལ་མིག་གིས་མཐོང་བ་མ་གཏོགས་ཅི་ཕན།
༡༢ ལས་བྱེད་མཁན་གྱིས་མང་ཉུང་ཅི་ཟ་ཡང་། དེའི་གཉིད་སྐྱིད། འོན་ཀྱང་ནོར་མང་པོས་གཉིད་ཀྱང་ལོག་མི་འཇུག་གོ།
༡༣ ངས་ཉི་མའི་འོག་ན་རྐྱེན་ངན་ཆེན་པོ་ཞིག་མཐོང་། གང་ཡིན་ཞེ་ན། ནོར་རྫས་ཀྱིས་ནོར་བདག་རང་ལ་གནོད་སྐྱེལ་ལོ། ༡༤ འོན་ཀྱང་ནོར་དེ་རྣམས་རྐྱེན་ངན་གྱིས་ཟད་པ་དང་། བུ་ཞིག་སྐྱེ་ན་ཡང་། དེའི་ལག་ན་ཅིའང་མེད་དེ། ༡༥ རང་འོངས་པ་ལྟར་དུ་འགྲོ་བ་ལ། གོས་མེད་མའི་མངལ་ནས་ཐོན་པ་ལྟར། ཕྱིར་ལྡོག་པར་གྱུར་ཏེ། དེས་དཀའ་ལས་བྱེད་པའི་ནང་ནས་རང་གི་ལག་ན་ཅིའང་མཉམ་དུ་འཁྱེར་བར་མི་འགྱུར་གྱིས། ༡༦ ཅི་ས་ནས་དེ་འོངས་པ་ལྟར་འགྲོ་བར་ཡང་དགོས་ཏེ། རླུང་གི་དོན་དུ་འབད་པས། ཁོ་ལ་ཕན་ཅི་འབྱུང་། འདི་ཡང་རྐྱེན་ངན་ཆེན་པོའོ། ༡༧ དེས་ཚེ་གང་མུན་ནེར་ཟ་ཞིང་། སེམས་འཁྲལ་དང་། ན་བ་དང་། ཁོང་ཁྲོ་ནི་མང་།
༡༨ ལྟོས་ཤིག ངས་མཐོང་བ་ནི། མི་ཡིས་ཟ་བ་དང་། འཐུང་བ་དང་། ཉི་མའི་འོག་ཏུ་བྱེད་པའི་ལས་ཐམས་ཅད་ཀྱི་དོན་དུ། དཀོན་མཆོག་གིས་གནང་བའི་ཚེ་ཧྲིལ་པོ་སྐྱིད་པོ་བྱེད་པ་ནི། དེའི་ཟ་ཐང་ཡོད་པ་ནི་བཟང་པོ་དང་ཡིད་དུ་འོང་བ་ལགས། ༡༩ དཀོན་མཆོག་གིས་ནོར་དང་ལོངས་སྤྱོད་གནང་ཡོད་པའི་མི་ཀུན་དང་། དེ་ལས་ཟ་བ་དང་། རང་གི་ཟ་སྐལ་དེ་ལེན་པ་དང་། རང་གི་འབད་བརྩོན་གྱི་ནང་དུ་དགའ་མགུ་བྱེད་པའི་དབང་ཡང་གནང་བ་ལགས། འདི་ནི་དཀོན་མཆོག་གི་གསོལ་རས་སོ། ༢༠ དཀོན་མཆོག་གིས་དེའི་སྙིང་དགའ་བ་གནང་བཞིན། བཀའ་ལན་གནང་བར་མཛད་པའི་རྐྱེན་གྱིས། དེས་རང་གི་ཚེའི་ཉིན་མོ་རྣམས་ཆེར་དྲན་པར་མི་བྱའོ༎